ក្រុមហ៊ុនដឹកជញ្ជូនអ្នកដំណើរ ២៩ ក្រុមហ៊ុន យល់ព្រមមិនដំឡើងថ្លៃសំបុត្រនាឱកាសបុណ្យចូលឆ្នាំខ្មែរ
ក្រសួងសាធារណការនិងដឹកជញ្ជូននៅព្រឹកនេះ បានកោះប្រជុំតំណាងក្រុមហ៊ុនដឹកជញ្ជូនអ្នកដំណើរ ជុំវិញតម្លៃសំបុត្រ នាឱកាសបុណ្យចូលឆ្នាំខ្មែរ។ បន្ទាប់ពីកិច្ចប្រជុំ តំណាងក្រុមហ៊ុនដឹកជញ្ជូនអ្នកដំណើរ ចំនួន ២៩ ក្រុមហ៊ុន បានសន្យាថា នឹងមិនដំឡើងថ្លៃសំបុត្ររថយន្ត នាអំឡុង និង ក្រោយបញ្ចប់ពិធីបុណ្យចូលឆ្នាំខ្មែរ ដើម្បីជួយសម្រួលឲ្យប្រជាពលរដ្ឋ អាចទៅលេងស្រុកកំណើតបាន។ ក្រសួងសាធារណការ ក៏ស្នើឲ្យក្រុមហ៊ុនផ្តល់សេវាដឹកជញ្ជូនឲ្យគោរពតាមគោលការណ៍ ៤ ចំណុចសំខាន់ៗផងដែរ។
ចុះផ្សាយនៅថ្ងៃ៖
ស្តាប់ - ០២:០៩
ក្រសួងសាធារណការ នៅព្រឹកថ្ងៃទី ១០ មេសា នេះ បានស្នើឲ្យតំណាងក្រុមហ៊ុនដឹកជញ្ជូនពិចារណាក្នុងការមិនដំឡើងថ្លៃសំបុត្រពីទីក្រុងភ្នំពេញ ឆ្ពោះទៅកាន់បណ្តាខេត្តនានា ក្នុងឱកាសពិធីបុណ្យចូលឆ្នាំខ្មែរ ដែលនឹងប្រព្រឹត្តិទៅចាប់ពីថ្ងៃទី ១៤ ដល់ថ្ងៃ ទី ១៦ ខែ មេសា ខាងមុខនេះ។ ជាលទ្ធផល ក្រោយជំនួប តំណាងក្រុមហ៊ុនដឹកជញ្ជូនអ្នកដំណើរ ចំនួន ២៩ បានសន្យាថា នឹងមិនដំឡើងថ្លៃសំបុត្រនៅអំឡុង និងក្រោយពិធីបុណ្យចូលឆ្នាំថ្មី ដើម្បីជួយសម្រួលបន្ទុកចំណាយរបស់អ្នកធ្វើដំណើរ។
ក្រៅតែពីការអំពាវនាវកុំឲ្យក្រុមហ៊ុនដឹកជញ្ជូនអ្នកដំណើរដំឡើងថ្លៃសំបុត្រ ក្រសួងសាធារណការ និង ដឹកជញ្ជូន ក៏បានដាក់ចេញនូវគោលការណ៍ចំនួន ៤ ចំណុច សំដៅកាត់បន្ថយបន្ទុកចំណាយពលរដ្ឋ និងបញ្ចៀសនូវករណីគ្រោះថ្នាក់ចរាចរណ៍ឲ្យបានជាអតិបរមា។
គោលការណ៍ទាំង ៤ ចំណុច ដែលក្រសួងសាធារណការ និង ដឹកជញ្ជូន បានដាក់ចេញនោះ រួមមាន៖ រក្សាតម្លៃដឹកជញ្ជូនអ្នកដំណើរឲ្យនៅដដែល ទី២ មិនត្រូវផ្ទុកអ្នកដំណើរលើសចំណុះនិងខុសលក្ខណៈបច្ចេកទេស ទី៣ គោរពឲ្យបានខ្ជាប់ខ្ជួននូវច្បាប់ចរាចរណ៍ផ្លូវគោក ពិសេសមិនត្រូវបើកបរលើសល្បឿនកំណត់ និង ទី៤ បើកបរដោយភាពយោគយល់និង អធ្យាស្រ័យគ្នា។
សូមបញ្ជាក់ថា លោក នាយករដ្ឋមន្រ្តី ហ៊ុន សែន វិញ កាលពីសប្តាហ៍មុន ក៏បានអំពាវនាវឲ្យ ម្ចាស់ក្រុមហ៊ុនសេវាដឹកជញ្ជូនទាំងអស់ កុំឲ្យដំឡើងថ្លៃ ដើម្បីជួយសម្រួលឲ្យប្រជាពលរដ្ឋ អាចទៅជួបជុំគ្រួសារនៅស្រុកកំណើតបាន។ លោកនាយករដ្ឋមន្រ្តី ចាត់ទុកថា ការមិនដំឡើងថ្លៃហួសហេតុពេក គឺជាគុណធម៌មួយរបស់អ្នករកស៊ី។ បន្ថែមលើនេះ សាលារាជធានី ក៏អះអាងថា នឹងចេញលិខិតជូនដំណឹងទៅភាគីពាក់ព័ន្ធ ដើម្បីផ្សព្វផ្សាយបន្តពីការអំពាវនាវរបស់ប្រមុខរដ្ឋាភិបាលនេះ ក៏ប៉ុន្តែ អាជ្ញាធរនឹងមិនចាត់វិធានការ ដើម្បីកំណត់តម្លៃក្នុងកម្រិតណាមួយនោះទេ។
សូមជម្រាបជូនផងដែរ កាលពីសប្តាហ៍មុន ក្រុមហ៊ុនឯកជនមួយ បានប្រកាសថាធានាចេញថ្លែសំបុត្ររថយន្តក្រុង នាពេលបុណ្យចូលឆ្នាំខ្មែរ ចំនួន ៥០០០ សន្លឹក ដែលនឹងដោយឥតគិតថ្លៃ ដល់អ្នកដែលធ្វើដំណើរចេញពីរាជធានីភ្នំពេញ ឆ្ពោះទៅកាន់ស្រុកកំណើតចំនួន ១៤ ខេត្ត។ អ្នកចង់បានសំបុត្រទៅខេត្តក្រុងទាំង ១៤ នេះ អាចទៅយកពីស្តង់ នៅកោះពេជ្រ ចាប់ពីថ្ងៃទី៨ មេសា ម៉ោង ៨ ព្រឹក រហូតដល់ចែកអស់សំបុត្រ។ ឡានក្រុងទាំង ១០០ គ្រឿងនឹងដឹកអ្នកដំណើរចេញ ព្រមៗគ្នានៅម៉ោង ៩ ព្រឹក ថ្ងៃទី១២ មេសា ដោយចេញពីកោះពេជ្រ រាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ