រាជបណ្ឌិត្យសភា៖ ផែនទីពីបក្សប្រឆាំង រដ្ឋាភិបាល អាមេរិក និងបារាំង គឺដូចគ្នា
ក្រុមស្រាវជ្រាវបញ្ហាព្រំដែនកម្ពុជារបស់រាជបណ្ឌិត្យសភា បានបញ្ចប់ការផ្ទៀងផ្ទាត់ផែនទីពីប្រភពផ្សេងគ្នាហើយនៅថ្ងៃពុធ ទី១២ សីហានេះ។ ក្រុមការងារ បានអះអាងថា ផែនទីទាំង៤ប្រភពផ្សេងគ្នានេះ គឺដូចគ្នា។ ប៉ុន្តែក្រុមស្រាវជ្រាវមិនបានផ្ទៀងផ្ទាត់ផែនទីពីអង្គការសហប្រជាជាតិចំនួន១៨ផ្ទាំងនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅទីបំផុតក្រុមស្រាវជ្រាវផែនបានបង្ហាញលទ្ធផលថា ផែនទីពីអាមេរិក បារាំង បក្សប្រឆាំង និងរដ្ឋាភិបាលគឺជាផែនទីដូចគ្នា។ លោក សុខ ទូច ប្រធានក្រុមស្រាវជ្រាវ បានគូសបញ្ជាក់ថា មានចំណុចចំនួន៤ ដែលបានបង្ហាញពីភាពដូចគ្នានៃផែនទីទាំងអស់។ ចំណុចដូចគ្នានោះគឺ កាលបរិច្ឆេទនៃការបោះពុម្ព ខ្សែអ័រដោណេ លេខសំគាល់តំបន់ និងខ្សែគូសព្រំដែនជាដើម។
ប្រភពទាំង៤នោះគឺទី១ រដ្ឋាភិបាលកម្ពុជា ទី២ គណបក្សសង្គ្រោះជាតិ ទី៣ សភានៃរដ្ឋសហព័ន្ធអាមេរិក និងទី៤ វិទ្យាស្ថានភូមិសាស្ត្រឥណ្ឌូចិន។ ប៉ុន្តែក្រុមការងារមិនបានផ្ទៀងផ្ទាត់ផែនទីទាំង១៨ផ្ទាំងពីអង្គការសហប្រជាជាតិដែលគ្រោងនឹងបញ្ជូនមកកម្ពុជានៅថ្ងៃទី១៩ និង២០ សីហានោះទេ។ ព្រោះថាមិនគ្រប់ចំនួន។ ការផ្ទៀងផ្ទាត់នេះ គឺបន្ទាប់ពីរដ្ឋាភិបាលនៃគណបក្សកាន់អំណាច និងគណបក្សប្រឆាំង បានចង្អុលមុខដាក់គ្នា និងចោទប្រកាន់ទៅវិញទៅមករឿងប្រើប្រាស់ផែនទីក្លែងក្លាយដើម្បីបោះបង្គោលព្រំដែនជាមួយនឹងប្រទេសវៀតណាម។
ការផ្ទៀងផ្ទាត់របស់ក្រុមបណ្ឌិត្យសភាបានពិនិត្យជាបឋមម្តងរួចមកហើយទៅលើផែនទីចំនួន៣ផ្ទាំងកាលពីថ្ងៃអង្គារម្សិលមិញ។ ការពិនិត្យជាបឋមនេះ គឺបន្ទាប់ពីទទួលបានផែនទីភ្លាមៗពីគណបក្សសង្គ្រោះជាតិ។ សូមកត់សម្គាល់ថា ជម្លោះព្រំដែនរវាងកម្ពុជា និងវៀតណាមដែលបានផ្ទុះឡើងវិញយ៉ាងស្រួចស្រាវកាលពីខែមិថុនា និងខែកក្កដាកន្លងទៅ បានទាញទម្លាក់ឱ្យអ្នកនយោបាយកម្ពុជាមានជម្លោះផ្ទៃក្នុងស្តីពីផែនទីជាមួយនឹងវៀតណាមនេះ។ ហើយសង្គមទាំងមូលបានដាក់ការសង្ស័យចំពោះកិច្ចការងារព្រំដែនរបស់គណបក្សប្រជាជនកម្ពុជាដែលធ្លាប់មានទំនាក់ទំនងស្និទស្នាលជាមួយវៀតណាម។ លោកបណ្ឌិតសុខទូច បានបញ្ជាក់ថាលទ្ធផលនៃការស្រាវជ្រាវនេះ នឹងបញ្ចប់ជម្លោះនយោបាយផ្ទៃក្នុង ហើយប្រកាន់គោលជំហរតែមួយរឿងផែនទីដើម្បីដោះស្រាយការបែងចែកទឹកដីជាមួយវៀតណាមដែលនៅសេសសល់ប្រមាណ២០០គីឡូម៉ែត្រ បន្ទាប់ពីបានដោះស្រាយបញ្ចប់ជាង៨៣ភាគរយរួចហើយ។
យ៉ាងណាក៏ដោយ លោកអ៊ុំ សំអានតំណាងរាស្ត្រគណបក្សសង្គ្រោះជាតិ បានអះអាងថាបក្សប្រឆាំងមិនទទួលស្គាល់ការងារស្រាវជ្រាវរបស់បណ្ឌិត្យសភានោះទេ ព្រោះថាមិនមានភាពឯករាជ្យ។ ដោយឡែករដ្ឋាភិបាលកម្ពុជាវិញ លោកស្រី កុយ ពិសី អនុប្រធានលេខាធិការដ្ឋាននៃគណៈកម្មការព្រំដែនកម្ពុជាបានបញ្ជាក់ថា រដ្ឋាភិបាលមិនប្រឆាំងនឹងលទ្ធផលនៃការរកឃើញរបស់បណ្ឌិត្យសភាកម្ពុជានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ