កម្ពុជាបន្តរក្សាជំហរឈរនៅកណ្ដាលក្នុងវិវាទសមុទ្រចិនខាងត្បូង
ជំហររបស់កម្ពុជាគឺនៅដដែលគឺចង់ឃើញចិននិងប្រទេសក្នុងតំបន់អាស៊ានរក្សាទំនាក់ទំនងល្អជាមួយគ្នាទាក់ទងវិវាទសមុទ្រចិនខាងត្បូង។ ជំហរនេះត្រូវបានបញ្ជាក់នៅក្នុងជំនួបរវាង រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និង លោក Xu Bu ឯកអគ្គរដ្ឋទូតចិនប្រចាំអាស៊ាននៅទីក្រុងទីហ្សាកាតានៅព្រឹកថ្ងៃអង្គារនេះ។
ចុះផ្សាយនៅថ្ងៃ៖
ស្តាប់ - ០១:៣១
បើកាលណាប្រទេសចិន និង ប្រទេសក្នុងតំបន់អាស៊ានមានទំនាក់ទំនងល្អជាមួយគ្នាភាគីទាំងពីរនឹងហុចផលល្អទៅដល់តំបន់អាស៊ីអាគ្នេយ៍ជម្រុញឲ្យមានកំណើនសេដ្ឋកិច្ចយូរអង្វែង។ សម្រាប់កម្ពុជាបានឃើញថាប្រសិនភាគីទាំងពីរមានជម្លោះជាមួយគ្នាផលអាក្រក់ដែលទទួលបានគឺទំនាក់ទំនងសេដ្ឋកិច្ចនឹងមានភាពរអាក់រអួល។
ដូច្នេះក្នុងនាមជាប្រទេសជាអាស៊ានមួយដែរគឺកម្ពុជាចង់ឲ្យភាគីចិន និង ប្រទេសក្នុងអាស៊ាន សម្របសម្រួលគ្នា ធ្វើយ៉ាងណាដោះស្រាយបរិយាកាសនៃជម្លោះស្ថិតនៅក្នុងការចរចាដោយសន្តិវិធី។ នេះជាការបញ្ជាក់របស់ លោក ចែម វីឌ្យ៉ា អនុរដ្ឋលេខាធិការ ក្រសួងការបរទេស កម្ពុជា ទទួលបន្ទុកកិច្ចការ អាស៊ាន ។ ចំពោះទំហំសេដ្ឋកិច្ចចិននិងអាស៊ានមានការកើនឡើងចន្លោះពី៥០ពាន់លានទៅ១០០ពាន់លានដុល្លារ។
សូមបញ្ជាក់ថា ចិនកំពុងមានវិវាទរឿងសមុទ្រចិនខាងត្បូងជាមួយប្រទេស ហ្វីលីពីន និងវៀតណាម ជាដើម ដោយភាគីទាំងសង់ខាងសុទ្ធតែបានអះអាងជាម្ចាស់កម្មសិទ្ធដែនទឹករៀងៗខ្លួន។
ដោយឡែកកម្ពុជាបានអះអាងដោយខ្លួនឯងថា នយោបាយការបរទេសកម្ពុជាវិញមិនដែលមានការរើសអើងជាមួយប្រទេសណាមួយនោះទេក្នុងពិភពលោក ហើយជាពិសេសនោះទំនាក់ទំនងកាទូតជាមួយប្រទេសមហាអំណាច អាមេរិក ចិន រុស្ស៊ី បារាំង អង់គ្លេសជាដើម។
ទោះជានាពេលបច្ចុប្បន្ននេះ គេកំពុងសម្លឹងមើលឃើញកម្ពុជានិងចិនកំពុងមានទំនាក់ទំនងជិតស្និទ្ធក៏ដោយគឺរូបភាពនេះ មិនមែនមានន័យថាកម្ពុជាបោះបង់ចោលទំនាក់ទំនងជាមួយប្រទេសមហាអំណាចដទៃ ស្រវ៉ាចាប់តែចិនម្ខាងនោះទេ។ ដោយឡែកចំពោះជំនួបរវាងប្រមុខកាទូតនិងលោក Xu Bu នៅព្រឹកនេះគឺចិនបានអរគុណកម្ពុជាដែលបានបន្តការគាំទ្រខ្លួននៅលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ