ខួប៥ឆ្នាំនៃការបង្កើតគណបក្ស៖ លោក កឹម សុខា អំពាវនាវឲ្យពលរដ្ឋចូលរួមដើម្បីការផ្លាស់ប្តូរជាវិជ្ជមាន
ថ្ងៃទី ១៧ កក្កដា ឆ្នាំ ២០១៧នេះ គឺជាខួប៥ឆ្នាំគត់ នៃការបង្កើតគណបក្សសង្រ្គោះជាតិ។ នៅថ្ងៃនេះ គណបក្សប្រឆាំងដែលកើតឡើងពីការច្របាច់បញ្ចូលគ្នារវាងគណបក្សសម រង្ស៊ី និងគណបក្សសិទ្ធិមនុស្ស មិនបានរៀបចំពិធីរំលឹកខួបជាផ្លូវការអ្វីទេ ប៉ុន្តែប្រធានគណបក្សលោក កឹម សុខា បានចេញសារអំពាវនាវដល់ប្រជាពលរដ្ឋខ្មែរឲ្យបន្ដពង្រឹងនិងពង្រីក ការរួបរួមគ្នាដោយអហិង្សាជាមួយគណបក្សសង្គ្រោះជាតិ ដើម្បីនាំមកនូវការផ្លាស់ប្ដូរជាវិជ្ជមាន តាមរយៈការបោះឆ្នោតនៅឆ្នាំ២០១៨ខាងមុខ។ ការរំលឹករបស់លោក កឹម សុខា ចំពេលដែលគណបក្សសង្រ្គោះជាតិ កំពុងបាត់មេដឹកនាំរបស់ខ្លួនម្នាក់ គឺលោក សម រង្ស៊ី។
ចុះផ្សាយនៅថ្ងៃ៖
ស្តាប់ - ០២:០៣
គណបក្សសង្រ្គោះជាតិ ត្រូវបានបង្កើតឡើងតាមរយៈកិច្ចព្រមព្រៀងមួយនៅទីក្រុងម៉ានីលប្រទេសហ្វីលីពីន នៅថ្ងៃទី ១៧ កក្កដា ឆ្នាំ ២០១២ រវាងអ្នកប្រជាធិបតេយ្យពីរក្រុម។ មួយក្រុមមកពីគណបក្ស សម រង្ស៊ី ដឹកនាំដោយលោក សម រង្ស៊ី និងមួយក្រុមទៀតមកពីគណបក្សសិទ្ធិមនុស្ស ដឹកនាំដោយលោក កឹម សុខា។
មុនបង្កើតគណបក្សសង្រ្គោះជាតិ កាលណោះ គណបក្សទាំងពីរបានបង្កើតចលនាមួយដែលមានឈ្មោះថា “ចលនាប្រជាធិបតេយ្យដើម្បីសង្គ្រោះជាតិ” ដែលមានលោក សម រង្ស៊ី ធ្វើជាប្រធាន និងលោក កឹម សុខា ធ្វើជាអនុប្រធាន។ ប៉ុន្តែគណបក្សសង្រ្គោះជាតិ ដែលបានធ្វើឲ្យមានការភ្ញាក់ផ្អើលតាមរយៈការបោះឆ្នោតជាតិកាលពីឆ្នាំ ២០១៣ នោះ បច្ចុប្បន្នបានបាត់មេដឹកនាំម្នាក់របស់ខ្លួន គឺលោក សម រង្ស៊ី បន្ទាប់ពីវិសោធនកម្មច្បាប់ស្តីពីគណបក្សនយោបាយជាលើកទី២ នឹងត្រូវចូលជាធរមាននៅពេលដ៏ខ្លីខាងមុខ ក្រោយពីរដ្ឋសភាបានអនុម័តរួចរាល់ កាលពីថ្ងៃទី ១០ កក្កដា ហើយដែលស្ថាប័នព្រឹទ្ធសភា គ្រោងនឹងលើកយកមកអនុម័ត នៅថ្ងៃទី ១៨ កក្កដានេះ។
នៅចំខួប៥ឆ្នាំនៃការបង្កើតគណបក្សសង្រ្គោះជាតិនេះ លោក កឹម សុខា ដែលបច្ចុប្បន្ន គឺជាប្រធានគណបក្ស បានសរសេរសាររំលឹក ដោយបានអំពាវនាវដល់ប្រជាពលរដ្ឋខ្មែរទាំងអស់ បន្ដពង្រឹងនិងពង្រីក ការរួបរួមគ្នាដោយអហិង្សា និងចូលរួមជាមួយគណបក្សសង្គ្រោះជាតិឲ្យកាន់តែច្រើនឡើងថែមទៀត ដើម្បីនាំមកនូវការផ្លាស់ប្ដូរជាវិជ្ជមាន តាមរយៈការបោះឆ្នោតជាតិនៅឆ្នាំ២០១៨ខាងមុខ។ លោក កឹម សុខា មិនអាចទាក់ទងសុំការបញ្ជាក់បន្ថែមបានទេ ប៉ុន្តែតាមរយៈសេចក្តីថ្លែងការណ៍នៅថ្ងៃនេះ គណបក្សសង្រ្គោះជាតិបានចាត់ទុករយៈពេល៥ឆ្នាំមកនេះថា គណបក្សបានដើរលើផ្លូវត្រូវ តាមរយៈការធ្វើសកម្មភាពនយោបាយ ដោយប្រកាន់ខ្ជាប់នូវគោលការណ៍អហិង្សា ខ្មែរតែមួយ ផ្សះផ្សាបង្រួបបង្រួមជាតិ និងមិនប្រកាន់ខ្មែរណាជាសត្រូវនោះឡើយ។
សូមបញ្ជាក់ថា មានអាយុត្រឹមតែ៥ឆ្នាំ ប៉ុន្តែគណបក្សសង្រ្គោះជាតិបានឈ្នះកៅអីរដ្ឋសភាចំនួន៥៥លើ១២៣អាសនៈនៅឆ្នាំ២០១៣ និងឈ្នះតំណែងមេឃុំចៅសង្កាត់ចំនួន៤៨៩អាសនៈ លើ១៦៤៦ឃុំសង្កាត់នៅទូទាំងប្រទេស តាមរយៈការបោះឆ្នោតកាលពីពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ