សម្ដេចក្រុមព្រះមិនបោះបង់ជំនួបជាមួយថ្នាក់ដឹកនាំCNRP ប្រសិនមានការស្នើសុំផ្លូវការ
សម្ដេចក្រុមព្រះ នរោត្តម រណឬទ្ធិ ព្រះប្រធានគណបក្សហ្វ៊ុនស៊ិនប៉ិច នៅថ្ងៃព្រហស្បត្តិ៍នេះ បានប្រកាសស្វាគមន៍ការជួបចរចាជាមួយថ្នាក់ដឹកនាំគណបក្សសង្រ្គោះជាតិ ប្រសិនបើមានការស្នើសុំជាផ្លូវការណាមួយ។ យ៉ាងណាក៏ដោយ កាលពីថ្ងៃទី១៤តុលាម្សិលមិញ លោក សម រង្ស៊ី ប្រធានគណបក្សសង្រ្គោះជាតិបានបដិសេធជំនួបជាមួយសម្តេចក្រុមព្រះ នរោត្តម រណឬទ្ធិ និងបានចាត់ទុកថា ជារឿងឥតប្រយោជន៍។
ចុះផ្សាយនៅថ្ងៃ៖
ស្តាប់ - ០២:១៦
មួយថ្ងៃក្រោយពីការច្រានចោលជំនួបរបស់លោក សម រង្ស៊ី ប្រធានគណបក្សសង្រ្គោះជាតិ នៅថ្ងៃព្រហស្បត្តិ៍ទី១៥តុលានេះ ព្រះអង្គម្ចាស់ នរោត្តម រណឬទ្ធិ បានចេញមកធ្វើសន្និសីទកាសែតមួយដោយបានប្រកាសរក្សាជំហរជួបចរចាជាមួយនឹងលោក សម រង្ស៊ី ឬលោក កឹម សុខា ប្រសិនបើមានការសរសេរលិខិតជាផ្លូវការមកកាន់ព្រះអង្គ។ ជំនួបដែលអាចធ្វើឡើង នៅក្នុងព្រះរាជដំណាក់របស់ព្រះអង្គនេះតែម្តង។
ប៉ុន្តែយ៉ាងណាក៏ដោយ កាលពីថ្ងៃទី១៤តុលា លោក សម រង្ស៊ី និយាយដោយឡែក និងគណបក្សសង្រ្គោះជាតិនិយាយជារួម បានចេញសេចក្តីប្រកាសព័ត៌មានមួយ ដោយបានច្រានចោលជំនួបដែលព័ត៌មានបានលេចឮថា គ្រោងនឹងធ្វើឡើងនៅឯប្រទេសបារាំង នាចុងខែតុលាខាងមុខនេះ។ លោក សម រង្ស៊ី ថែមទាំងបានចាត់ទុកព័ត៌មានចចាមអារាមនេះថា ជារឿងឥតប្រយោជន៍ថែមទៀត។
គួររំលឹកជូនថា កាលពីយប់ថ្ងៃទី១២តុលា លោក សម រង្ស៊ី ប្រធានគណបក្សសង្រ្គោះជាតិ បានចាកចេញពីប្រទេសកម្ពុជាទៅកាន់ប្រទេសបារាំង ស្របពេលដែលព្រះអង្គម្ចាស់នរោត្តម រណឬទ្ធិ បានអវត្តមានពីប្រទេសកម្ពុជាផងដែរ។ ក៏ប៉ុន្តែនៅក្នុងសន្និសីទកាសែតនៅថ្ងៃព្រហស្បត្តិ៍នេះ ព្រះអង្គម្ចាស់នរោត្តម រណឬទ្ធិ បានបញ្ជាក់ថា ព្រះអង្គមិនបានជួបជាមួយមន្រ្តីគណបក្សប្រឆាំងណាម្នាក់ នៅពេលដែលព្រះអង្គនិងអ្នកម្នាងបានយាងទៅកាន់ប្រទេសថៃ ដើម្បីព្យាបាលជម្ងឺនេះទេ។ យ៉ាងណាក៏ដោយ សម្តេចក្រុមព្រះនរោត្តម រណឬទ្ធិ ទំនងជាមិនចង់បោះបង់ចោលលទ្ធភាពនៃការជួបប្រជុំជាមួយថ្នាក់ដឹកនាំនៃគណបក្សប្រឆាំងនោះទេ។
លោក អ៊ូ វីរៈ ប្រធានវេទិកាអនាគត បានថ្លែងថា ការរួបរួមជាមួយនឹងគណបក្សសង្រ្គោះជាតិ គឺជាការស្រោចស្រង់ជីវិតនយោបាយរបស់សម្តេចក្រុមព្រះនរោត្តម រណឬទ្ធិ ក៏ប៉ុន្តែការរួបរួមគ្នាណាមួយរវាងគណបក្សទាំងពីរ វាមិនអាក្រក់នោះទេ ប្រសិនបើផ្នែកទៅលើគោលការណ៍មួយច្បាស់លាស់។
សូមបញ្ជាក់ថា បន្ទូលរបស់សម្តេចក្រុមព្រះនេះ បានធ្វើឡើង នៅក្នុងពិធីរំលឹកខួប៣ឆ្នាំ នៃការយាងសោយទិវង្គតរបស់ សម្តេចឪ នរោត្ដម សីហនុ ព្រះបរមរតនកោដ្ឋ ដែលគណបក្សហ្វ៊ុនស៊ិនប៉ិច បានប្រារព្ធធ្វើឡើង នៅក្នុងព្រះរាជដំណាក់របស់ព្រះអង្គ ស្ថិតនៅបូរីទន្លេបាសាក់ ខណ្ឌចំការមន ក្រុងភ្នំពេញ នៅថ្ងៃព្រហស្បត្តិ៍ទី១៥តុលានេះ។ សម្តេចក្រុមព្រះ នរោត្តម រណប្ញទ្ធិ បានមានបន្ទូលក្នុងឋានៈជាព្រះប្រធានគណបក្សហ្វ៊ុនស៊ិនប៉ិចថា ការច្របាច់បញ្ចូលគ្នាណាមួយ មិនមាននៅក្នុងកម្មវិធីរបស់ទ្រង់នោះទេ ក៏ប៉ុន្តែព្រះអង្គឯកភាព ប្រសិនបើលោក សម រង្ស៊ី និងលោក កឹម សុខា ចង់ជួបព្រះអង្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ