រយៈពេលពីរថ្ងៃ សង្រ្គោះជាតិប្រមូលថវិកាបានជាង១៥ម៉ឺនដុល្លារដើម្បីបង្កើតប៉ុស្តិ៍ទូរទស្សន៍
គិតត្រឹមរសៀលថ្ងៃទី២៦មិថុនានេះ គណបក្សសង្រ្គោះជាតិ ប្រមូលថវិកាបានជាង១៥ម៉ឺនដុល្លារសហរដ្ឋអាមេរិកហើយ សម្រាប់យកទៅបង្កើតប៉ុស្តិ៍ទូរទស្សន៍ព្រះអាទិត្យ។ យុទ្ធនាការប្រមូលថវិកាសម្រាប់បង្កើតប៉ុស្តិ៍ទូរទស្សន៍ព្រះអាទិត្យនេះ បានចាប់ផ្តើមកាលពីថ្ងៃទី២៥មិថុនា ហើយនឹងបន្តធ្វើរហូតទទួលបានថវិកាគ្រប់៣លានដុល្លារសម្រាប់ដំណើរការប៉ុស្តិ៍ទូរទស្សន៍ថ្មីនេះ។ អ្នកវិភាគនយោបាយបានមើលឃើញថា យុទ្ធនាការប្រមូលថវិកានេះ អាចជារង្វាស់រង្វាល់មួយ សម្រាប់អ្នកដែលមានសមាណចិត្តចំពោះគណបក្សប្រឆាំងផងដែរ។
ចុះផ្សាយនៅថ្ងៃ៖
ស្តាប់ - ០២:៤២
«ចំនួនទឹកប្រាក់ដែលផ្តល់ដោយប្រជាពលរដ្ឋម្នាក់ៗមិនសំខាន់ទេ អ្វីដែលសំខាន់ គឺទឹកចិត្តរបស់អ្នកដែលផ្តល់វិភាគទាននេះ»។ នេះបើតាមការលើកឡើងរបស់លោក សម រង្ស៊ី ប្រធានគណបក្សសង្រ្គោះជាតិនៅលើទំព័រ Facebook របស់លោក កាលពីល្ងាចថ្ងៃទី២៥មិថុនា ខណៈដែលលោក សម រង្ស៊ី បានប្រកាសពីការបើកយុទ្ធនាការប្រមូលវិភាគទាន ដើម្បីជួយទ្រទ្រង់ប៉ុស្តិ៍ទូរទស្សន៍ព្រះអាទិត្យ។
លោក សម រង្ស៊ី នឹងលោក កឹម សុខា ជាប្រធាននិងអនុប្រធានគណបក្ស បានបរិច្ចាគថវិកាមុនគេកាលពីថ្ងៃម្សិលមិញ ក្នុងម្នាក់ៗចំនួន៣ពាន់ដុល្លារ និងតាមពីក្រោយដោយអ្នកតំណាងរាស្រ្តគណបក្សសង្រ្គោះជាតិទាំង៥៥រូប បូករួមទាំងសមាជិកព្រឹទ្ធសភា១០រូបទៀត នូវថវិកាក្នុងម្នាក់១ពាន់ដុល្លារ។ ហើយបើយោងតាមរបាយការណ៍ គិតត្រឹមថ្ងៃទី២៥មិថុនាម្សិលមិញ សង្រ្គោះជាតិបានទទួលថវិកាសរុប១១ម៉ឺន៤រយដុល្លារអាមេរិក (១១០៤០០$)។ ហើយបើតាមលោក យឹម សុវណ្ណ ជាអ្នកនាំពាក្យ គណបក្សកំពុងទទួលបានវិភាគទានជាបន្តបន្ទាប់ទៀត ដែលគិតទៅប្រហាក់ប្រហែលជា១៥ម៉ឺនដុល្លារអាមេរិកទៅហើយ។
ថវិកាប៉ុណ្ណោះ ពិតជាមិនអាចយកទៅដំណើរការប៉ុស្តិ៍ទូរទស្សន៍ព្រះអាទិត្យ ដែលគម្រោងត្រូវការថវិកាដល់ទៅ៣លានដុល្លារអាមេរិកនោះទេ។ អញ្ចឹងហើយ បានជានៅថ្ងៃសៅរិ៍ទី២៧មិថុនាស្អែកនេះ ទាំងលោក សម រង្ស៊ី នឹងលោក កឹម សុខា នឹងរងចាំទទួលថវិកាពីសប្បុរសជន នៅនឹងទីស្នាក់ការគណបក្សសង្រ្គោះជាតិក្នុងសង្កាត់ចាក់អង្រែលើ ចាប់ពីវេលាម៉ោង៨ព្រឹកតទៅ។ អ្នកដែលចូលរួមវិភាគទានមានពីរប្រភេទ។ ប្រភេទទី១ គឺជាអំណោយតែម្តង។ ចំណែកឯប្រភេទទី២ គឺសម្រាប់អ្នកដែលចង់ចូលរួមដាក់ទុនវិនិយោគជាមួយនឹងប៉ុស្តិ៍ទូរទស្សន៍ថ្មីនេះ ដែលថវិកាចាប់ពី១ពាន់ដុល្លារឡើងទៅ។ សម្រាប់អ្នកដែលចូលរួមវិភាគទានទាំងពីរប្រភេទ នឹងទទួលបានវិក្ក័យបត្រ ដោយមានការហត្ថលេខាពីលោក សម រង្ស៊ី និងលោក កឹម សុខា និងថែមទាំងបានថតរូបជាអនុស្សាវរីយ៍ជាមួយថ្នាក់ដឹកនាំទាំងពីរផងដែរ។
លោក សម រង្ស៊ី បានសរសេរនៅលើ Facebook របស់លោកពីម្សិលមិញថា «ទូរទស្សន៍ព្រះអាទិត្យ នឹងដំណើរការទៅបានកាន់តែឆាប់ ពេលណាដែលមានប្រជាពលរដ្ឋយ៉ាងច្រើនកុះករ ទូទាំងប្រទេស ផ្តល់ជាវិភាគទានម្នាក់បន្តិចៗ ដើម្បីទ្រទ្រង់ទូរទស្សន៍ព្រះអាទិត្យរបស់យើងទាំងអស់គ្នា» ហើយថា«ទោះបីជាវិភាគទានតែមួយរយរៀលលុយខ្មែរ ក៏មានតម្លៃលើសលប់ ក្នុងការរៀបចំគម្រោងនេះដែរ»។
ប៉ុន្តែបើតាមលោក សុខ ទួច អ្នកវិភាគនយោបាយបានមើលឃើញថា នេះជាយុទ្ធនាការមួយដើម្បីវាស់ស្ទង់ទឹកចិត្តរបស់អ្នកគាំទ្រគណបក្សប្រឆាំងនេះ ប៉ុន្តែផ្ទុយទៅវិញ យុទ្ធនាការនេះ អាចជាការបង្ហាញពីអសមត្ថភាពរបស់គណបក្សប្រឆាំងទៅវិញទេ ដែលមិនមានលទ្ធភាពសូម្បីតែការបង្កើតប៉ុស្តិ៍ទូរទស្សន៍មួយ។
បើតាមលោក យ៉ែម បុញ្ញាឬទ្ធិ អ្នកនាំពាក្យគណបក្សសង្រ្គោះជាតិ ប៉ុស្តិ៍ទូរទស្សន៍ព្រះអាទិត្យដែលជាកម្មសិទ្ធិដំបូងរបស់បក្សប្រឆាំងនេះ នឹងដាក់ឲ្យដំណើរការនៅចុងឆ្នាំ២០១៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ