ថៃឃាត់ខ្លួនពលករខ្មែរខុសច្បាប់ជិត៧០០នាក់ បញ្ជូនត្រឡប់មកកម្ពុជា
ពលករខ្មែរប្រមាណ៧០០នាក់ ត្រូវបានក្រុមតម្រួតថៃ និងទាហានឈុតខ្មៅចាប់ឃាត់ខ្លួន ក្រោមហេតុផលថាពលករខ្មែរទាំងនោះ ធ្វើការងារក្នុងប្រទេសថៃ មិនស្របច្បាប់។ នេះបើតាមការចុះផ្សាយរបស់គេហទំព័រ អគ្គស្នងការនគបាលជាតិកាលពីថ្ងៃម្សិលមិញ។ ពលករខ្មែរទាំងនោះ ត្រូវបានអាជ្ញាធរថៃរកឃើញតាមចម្ការដំឡូង ចម្ការពោត និងចម្ការមៀន ក្នុងទឹកដីនៃប្រទេសថៃ។
ចុះផ្សាយនៅថ្ងៃ៖
ស្តាប់ - ០២:០២
គេហទំព័ររបស់អគ្គស្នងការនគបាលជាតិបានដកស្រង់របាយការណ៍ផ្លូវការ ដែលទូរទស្សន៍ប៉ុស្តិ៍លេខ៨ ថៃបានចាក់ផ្សាយថានៅថ្ងៃទី២៦ ខែ មេសា វេលាម៉ោង៤ល្ងាច លោកមេបញ្ជាការតម្រួត ខេត្តស្រះកែវ បានចុះទៅកាន់ ចំណុចទីលាន សាលាស្រុកវ៉ាំងណាំរ៉ន ក្នុងខេត្តស្រះកែវ បន្ទាប់ពីកំលាំងបានប្រមូលពលករខ្មែររាប់រយនាក់យកមក គ្រប់គ្រងនៅទីតាំងនេះ ។
ប្រភពដដែលបានឲ្យដឹងថាប្រតិបត្តិការនេះ គឺធ្វើឡើងដោយ ក្រុមតម្រួតព្រំដែន រួមជាមួយនឹងទាហានព្រំដែន បានចុះទៅកាន់បរិវេណចម្ការមួយកន្លែង ដែលជាកម្មសិទ្ធិរបស់ជនជាតិថៃ ស្ថិតក្នុង ខេត្តស្រះកែវ ដែលនៅទីនោះមានពលករខ្មែរមកសំងំលាក់ ខ្លួន ដើម្បីរង់ចាំរថយន្តមកទទួលយកទៅធ្វើការ នៅឯទីក្រុង បាងកក តាមការសន្យារបស់មេខ្យល់ដែលបានប្រមូលលុយ ពីពួកគេក្នុងម្នាក់ៗ ២,៥០០ បាតមុនរួចហើយ ។
នៅថ្ងៃទី២៨ ខែមេសានេះ វិទ្យុបារាំងអន្តរជាតិមិនអាចសុំការឆ្លើយតបពីក្រសួងការងារបានទេ។
លោកមឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់សង់ត្រាល់ បានបញ្ជាក់ថាមូលហេតុ ដែលពលករខ្មែរ ធ្វើការនៅប្រទេសថៃខុសច្បាប់ច្រើន ដោយសារតែនីតិវិធីក្នុងការជ្រើសរើស និងការបញ្ជូនពលករនៅមានភាពស្មុកស្មាញនៅឡើយ។
លោកបញ្ជាក់ថា ពលករដែលចង់ធ្វើការនៅក្រៅប្រទេសត្រូវរងចាំយូរ និងចំណាយច្រើន នៅពេលដែលចុះឈ្មោះជាមួយក្រុមហ៊ុន ហើយម្យ៉ាងទៀតនៅពេលដែលទៅដល់កន្លែងធ្វើការនោះ គឺលក្ខខណ្ឌរបស់ពលករខុសច្បាប់ និងពលករស្របច្បាប់គឺមានលក្ខណៈប្រហាក់ប្រហែលគ្នា ជាហេតុធ្វើឲ្យកម្មករជ្រើសរើសយកលក្ខខណ្ឌខុសច្បាប់។
នាយកប្រតិបត្តិមជ្ឈមណ្ឌលសម្ព័ន្ធភាពការងារបានស្នើឲ្យរដ្ឋាភិបាលកម្ពុជាធ្វើនីតិវិធីក្នុងការជ្រើសរើសពលករឲ្យសាមញ្ញ ទាំងលិខិតស្នាម ឯកសារផ្សេង និងមិនត្រូវឲ្យពលកររងចាំយូរពេកទេ។ លោកបន្ថែមថា រដ្ឋគួរតែដកបន្ទុករបស់ពលករលើថ្លៃសេវារកការងារធ្វើ ហើយតម្លៃនេះគឺគួរតែជាបន្ទុករបស់និយោជក និងកាត់បន្ថយអំពើពុករលួយនៅតាមក្រសួងមួយចំនួនដែលធ្វើការពាក់ព័ន្ធនឹងការបញ្ជូនពលករ។
សូមជម្រាបជូនថាកាលពីខែកុម្ភៈ កន្លងទៅប្រទេសថៃបានឯកភាពអនុញ្ញាតឲ្យគណៈកម្មការផ្តល់ភាពស្របច្បាប់កម្ពុជាចុះធ្វើការបើកផ្តល់លិខិតឆ្លងដែន លិខិតធ្វើដំណើរ និងប័ណ្ណពលករកម្ពុជាទៅធ្វើការនៅបរទេស(OCWC)ជូនពលករកម្ពុជា ដែលធ្វើការនៅតាមរោងចក្រ សហគ្រាស ដែលមានប្រើប្រាស់ពលករកម្ពុជាចាប់ពី៨០នាក់ឡើងដោយផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ