តើជម្ងឺបាក់ស្បាត កំពុងកើតមានទៅលើគណបក្សប្រឆាំង?
ចុះផ្សាយនៅថ្ងៃ៖
ស្តាប់ - ០៣:៥៣
ការគំរាមធ្វើបាតុកម្មប្រឆាំងនឹងបាតុកម្មនៅទីក្រុងភ្នំពេញ របស់ក្រុមយុវជនដែលអះអាងថា ជាអ្នកគាំទ្រគណបក្សកាន់អំណាចកាលពីថ្ងៃទី១៥និងទី១៦កុម្ភៈ ពិតជាមានប្រសិទ្ធិភាពក្នុងការធ្វើឲ្យគណបក្សប្រឆាំងនៅកម្ពុជា ភិតភ័យមិនតិចនោះទេ។ គេអាចចាត់ទុកថា នេះគឺជាជោគជ័យមួយរបស់ពួកគេ។ ប៉ុន្តែយ៉ាងណាក៏ដោយ សម្រាប់គណបក្សប្រឆាំង សុវត្ថិភាពគឺជារឿងសំខាន់។ ហើយវា ក៏ស្របទៅនឹងគោលនយោបាយថ្មីរបស់គណបក្សនេះ ដែលប្រកាន់យកឥរិយាបថ មិនឆ្លើយ មិនតប នោះដែរ។ យ៉ាងណាក៏ដោយ មានការចោទជាសំណួរថា តើពេលនេះគណបក្សប្រឆាំងដ៏ធំនៅកម្ពុជា កំពុងតែមានជម្ងឺបាក់ស្បាត?
រូបភាពនៃអំពើហិង្សាទៅលើអ្នកតំណាងរាស្រ្តពីររូបរបស់គណបក្សប្រឆាំងកាលពីឆ្នាំមុន ពិតជាបាននឹងកំពុងតាមលងបន្លាច និងតាមបំបាក់ស្មារតីរបស់សកម្មជន និងថ្នាក់ដឹកនាំគណបក្សសង្រ្គោះជាតិមិនតិចនោះទេ។ ជាក់ស្តែង ព្រឹត្តិការណ៍កាលពីថ្ងៃទី១៦កុម្ភៈ បានស្តែងឲ្យឃើញថា គណបក្សប្រឆាំងបានរក្សាភាពស្ងៀមស្ងាត់ ចំពោះការគំរាមកំហែងធ្វើបាតុកម្មតបតរបស់ក្រុមយុវជនដែលហៅខ្លួនឯងថា សម្ព័ន្ធយុវជនអ្នកគាំទ្រគណបក្សកាន់អំណាច ដើម្បីឈានទៅរំលាយគណបក្សសង្រ្គោះជាតិ ប្រសិនបើមានការធ្វើបាតុកម្មនៅអាមេរិកប្រឆាំងនឹងវត្តមានរបស់លោកនាយករដ្ឋមន្រ្តី ហ៊ុន សែន ដែលក្រុមយុវជននេះចាត់ទុកថា គឺជាបាតុកម្មដែលរៀបចំឡើងដោយគណបក្សប្រឆាំង។
ជាការពិត បាតុកម្មនៅអាមេរិកបានកើតមានមែន តែបាតុកម្មនៅភ្នំពេញបែរជាស្ងប់ស្ងាត់ទៅវិញ ពោលគឺមិនដូចជាការព្រមានរបស់ក្រុមសម្ព័ន្ធយុវជនដែលអះអាងថា ជាអ្នកគាំទ្រគណបក្សប្រជាជនកម្ពុជានោះទេ។ យ៉ាងណាក៏ដោយចុះ គេអាចនិយាយបានម្យ៉ាងទៀតថា ការគំរាមរបស់ក្រុមយុវជនដែលគាំទ្រគណបក្សប្រជាជនកម្ពុជា ដោយមានការផ្សព្វផ្សាយតាមរយៈហ្វេសបុកនិងបន្ទរដោយប្រព័ន្ធឃោសនាដែលគាំទ្ររដ្ឋាភិបាលនោះ គឺគ្រាន់តែជាការកម្លាគណបក្សប្រឆាំង ថាតើ គណបក្សប្រឆាំងដែលអះអាងថា ទិញមិនលក់ សម្លុតមិនខ្លាច នោះ នឹងទៅជាយ៉ាងណា?
ជាក់ស្តែង ការពិតបង្ហាញហើយថា គណបក្សប្រឆាំងពិតជាភិតភ័យមែន ព្រោះគេបានឃើញគណបក្សប្រឆាំងបានរត់រកកិច្ចអន្តរាគមន៍ពីក្រសួងមហាផ្ទៃជាបន្តបន្ទាប់ ដើម្បីការពារសុវត្ថិភាពរបស់សកម្មជននិងថ្នាក់ដឹកនាំរបស់ខ្លួន។ ហេតុដូច្នេះហើយ បានជាភ្លាមៗនោះ គេបានឃើញប្រធានក្រុមសម្ព័ន្ធយុវជនអ្នកគាំទ្រគណបក្សប្រជាជនកម្ពុជា បានចេញមុខ សើចចំអកទៅដល់គណបក្សប្រឆាំង និងបានចោទជាសំណួរថា ឯណាទៅពាក្យថា ទិញមិនលក់ សម្លុតមិនខ្លាច របស់គណបក្សប្រឆាំងនោះ?
យ៉ាងណាក៏ដោយ រូបភាពនៃអំពើហិង្សា ដែលបានកើតឡើងមកលើគណបក្សប្រឆាំង និងសកម្មជនអ្នកការពារសិទ្ធិមនុស្ស ចាប់តាំងពីក្រោយការបោះឆ្នោតជាតិ នៅខែកក្កដាឆ្នាំ២០១៣មកនោះ គឺពិតជាកំពុងតាមលងបន្លាច និងពិតជាបានកំពុងធ្វើឲ្យគណបក្សប្រឆាំងបាក់ស្បាតមែនរឺទេ?
ការធ្វើទុក្ខបុកម្នេញមកលើគណបក្សប្រឆាំង ចាប់តាំងពីក្រោយការបោះឆ្នោតជាតិនៅខែកក្កដាឆ្នាំ២០១៣ ដូចជា ការកាត់ទោសសកម្មជនគណបក្សប្រឆាំង១១នាក់ឲ្យជាប់ពន្ធនាគារពី៧ទៅ២០ឆ្នាំពីបទចូលរួមនឹងដឹកនាំកុប្បកម្មរំដោះទីលានប្រជាធិបតេយ្យ, ការចាប់ខ្លួនសមាជិកព្រឹទ្ធសភាគណបក្សប្រឆាំងលោក ហុង សុខហួរ, បណ្តឹងចោទប្រកាន់ទៅលើប្រធានគណបក្សប្រឆាំងលោក សម រង្ស៊ី, ព្រឹត្តិការណ៍បាតុកម្មប្រឆាំងបាតុកម្ម ដើម្បីទម្លាក់លោក កឹម សុខា ចេញពីអនុប្រធានទី១នៃរដ្ឋសភា, និងសកម្មភាពហិង្សាវាយដុំទៅលើអ្នកតំណាងរាស្រ្តរបស់ខ្លួន, រួមទាំងការធ្វើទុក្ខបុកម្នេញទៅលើសកម្មជនគណបក្សប្រឆាំងនិងសកម្មជនសិទ្ធិមនុស្សផ្សេងៗទៀត ពិតជាបានដក់ជាប់នៅក្នុងអារម្មណ៍របស់សកម្មជននិងគណបក្សប្រឆាំង ឲ្យបាក់ស្បាត និងមានការប្រុងប្រយ័ត្នខ្ពស់ មុននឹងធ្វើសេចក្តីថ្លែងការណ៍នានា។
សម្រាប់ក្រុមអ្នកតាមដានព្រឹត្តិការណ៍នយោបាយនៅកម្ពុជា ការធ្វើទុក្ខបុកម្នេញ ប្រាកដណាស់ថា អំពើហិង្សាលើអ្នកតំណាងរាស្រ្តពីររូបរបស់គណបក្សប្រឆាំង ក្រោយបាតុកម្មទាមទារទំលាក់លោក កឹម សុខា ពីអនុប្រធានទី១នៃរដ្ឋសភា កាលពីថ្ងៃទី២៦តុលាឆ្នាំ២០១៥ បានធ្វើឲ្យគណបក្សប្រឆាំងមានការប្រុងប្រយ័ត្នជាងមុន។
យ៉ាងណាក៏ដោយ តើគណបក្សប្រឆាំងពិតជាកំពុងមានជម្ងឺបាក់ស្បាតមែនឬទេ? វាអាចជាការត្រឹមត្រូវខ្លះដែរ។ ក៏ប៉ុន្តែថា អ្វីដែលគណបក្សប្រឆាំងនៅស្ងៀម មិនតបត មិនឈ្លោះ មិនឆ្លើយតបនេះ គឺជាគោលនយោបាយថ្មីរបស់គណបក្សប្រឆាំងទេតើ។ ជាគោលនយោបាយដែលគណបក្សសង្រ្គោះជាតិ បានប្រកាសប្រាប់សកម្មជនមូលដ្ឋានរបស់ខ្លួនជារើយៗ ឲ្យតម្រង់ឆ្ពោះទៅរកផ្លូវនៃការបោះឆ្នោតនៅពេលខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ