ជម្លោះសមុទ្រចិនខាងត្បូង៖ ចិនប្រាប់អាមេរិកកុំឲ្យកាន់ជើងតែម្ខាងៗ
ទីក្រុងប៉េកាំង អំពាវនាវកុំឲ្យអាមេរិក ចូលកាន់ជើង ភាគីណាមួយ នៃជម្លោះនៅសមុទ្រចិនខាងត្បូង។ តាមកាសែតរដ្ឋចិន ចុះផ្សាយ នៅថ្ងៃចន្ទ ទី ២០ កក្កដា ក្រសួងការពារជាតិចិន បានចេញសេចក្តីថ្លែងការណ៍ រំលឹកអាមេរិក បន្ទាប់ ពីឧត្តមនាវីអាមេរិកប្រចាំប៉ាស៊ីហ្វិក ជិះយន្តហោះពិនិត្យមើលពីលើតំបន់ជម្លោះ សមុទ្រចិន ខាងត្បូង កាលពីថ្ងៃសៅរ៍។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍ ដែលដកស្រង់ និងចុះផ្សាយដោយកាសែតរដ្ឋចិន ក្រសួងការពារជាតិចិនអំពាវនាវឲ្យអាមេរិកធ្វើសកម្មភាពទាំងឡាយណាដែលជំរុញ ឲ្យសន្តិភាព និងស្ថិរភាពនៅក្នុងតំបន់ គឺមិនមែនធ្វើផ្ទុយនោះទេ។ លើសពីនោះ ក្រសួងការពារចិនសង្ឃឹមថា អាមេរិកនឹងចូលកាន់ជើង ភាគីណាមួយ នៅក្នុងជម្លោះនៅ សមុទ្រចិនខាងត្បូងទេ។
វិបសៃតិ៍របស់កងទ័ពជើងទឹកអាមេរិកប្រចាំនៅប៉ាស៊ីហ្វិកបានចុះផ្សាយកាលពីថ្ងៃអាទិត្យថា ឧត្តមនាវីអាមេរិក លោកស្កុត ស្វីហ្វបានធ្វើបេសកកម្មត្រួតពិនិត្យដែនទឹក រយៈពេល ៧ម៉ោង ដោយបានជិះយន្តហោះ ក្រវែលពីលើសមុទ្រចិនខាងត្បូង ដែលចិនកំពុងឈ្លោះដណ្តើមគ្នា ជាមួយប្រទេសចំនួន ៤របស់អាស៊ាន។ នៅថ្ងៃសៅរ៍ដដែល ឧត្តមនាវីអាមេរិកប្រចាំប៉ាស៊ីហ្វិក បានធ្វើដំណើរទស្សនកិច្ច នៅប្រទេសសម្ព័ន្ធមិត្តហ្វីលីពីន ដែលកំពុងជាប់មានជម្លោះជាមួយចិន នៅសមុទ្រចិនខាងត្បូង។
ទីក្រុងម៉ានីលបានស្វាគម អបអរដំណើរហោះត្រួតល្បាតរបស់ឧត្តមនាវីអាមេរិក នៅលើសមុទ្រចិនខាងត្បូង។ ហ្វីលីពីនដែលប្រឈមខ្លាំងជាងគេ នឹងចិន នៅក្នុងជម្លោះដណ្តើមដែនទឹក នៅសមុទ្រចិនខាងត្បូង បានប្រកាស កាលពីថ្ងៃចន្ទ ម្សិលមិញថា ខ្លួនកំពុងគិតគូរ បញ្ជូនយន្តហោះចម្បាំង (FA 50) និងនាវាចម្បាំង ឲ្យទៅប្រចាំការ នៅច្រកសមុទ្រ Subic អតីតមូលដ្ឋានទ័ពអាមេរិក ដែលស្ថិតនៅ ប្រមាណតែ ២០០គីឡូម៉ែត្រប៉ុណ្ណោះ ពីដែនទឹកមានជម្លោះជាមួយ ចិន។
តាមលោកអារសេនីញ៉ូ អង់ដូឡុង ប្រធានកិច្ចការសាធារណៈនៃនាយកដ្ឋាន ការពារជាតិហ្វីលីពីន យន្តហោះចម្បាំងពីរគ្រឿងក្នុងចំណោម១២គ្រឿងនឹងត្រូវបញ្ជូន នៅចុងឆ្នាំនេះ ឲ្យទៅប្រចាំការ នៅមូលដ្ឋានទ័ពនៅច្រកសមុទ្រ Subic។ តាមមន្រ្តីយោធាហ្វីលីពីន គឺជម្លោះ នៅសមុទ្រចិនខាងត្បូង និងការរំលោភរបស់ចិន យកប្រជុំកោះ ស្កាបូរ៉ូរបស់ហ្វីលីពីន កាលពីឆ្នាំ ២០១២ ដែលជំរុញឲ្យកងទ័ពហ្វីលីពីន តាំងទីមូលដ្ឋានទ័ព ជាលើកទី១នៅ Subic។
ហ្វីលីពីន កាលពីសប្តាហ៍មុនបានប្រកាសជួលទឹកដីមួយផ្នែកនៃច្រកសមុទ្រ Subic ដើម្បីយកទៅធ្វើជាមូលដ្ឋានទ័ព។ ច្រកសមុទ្រ Subic ដែលបែរមុខទៅរកសមុទ្រចិនខាងត្បូង ធ្លាប់ជាមូលដ្ឋានទ័ពដ៏ធំជាងគេរបស់អាមេរិកនៅបរទេស។ ដោយសារបាតុកម្មរបស់ប្រជាជនហ្វីលីពីន ប្រឆាំងអាមេរិក នៅឆ្នាំ ១៩៩២ អាមេរិកប្រគល់មូលដ្ឋានទ័ពនេះ ទៅឲ្យរដ្ឋាភិបាលហ្វីលីពីន ដែលក្រោយមកបានក្លាយជាកំពង់ផែពាណិជ្ជកម្មធំមួយរបស់ហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ