ប្រតិភូរដ្ឋសភាកម្ពុជាបានទៅដល់ទីក្រុងបាងកក ដើម្បីសួរសុខទុក្ខតំណាងរាស្រ្តបក្សប្រឆាំង
គណ:ប្រតិភូរដ្ឋសភាកម្ពុជា ដឹកនាំដោយលោក ឈាង វុន បានធ្វើដំណើរទៅដល់ទីក្រុងបាងកកប្រទេសថៃហើយ ដើម្បីសួរសុខទុក្ខអ្នកតំណាងរាស្រ្តគណបក្សប្រឆាំងពីររូប ដែលកំពុងសម្រាកព្យាបាលរបួសពីការវាយដំរបស់ក្រុមបាតុករ។ ក្រៅពីសួរសុខទុក្ខ រដ្ឋសភាកម្ពុជា ក៏បានធានារ៉ាប់រងលើថ្លៃព្យាបាលរបួសរបស់អ្នកតំណាងរាស្រ្តបក្សប្រឆាំង ទាំងពីររូបផងដែរ។
ចុះផ្សាយនៅថ្ងៃ៖
ស្តាប់ - ០១:៤៤
គណៈប្រតិភូរដ្ឋសភាកម្ពុជាដឹកនាំដោយលោក ឈាង វុន សមាជិកគណៈកម្មាធិការអចិន្រ្តៃយ៍និងជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនា និងព័ត៌មាននៃរដ្ឋសភា ដែលអមដំណើរដោយលោក យ៉ែម បុញ្ញឬទ្ធិ ប្រធានគណៈកម្មការទី៧នៃរដ្ឋសភា និងលោកស្រី បាន ស្រីមុំ បានធ្វើដំណើរទៅដល់ទីក្រុងបាងកកប្រទេសថៃ នៅថ្ងៃទី៧វិច្ឆិកានេះ ដើម្បីសួរសុខទុក្ខតំណាងរាស្រ្តគណបក្សប្រឆាំងពីររូប ដែលកំពុងសម្រាកព្យាបាលរបួស តាំងពីថ្ងៃទី២៧តុលាមក។
យោងតាមគណនីយហ្វេសបុករបស់ លោក ឈាង វុន ដែលមានភ្ជាប់រូបថតចំនួនបីសន្លឹកផង លោកឈាង វុន បានរៀបរាប់ថា ស្ថានភាពរបួសរបស់អ្នកតំណាងរាស្រ្តទាំងពីរូបនៅមិនទាន់ ធូស្រាលនៅឡើយទេ។ បើតាមការសរសេររបស់លោក ឈាង វុន លោកទាំងពីរ គឺលោក ញ៉យ ចំរើន និងលោក គង់ សភា មិនទាន់ត្រូវបានគ្រូពេទ្យអនុញ្ញាតឲ្យចាកចេញពីមន្ទីរពេទ្យនៅឡើយ ដោយសារលោកទាំងពីរនៅឈឺគ្រាំក្នុងទ្រូង និងបញ្ហាត្រចៀកនៅឈឺស្តាប់មិនទាន់ឮច្បាស់។
គួរជំរាបជូនថា លោក គង់ សភា តំណាងរាស្រ្តមណ្ឌលខេត្តស្វាយរៀង និងលោក ញ៉យ ចំរើន តំណាងរាស្រ្តមណ្ឌលខេត្តកំពង់ចាម ត្រូវបានបញ្ជូនទៅព្យាបាលរបួសនៅមន្ទីរពេទ្យផ្យាថៃ ប្រទេសថៃ ក្រោយពីក្រុមបាតុករបានវាយដំទៅលើរាងកាយនៅក្នុងបាតុកម្មទំលាក់លោក កឹម សុខា ពីតំណែងអនុប្រធានទី១នៃរដ្ឋសភាកាលពីថ្ងៃទី២៦តុលា។ ក្រោយពីអំពើហិង្សានេះ មានតែជនសង្ស័យតែ៣នាក់ប៉ុណ្ណោះ ដែលបានចេញមុខមកទទួលខុសត្រូវ។
នៅមុនពេលចេញដំណើរទៅទីក្រុងបាងកកប្រទេសថៃកាលពីថ្ងៃទី៦វិច្ឆិកា លោក ឈាង វុន បានថ្លែងថា អំពើហិង្សាលើអ្នកតំណាងរាស្ត្រទាំងពីររូប គឺជាអ្វីដែលគេមិនអាចអត់ឱនឲ្យបានឡើយ ព្រោះថា វាគឺជាការរំលោភទៅលើតំណាងរបស់ពលរដ្ឋ។
សូមបញ្ជាក់ថា គណៈប្រតិភូរដ្ឋសភាកម្ពុជា ដែលចាត់តាំងជាផ្លូវការដោយលោក ហេង សំរិនប្រធានរដ្ឋសភានេះ នឹងវិលត្រលប់មកដល់ប្រទេសកម្ពុជាវិញនៅថ្ងៃទី៨វិច្ឆិការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ