CNRP នឹងដាក់ពាក្យប្តឹងទៅគជបជុំវិញភាពមិនប្រក្រតីនៃដំណើរការបោះឆ្នោត
គណបក្សសង្គ្រោះជាតិ កំពុងរៀបចំពាក្យបណ្តឹងទៅកាន់គណៈកម្មាធិការជាតិរៀបចំការបោះឆ្នោត ហៅកាត់ថា គជប ជុំវិញភាពមិនប្រក្រតីមួយចំនួននៅតាមការិយាល័យបោះឆ្នោត។ ភាពមិនប្រក្រតីនៅតាមការិយាល័យនោះ រួមមាន ការរាប់សន្លឹកដោយមិនបើកទ្វារបង្អួច ឬប្រកាសលទ្ធផលបោះឆ្នោតនៅតាមការិយាល័យមិនសូវឭ ការមិនបិទទម្រង់ ១១០២ នៅមុខការិយាល័យបោះឆ្នោត និង ការទិញភ្នាក់ងារសង្កេតការណ៍ជាដើម ។
ចុះផ្សាយនៅថ្ងៃ៖
ស្តាប់ - ០១:៣០
មួយថ្ងៃក្រោយការបោះឆ្នោត មេធាវីគណបក្សសង្គ្រោះជាតិ លោកស្រី ម៉េង សុភារី បានបញ្ជាក់ប្រាប់វិទ្យុបារាំង គណបក្សសង្គ្រោះជាតិ មិនទាន់អាចបូកសរុបបានទេ ថាតើនឹងដាក់ពាក្យបណ្តឹងជុំវិញភាពមិនប្រក្រតីនៃការបោះឆ្នោត ទៅកាន់គជបនោះទេ ដោយរង់ចាំប្រមូលព័ត៌មានឲ្យបានគ្រប់ជ្រុងជ្រោយពីតាមបណ្តារាជធានីខេត្តជាមុនសិន។
យ៉ាងណាក៏ដោយ លោកស្រី ម៉េង សុភារី អះអាងថានឹងដាក់ពាក្យបណ្តឹងទៅគជប ក្រោយពេលស្ថាប័នជំនាញការងារបោះឆ្នោតនេះ បិទបញ្ចប់ការផ្សាយលទ្ធផលបណ្តោះអាសន្ន នៅគណៈកម្មាការឃុំ សង្កាត់រៀបចំការបោះឆ្នោត នៅថ្ងៃទី ៧ មិថុនាខាងមុខនេះ។
ដោយឡែកបន្ទប់ស្ថានការណ៍ ដែលជាបណ្តុំអង្គការសង្គមស៊ីវិលឃ្លាំមើលការបោះឆ្នោតជាង ៤០ វិញ នៅក្នុងសន្និសីទសារព័ត៌មានរបស់ខ្លួន ក៏បញ្ជាក់ថា ពួកគេមិនទាន់ទទួលបានព័ត៌មានពាក់ព័ន្ធនឹងពាក្យបណ្តឹងពីខាងគណបក្សនយោបាយណាមួយនោះឡើយ ដោយរង់ចាំឃ្លាំមើលរហូតដល់ការប្រកាសលទ្ធផលផ្លូវការ។
យ៉ាងណាក៏ដោយ ក្នុងសន្និសីទសារព័ត៌មាននៅយប់ថ្ងៃបោះឆ្នោតឃុំសង្កាត់ ទី ៤ មិថុនា លោក យឹម សុវណ្ណ បានលើកឡើងពីចំណុចវិជ្ជមានជាច្រើននៅក្នុងដំណើរការបោះឆ្នោតឃុំសង្កាត់អាណត្តិទី៤ នេះ បើធៀបនឹងការបោះឆ្នោតអាណត្តិមុន។
ជុំវិញដំណើរការនៃការបោះឆ្នោតក្រុមប្រឹក្សា ឃុំសង្កាត់ ឆ្នាំ ២០១៧ នេះ ដែរ អង្គការតម្លាភាពកម្ពុជា បានវាយតម្លៃថា ទិដ្ឋភាពជារួមនៃការរៀបចំការបោះឆ្នោតនៅក្នុងថ្ងៃបោះឆ្នោតមានភាពប្រសើរឡើងគួរឲ្យកត់សម្គាល់ ក្នុងនោះមានដូចជា គុណភាពនៃបញ្ជីឈ្មោះអ្នកបោះឆ្នោត ការចុះឈ្មោះបេក្ខជន គណបក្សនយោបាយ កំណើនកិច្ចសហប្រតិបត្តិការ និងភាពបើកចំហររវាងគណៈកម្មាធិការជាតិរៀបចំការបោះឆ្នោតជាមួយសង្គមស៊ីវិល និងសាធារណជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ