កងនាវាកម្ពុជា-ចិន ផ្តើមធ្វើសមយុទ្ធជាលើកដំបូងលើសមុទ្រកម្ពុជា ខណៈមានភាពតានតឹងនៅសមុទ្រចិនខាងត្បូង
កងនាវាកងទ័ពប្រជាជនចិន និងកងទ័ពជើងទឹកកម្ពុជា បានផ្តើមធ្វើលំហាត់សមយុទ្ធរួមគ្នាជាលើកដំបូងកាលព្រឹកថ្ងៃទី២៦កុម្ភៈនេះ។ លំហាត់សមយុទ្ធនេះ ត្រូវបានធ្វើឡើងនៅលើលំហរសមុទ្រកម្ពុជា ប៉ុន្តែមន្រ្តីជាន់ខ្ពស់កម្ពុជាមិនបានផ្តល់របាយការណ៍លំអិតនៃលំហាត់សមយុទ្ធនេះទេ។ ជាការកត់សំគាល់ លំហាត់សមយុទ្ធកងនាវាកម្ពុជា-ចិន នៅពេលនេះបានធ្វើឡើង ចំពេលមានភាពតានតឹងនៅសមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
បើតាមការអះអាងរបស់មន្រ្តីកងទ័ពជើងទឹកកម្ពុជា ដែលនិយាយក្នុងលក្ខ័ណ៍សុំមិនបញ្ចេញឈ្មោះបានឲ្យដឹងថា គម្រោងនៃលំហាត់ហ្វឹកហ្វឺនរួមគ្នារវាងកងនាវាកងទ័ពប្រជាជនចិន និងកងនាវាកម្ពុជា ត្រូវបានរៀបចំធ្វើឡើងទៅតាមគម្រោងនៅថ្ងៃនេះ ដោយមិនមានការប្រែប្រួលនោះទេ។ ប៉ុន្តែសមយុទ្ធដែលធ្វើឡើងនៅលើផ្ទៃទឹកសមុទ្រកម្ពុជា ដោយមានការចូលរួមពីកងនាវិកកម្ពុជាចំនួន៧០នាក់ និងកងនាវឹកចិនចំនួន៧៣៧នាក់ មិនបានបើកទូលាយដល់ សាធារណជនទូទៅនិងអ្នកសារព័ត៌មាន បានដឹងនិងបានឃើញនោះទេ។
សូមបញ្ជាក់ថា កងនាវាជើងទឹកប្រជាជនចិនចំនួន ០៣គ្រឿង ដែលផ្ទុកនាវឹកចំនួន៧៣៧នាក់ បានចូលមកចតនៅកំពង់ផែអន្តរជាតិក្រុងព្រះសីហនុកាលពីព្រឹកថ្ងៃទី២២ ខែកុម្ភៈ ឆ្នាំ២០១៦ ដើម្បីបំពេញទស្សនកិច្ច រយៈពេល៥ថ្ងៃ នៅកម្ពុជា ចាប់ពីថ្ងៃទី២២ រហូតដល់ថ្ងៃទី២៦ ខែកុម្ភៈនេះ។ នាវាទាំងបីគ្រឿងនោះ គឺជាប្រភេទនាវាចំបាំង ដែលមានបណ្តោយពី១៣៥ម៉ែត្រ រហូតដល់១៩១ម៉ែត្រ។
នៅក្នុងជំនួបជាមួយនឹងលោកនាយករដ្ឋមន្រ្តីហ៊ុន សែន កាលពីថ្ងៃទី២៤កុម្ភៈ លោកឧត្តមនាវីទោ យូ ម៉ាន់ជាំង (Yu Manjiang) នាយរងសេនាធិការនិងជាមេបញ្ជាការប្រចាំការសមុទ្រចិនខាងត្បូង របស់កងទ័ពជើងទឹកប្រជាជនចិន បានថ្លែងថា ក្នុងពេលស្នាក់នៅកម្ពុជារយៈពេល៥ថ្ងៃនេះ ក្បួននាវារបស់លោក បានធ្វើការហ្វឹកហ្វឺនជាមួយនឹងកងទ័ពជើងទឹករបស់កម្ពុជា ទាំងនៅលើដែនគោក និងទាំងនៅលើផ្ទៃសមុទ្រ។
គួរកត់សម្គាល់ថា ការហ្វឹកហ្វឺនរួមគ្នារវាងកងនាវាកងទ័ពនៃប្រទេសទាំងពីរនៅពេលនេះ បានធ្វើឡើង ចំពេលមានភាពតានតឹងនៅសមុទ្រចិនខាងត្បូង។ បើតាមគម្រោង ក្រោយពីបញ្ចប់លំហាត់សមយុទ្ធជាមួយកងនាវាកម្ពុជាហើយ កងនាវាកងទ័ពប្រជាជនចិនប្រចាំការនៅសមុទ្រចិនខាងត្បូងទាំងបីគ្រឿង នឹងចាកចេញពីកម្ពុជាភ្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ