អ្នកនេសាទហ្វីលីពីន ដាក់ញត្តិ ទៅអ.ស.ប. រឿងចិនហាមឃាត់ការនេសាទ
ប្រជានេសាទហ្វីលីពីន បានដាក់ញត្តិ ទៅកាន់ឧត្តមស្នងការការពារសិទ្ធិមនុស្ស របស់អង្គការសហប្រជាជាតិ ព្រមទាំងទៅទីស្នាក់ការអង្គការសហប្រជាជាតិនៅក្រុងហ្ស៊ឺណែវ ផ្ទាល់តែម្តង ដើម្បីទាមទារឲ្យអង្គការកំពូលនេះ ដោះស្រាយបញ្ហា ដែលចិនរំលោភបំពាន ដែនទឹករបស់ហ្វីលីពីន ដោយបានហាមឃាត់ អ្នកនេសាទហ្វីលីពីន មិនឲ្យធ្វើការនេសាទ នៅក្បែរកោះ ស្ការបូរូក។ ចិនដែលប្រកាសថា ៩០%នៃដែនសមុទ្រចិនខាងត្បូង គឺជារបស់ខ្លួន កំពុងតែបង្កឲ្យមានវិបត្តិការទូត ជាមួយប្រទេសជិតខាង ហើយវិបត្តិនេះ អាចក្លាយជាការប្រឈមមុខតាមផ្លូវអាវុធ គ្រប់ពេលវេលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ប្រជានេសាទហ្វីលីពីន ប្រមាណជា៣០នាក់ បានធ្វើញត្តិមួយច្បាប់ ដែលមានកម្រាស់២២ទំព័រ តាមរយៈមេធាវីរបស់ពួកគេ ដើម្បីផ្ញើរទៅកាន់ ឧត្តមស្នងការការពារសិទ្ធិមនុស្ស និងទីស្នាក់ការអង្គការសហប្រជាជាតិ ដែលមានទីតាំងនៅក្រុងហ្ស៊ឺណែវប្រទេសស្វីស។ ជាខ្លឹមសារ នៅក្នុងញត្តិនេះ ប្រជានេសាទហ្វីលីពីន បានសុំឲ្យអង្គការសហប្រជាជាតិ ចាត់វិធានការហាមឃាត់អាជ្ញាធរចិន ដែលកំពុងតែធ្វើសកម្មភាពរំលោភច្បាប់ លើដែនទឹករបស់ហ្វីលីពីន ដោយបានរុញច្រានទូកនេសាទរបស់ហ្វីលីពីន មិនឲ្យនេសាទនៅម្តុំកោះស្ការបូរូក (Scarborough) ដែលស្ថិតក្នុងសមុទ្រចិនខាងត្បូង។
នៅក្នុងញត្តិបានសរសេរផងដែរថា ទង្វើររបស់អាជ្ញាធរចិន មិនមែនគ្រាន់តែជាការរំលោភលើអធិបតេយ្យភាពដែនទឹក របស់ហ្វីលីពីនប៉ុណ្ណោះទេ វាថែមទាំងជាអំពើរំលោភសិទ្ធិមនុស្ស សិទ្ធិក្នុងការប្រកបរបរចិញ្ចឹមជីវិត ដោយសុចរិតទៀងត្រង់ របស់ប្រជាជនហ្វីលីពីន។ ដូច្នេះការហាមឃាត់ ពីសំណាក់អាជ្ញាធរ នៃប្រទេសណាមួយទៀត គឺជាការរំលោភសិទ្ធិមនុស្សទាំងស្រុង។
សូមបញ្ជាក់ផងដែរថា កោះស្ការបូរូកស្ថិតនៅចម្ងាយប្រមាណជា ២២០គីឡូម៉េត្រប៉ុណ្ណោះ ពីប្រជុំកោះលុយសុង (Luçon) ដែលជាប្រជុំកោះ ដែនដីរបស់ហ្វីលីពីន។ អាជ្ញាធរហ្វីលីពីន បានអះអាងម្តងហើយម្តងទៀតថា តាមផ្លូវច្បាប់ កោះស្ការបូរូក គឺស្ថិតនៅក្នុងតំបន់សេដ្ឋកិច្ចផ្តាច់មុខ របស់ហ្វីលីពីន។ ប៉ុន្តែទោះបីជាយ៉ាងណា ចិនដែលដែលមានឆ្នេរសមុទ្រ ចំងាយ ៦៥០គីឡូម៉េត្រ ពីកោះនេះ បានទាមទារថា កោះស្ការបូរូក ស្ថិតក្នុងដែនអធិបតេយ្យរបស់ខ្លួន ទៅវិញ។
យ៉ាងណាមិញ កោះស្ការបូរូក របស់ហ្វីលីពីននេះ មិនមែនជាករណីតែមួយ ដែលសបញ្ជាក់ពីមហិច្ឆិតារបស់មហាយក្សចិននោះទេ ពោលគឺចិនបានទាមទារដែនទឹក ស្ទើរតែទាំងស្រុង នៅក្នុងសមុទ្រចិនខាងត្បូង ថាជារបស់ខ្លួន។ ចិនដែលមានអំណាច និងសមត្ថភាព បានចាប់ផ្តើមសាងសង់កោះសិប្បនិម្មិត ដោយបានបូមខ្សាច់ចាក់បំពេញ រវាងចន្លោះកោះតូចៗ នៅប្រជុំកោះសប្រាតឡីយ៍ (Spratley) ហើយបានសាងសង់កំពង់ផែ និងព្រលានយន្តហោះ នៅលើនោះទៀតផង។ ប្រជុំកោះ សប្រាតឡីយ៍ នេះ បើគិតតាមច្បាប់អន្តរជាតិ គឺត្រូវស្ថិតជាតំបន់ឆ្លងកាត់អន្តរជាតិ ដោយមិនអាចចាត់ជារបស់ប្រទេសណាមួយបានទេ។
ទង្វើក្អេងក្អាងរបស់ចិន បានបង្កជាការក្តៅក្រហាយ ជាមួយប្រទេសជិតខាង មានដូចជាវៀតណាម ហ្វីលីពីន ម៉ាឡេស៊ី និងជប៉ុនជាដើម។ ប៉ុន្តែទោះបីជាយ៉ាងណា ការប្រឈមមុខដោយផ្លូវអាវុធ ជាមួយនឹងចិន គឺវាមិនខុសពីយក ពងមាន់ទៅជល់នឹងថ្មនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ