ចប់ទស្សនកិច្ច លោក ហ៊ុន សែន នៅចិន៖ កម្ពុជា-ចិន ព្រមព្រៀងគ្នា១៤ចំណុច រួមទាំងប្រឆាំងឯករាជ្យភាពកោះតៃវ៉ាន់ផងដែរ
លោកនាយករដ្ឋមន្ត្រី ហ៊ុន សែន បានត្រលប់មកដល់ប្រទេសកម្ពុជាវិញហើយ នៅរសៀលថ្ងៃពុធនេះ បន្ទាប់ពីបញ្ចប់ដំណើរទស្សនកិច្ចជាផ្លូវការរយៈពេល៤ថ្ងៃនៅប្រទេសចិន។ ក្នុងអំឡុងទស្សនកិច្ចចាប់ពីថ្ងៃទី២០ដល់ថ្ងៃទី២៣ខែមករានេះ លោក ហ៊ុន សែន បានជួបជាមួយឥស្សរជន ជាន់ខ្ពស់ចិនសំខាន់ៗ ដូចជាលោកប្រធានាធិបតី ស៊ី ជីនពីង លោកនាយករដ្ឋមន្ត្រី លី ខឺឈាង លោក លីចាន់ស៊ូប្រធានសភាតំណាងប្រជាជនចិន ជាដើម។ ក្រៅពីនេះ ភាគីទាំងពីរ ក៏បានចុះហត្ថលេខាលើពិធីសារចំនួន៨ ហើយកម្ពុជាក៏ទទួលបានកាដូត្រលប់មកផ្ទះវិញចំនួន៦០០លានដុល្លារផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១២
បន្ទាប់ពីបញ្ចប់ទស្សនកិច្ចជាផ្លូវការរបស់លោកនាយករដ្ឋមន្ត្រី ហ៊ុន សែន នៅប្រទេសចិនរយៈពេល៤ថ្ងៃ គឺចាប់ពីថ្ងៃទី២០ ដល់ថ្ងៃ២៣ខែមករានេះ ភាគីទាំងពីរ កម្ពុជា-ចិន ក៏បានចេញសេចក្តីថ្លែងការណ៍រួម ដោយរួមមាន១៤ចំណុច។ ចំណុចសំខាន់ៗ ទាំងនោះមាន ការលើកឡើងជាថ្មីរបស់ចិន ពីការគោរពចំពោះឯករាជ្យភាព អធិបតេយ្យភាព និងបូរណភាពទឹកដីកម្ពុជា និងបានបញ្ជាក់ឡើងវិញពីការគាំទ្រចំពោះគោលនយោបាយឯករាជ្យ និងការអភិវឌ្ឍរបស់កម្ពុជាស្របទៅ នឹងផលប្រយោជន៍របស់ប្រជាជនកម្ពុជា។
ចិន និងកម្ពុជា បានឯកភាពគ្នាបន្តការទាក់ទងកម្រិតខ្ពស់កាន់តែជិតស្និទ្ធ និងបន្តរក្សាការប្រាស្រ័យទាក់ទងគ្នាឲ្យបានទាន់ពេលវេលាលើបញ្ហាសំខាន់ៗជាយុទ្ធសាស្ត្រ ដោយភាគីទាំងពីរ នឹងប្រើប្រាស់ឲ្យបានពេញលេញនូវតួនាទីរបស់គណៈកម្មាធិការសម្របសម្រួលអន្តររដ្ឋាភិបាលរវាងកម្ពុជា-ចិន ដើម្បីជំរុញការសម្របសម្រួលកិច្ចសហប្រតិបត្តិការជាក់ស្តែងលើគ្រប់វិស័យ។
ភាគីទាំងពីរបានឯកភាពគ្នាបង្កើនការផ្លាស់ប្ដូរ និងកិច្ចសហប្រតិបត្តិការក្នុងវិស័យការទូត ការពារជាតិ ការអនុវត្តច្បាប់ និងសន្តិសុខ ដោយភាគីទាំងពីរឯកភាពគ្នាកំណត់យកឆ្នាំ ២០១៩ ជាឆ្នាំនៃកិច្ចសហប្រតិបត្តិការអនុវត្តច្បាប់រវាងកម្ពុជា និងចិន។ ជាងនេះទៅទៀត ចិន និងកម្ពុជា បានឯកភាពគ្នាពន្លឿនការបន្ស៊ីគ្នា រវាងគំនិតផ្តួចផ្តើមខ្សែក្រវាត់ និងផ្លូវ យុទ្ធសាស្ត្រចតុកោណ និងអនុវត្តឲ្យបានពេញលេញនូវចំណុចគោលនៃផែនការរបស់រដ្ឋាភិបាលទាំងពីរ ដើម្បីរួមគ្នាជំរុញការកសាងខ្សែក្រវាត់សេដ្ឋកិច្ចផ្លូវសូត្រ និងផ្លូវសូត្រសមុទ្រសតវត្សទី ២។ ការជំរុញ ទំហំពាណិជ្ជកម្មទ្វេភាគីឲ្យកើនដល់ ១០ប៊ីលានដុល្លារ នៅឆ្នាំ២០២៣ ក៏ត្រូវបានលើកឡើងដោយកិច្ចព្រមព្រៀងនេះដែរ។
សេចក្តីប្រកាសរួមក៏បាននិយាយដែរថា ភាគីកម្ពុជាបានបញ្ជាក់សាជាថ្មីនូវការប្រកាន់ខ្ជាប់នូវគោលនយោបាយចិនមួយ ព្រមទាំងទទួលស្គាល់រដ្ឋាភិបាលចិន ជារដ្ឋាភិបាលស្របច្បាប់តែមួយគត់ តំណាងឲ្យប្រទេសចិនទាំងមូល ហើយតៃវ៉ាន់ជាផ្នែកសំខាន់មួយ នៃបូរណភាពដែនដីរបស់ចិន ហើយកម្ពុជាប្រឆាំងចំពោះការប្រកាសឯករាជ្យរបស់តៃវ៉ាន់គ្រប់ទម្រង់ ព្រមទាំងបន្តគាំទ្រការអភិវឌ្ឍដោយសន្តិភាពនូវទំនាក់ទំនងចិន និងតៃវ៉ាន់ និងបុព្វហេតុក្នុងការបង្រួបបង្រួមចិន ដែលភាគីចិនបានវាយតម្លៃយ៉ាងខ្ពស់ចំពោះការគាំទ្រខាងលើនេះ។
បន្ថែមពីនេះ ចិន និងកម្ពុជា សម្តែងនូវការពេញចិត្តចំពោះស្ថិរភាព និងការវិវត្តន៍ដ៏ប្រសើរនៃសភាពការណ៍នៅសមុទ្រចិនខាងត្បូង និងបានអំពាវនាវឲ្យភាគីពាក់ព័ន្ធ បន្តការអនុវត្តឲ្យពេញលេញ និងមានប្រសិទ្ធភាពនូវសេចក្តីថ្លែងការណ៍ស្តីពីការប្រតិបត្តិរបស់ភាគីនៅសមុទ្រចិនខាងត្បូង (DOC) ធ្វើឲ្យស៊ីជម្រៅនូវកិច្ចសហប្រតិបត្តិការវិស័យសមុទ្រជាក់ស្តែង និងលើកកម្ពស់ការពិគ្រោះយោបល់ស្តីពីក្រមប្រតិបត្តិនៅសមុទ្រចិនខាងត្បូង (COC)។
ជាងនេះទៅទៀត ភាគីកម្ពុជាវាយតម្លៃខ្ពស់ និងគាំទ្រសំណើរបស់ភាគីចិន ដែលស្នើឲ្យបញ្ចប់កិច្ចពិគ្រោះយោបល់សី្តពី COC ក្នុងរយៈពេល៣ឆ្នាំ ហើយនឹងសហការជាមួយភាគីពាក់ព័ន្ធដើម្បីរក្សាការវិវត្តន៍ជាវិជ្ជមាននៃកិច្ចពិគ្រោះយោបល់ ដោយឈរលើមូលដ្ឋានកុងសង់ស៊ីសទៅវិញទៅមក និងកសាងសមុទ្រចិនខាងត្បូងឲ្យទៅជាសមុទ្រសន្តិភាព មិត្តភាព និងកិច្ចសហប្រតិបត្តិការ។ រួមនឹងចំណុចសំខាន់ៗជាច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ