មេធាវីហុង សុខហ៊ួរ ត្រៀម១០លានរៀលសម្រាប់ការនៅក្រៅឃុំ
ថ្ងៃពុធ ទី៤ ខែវិច្ឆិកាខាងមុខនេះ តុលាកាសាលាឧទ្ធរណ៍នឹងបើកសវនាការសុំនៅក្រៅឃុំរបស់លោក ហុង សុខហួរ អតីតសមាជិកព្រឹទ្ធសភារបស់នៃគណបក្សសម រង្ស៊ី។ ក្នុងសវនាការលើកទី៣នេះ លោកហុង សុខហ៊ួរ ត្រៀមប្រាក់១០លានរៀលសម្រាប់ការសុំនៅក្រៅឃុំ។ តែយ៉ាងណាក៏ដោយ មេធាវីការពារក្តីថាគ្មានសង្ឃឹម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
មេធាវីការពារក្តីឱ្យលោក ហុង សុខហ៊ួរ បានឱ្យដឹងថាក្រុមគ្រួសារបានត្រៀមប្រាក់១០លានរៀលដើម្បីសុំការធានានៅក្រៅឃុំរបស់តំណាងរាស្ត្រគណបក្សប្រឆាំងមួយនេះ។ ប៉ុន្តែ មេធាវីការពារក្តីលោក ជួង ជូងី បានឱ្យដឹងនៅថ្ងៃទី២ វិច្ឆិកានេះថា លោកគ្មានសង្ឃឹមចំពោះការសុំដោះលែងឱ្យនៅក្រៅឃុំនេះទេ។ គ្មានសង្ឃឹមព្រោះថា រឿងក្តីនេះជារឿងនយោបាយ។ សវនាការថ្ងៃទី៤ វិច្ឆិកាខាងមុខនេះ គឺជាសវនការសុំនៅក្រៅឃុំលើកទី៣ហើយ បន្ទាប់ពីអាជ្ញាធរបានចាប់លោកហុង សុខហ៊ួរ ដាក់ពន្ធនាគារក្រោមបទចោទប្រកាន់៣ករណីគឺបទក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយនិងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
ទន្ទឹមនឹងការស្នើសុំនៅក្រៅឃុំ លោក នី ចរិយា ប្រធានផ្នែកស៊ើបអង្កេតនៃអង្គការអាដហុក មិនមានសុទ្ធិដ្ឋិនិយមចំពោះការស្នើសុំនោះទេព្រោះថា ស្ថានភាពនយោបាយនៅកម្ពុជានាពេលបច្ចុប្បន្ន គឺកំពុងតែតានតឹង។ បើតាមប្រធានផ្នែករូបនេះ ការដោះលែងណាមួយរបស់លោក ហុង សុខហ៊ួរ ត្រូវតែមានការសម្របសម្រួលនយោបាយជាមុនសិន។ បើទោះបីជារដ្ឋាភិបាលបង្ហាញពីភស្តុតាងនៃបទល្មើសរបស់លោកហុង សុខហ៊ួរ ក៏ដោយ ក៏លោកនី ចរិយា ចោទថា ការចាប់ខ្លួននេះគឺជារឿងនយោបាយ ហើយតុលាការស្ថិតនៅក្រោមឥទ្ធិពលនយោបាយរបស់រដ្ឋាភិបាល។
ដោយឡែកក្រសួងយុត្តិធម៌បានច្រានចោលការអត្ថាធិប្បាយនេះ ហើយបានជំរុញឱ្យមេធាវីការពារក្តីយកភស្តុតាងដើម្បីដោះបន្ទុក។ សូមកត់សំគាល់ថា លោកហុង សុខហ៊ួរ ត្រូវបានរដ្ឋាភិបាលចាប់ខ្លួនកាលពីថ្ងៃទី១៥ ខែសីហា បន្ទាប់ពីលោក បានអត្ថាធិប្បាយទៅលើកិច្ចព្រមព្រៀងព្រំដែនរវាងរដ្ឋាភិបាលកម្ពុជា និងវៀតណាមនៅឆ្នាំ១៩៧៩។ ជាការចាប់ខ្លួនក្រោយលោកនាយករដ្ឋមន្ត្រី បានប្រកាសពីបទល្មើសជាក់ស្តែង។
ក្នុងសំណុំរឿងសន្ធិសញ្ញាព្រំដែននេះ លោកនាយករដ្ឋមន្ត្រី ហ៊ុន សែន បានលើកឡើងកាលពីថ្ងៃទី២៥ តុលានៅទីក្រុងប៉ារីស ថាលោក សម រង្ស៊ី ប្រធានគណបក្សសង្គ្រោះជាតិអាចប្រឈមនឹងបញ្ហាផ្លូវច្បាប់នេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ