ជម្លោះសមុទ្រចិនខាងត្បូង គឺជាសំណុំរឿងចម្បងនៅក្នុងដំណើរ ទស្សនកិច្ចរដ្ឋមន្ត្រីការបរទេសចិន នៅកម្ពុជា
ជម្លោះសមុទ្រចិនខាងត្បូង គឺជាសំណុំរឿងចម្បងនៅក្នុងដំណើរ ទស្សនកិច្ចរដ្ឋមន្ត្រីការបរទេសចិន នៅកម្ពុជា។ លោក វ៉ាង យី បានធ្វើដំណើរមកដល់ប្រទេសកម្ពុជា នៅយប់ថ្ងៃព្រហស្បតិ៍ទី ២១ មេសា។ ក្នុងដំណើរទស្សនកិច្ច២ថ្ងៃនៅកម្ពុជាដែលបានបិទបញ្ចប់នៅថ្ងៃសុក្រ ទី២២ មេសា។ អ្វីដែលការកត់សម្គាល់ នេះគឺជាវត្តមានលើកទី១របស់លោក ចាប់តាំងពីលោក ប្រាក់ សុខុន បានផ្លាស់ប្តូរមុខដំណែងមកជារដ្ឋមន្រ្តីក្រសួងការបរទេសកម្ពុជា។ ដំណើរទស្សនកិច្ចនេះ ក៏នឹងជាឱកាសមួយដែរ ដើម្បីពង្រឹងបន្ថែមទំនាក់ទំនង និងកិច្ចសហប្រតិបតិ្តការណ៍រវាងចិន និងកម្ពុជា។អត្តបទដោយ ប៉ុន សោភ័ណ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ទស្សនកិច្ចរបស់រដ្ឋមន្ត្រីការបរទេសចិន លោក វ៉ាង យី នៅថ្ងៃទី ២១ ដល់ទី២២ មេសា នេះ គឺធ្វើឡើង ដើម្បីឆ្លើយតបទៅនឹងការអញ្ជើញរបស់លោកប្រាក់ សុខុន រដ្ឋមន្ត្រីក្រសួងការបរទេសកម្ពុជាថ្មី។ មិនខុសពីគម្រោង លោក រដ្ឋមន្ត្រីការបរទេសចិន នៅព្រឹកថ្ងៃទី ២២មេសានេះ បានជួបពិភាក្សាការងារជាមួយនឹងរដ្ឋមន្ត្រីការបរទេសខ្មែរ លោកប្រាក់ សុខុន នៅទីស្តីការក្រសួង។ នៅក្នុងសន្និសីទកាសែត លោក វ៉ាង យី បានសរសើរ គោលជំហរកម្ពុជា ដែលគាំទ្រគោលជំហរចិន លើការដោះស្រាយជម្លោះសមុទ្រចិនខាងត្បូង ដោយសន្តិវិធី ដែលស្របតាមច្បាប់អន្តរជាតិ។
ពាក់ព័ន្ធនឹងបញ្ហានេះដែរ លោក ប្រាក់ សុខុន រដ្ឋមន្ត្រីការបរទេសកម្ពុជា បានលើកឡើងថា កម្ពុជានៅតែប្រកាន់ជំហរអព្យាក្រឹត្យ មិនចូលបក្សសម្ព័ន្ធ ហើយស្នើភាគីពាក់ព័ន្ធឲ្យដោះស្រាយបញ្ហារួមគ្នា និងទ្វេរភាគីដោយសន្តិវិធីដដែល។ នៅក្នុងនោះមុនហ្នឹងបញ្ចប់កិច្ចពិភាក្សា លោក ប្រាក់ សុខុន បានថ្លែងប្រាប់អ្នកសារព័ត៌មានថា កម្ពុជា និងចិន បានប្តេជ្ញាបន្តពង្រឹងកិច្ចសហការលើវិស័យនយោបាយ សេដ្ឋកិច្ច អប់រំ ពាណិជ្ជកម្ម សុខាភិបាល វប្បធម៌ និងវិស័យទេសចរណ៍ទៀត ស្របតាម យុទ្ធសាស្ត្រគ្រប់ជ្រុងជ្រោយដែលចាប់ផ្តើមតាំងពីឆ្នាំ ២០១០ រហូតដល់បច្ចុប្បន្ន ដើម្បីពង្រឹង និងពង្រីកទំនាក់ទំនងទ្វេរភាគីបន្ថែមឡើង។
ចំណែកនៅរសៀលថ្ងៃទី២២ មេសា ដដែល ថ្លែងប្រាប់អ្នកសារព័ត៌មាន នាទីស្តីការគណៈរដ្ឋមន្ត្រី បន្ទាប់ពីជំនួបជាមួយលោក វ៉ាង យី លោកឧបនាយករដ្ឋមន្ត្រី ហោ ណាំហុង បានមានប្រសាសន៍ថា គ្រប់ភាគីត្រូវទៅមើលអនុសញ្ញានៃរដ្ឋភាគីក្នុងជម្លោះសមុទ្រចិនខាងត្បួង DOC ឡើងវិញ។ លោកថា “ចំពោះបញ្ហាជម្លោះសមុទ្រចិន ខាងត្បូងនេះ គ្មានដំណោះស្រាយណាល្អ ក្រៅពីការចរចានោះទេ” ។ គួរកត់សម្គាល់ថា ជម្លោះដ៏រ៉ាំរ៉ៃនៃសមុទ្រចិនប៉ែកខាងត្បូង មិនមែនគ្រាន់តែជាជម្លោះដោយឡែករវាងចិន និងបណ្តាប្រទេសអាស៊ានមួយចំនួនតែប៉ុណ្ណោះទេ ប៉ុន្តែ វាក៏ជាបញ្ហាតំបន់ទាំងមូលដែរ។ ចូរកុំភ្លេចថា ជម្លោះដែលស្ទើរតែផ្ទុះសង្គ្រាមជាច្រើនលើកទៅហើយនោះ កំពុងតែគំរាមកំហែងយ៉ាងខ្លាំងដល់សន្តិសុខ និងស្ថិរភាពសេដ្ឋកិច្ចក្នុងតំបន់។
ចុងក្រោយនៃជំនួបរវាង លោក វ៉ាង យី និងលោកនាយករដ្ឋមន្រី្ត ហ៊ុន សែន នៅល្ងាចនេះគឺបានបញ្ចប់ទៅដោយលទ្ឋផលល្អ ហើយលោកនាយករដ្ឋមន្ត្រី ហ៊ុន សែន ក៏បានផ្តាំផ្ញើសួរសុខទុក្ខលោកនាយករដ្ឋមន្ត្រី Li Keqiang និងលោកប្រធានាធិបតី Xi Jinping ផងដែរ និងអរគុណ មហាមិត្តចិនដែលតែងតែចាត់ទុកកម្ពុជាជាបងប្អូន។
គួរជម្រាបជូនថា លោក វ៉ាង យី ធ្លាប់បានមកធ្វើទស្សនៈកិច្ចនៅកម្ពុជាម្តងហើយ កាលពីឆ្នាំ ២០១៣ ។ ឯទស្សនកិច្ចលើកនេះ លោកសង្កេតឃើញថា ប្រទេសកម្ពុជាកាន់តែរីកចម្រើនទៅមុខគួរឱ្យកត់សម្គាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ