បក្សប្រឆាំងថា ពេលនេះសមរម្យណាស់ដែលរដ្ឋាភិបាលខ្មែរ គួរតែប្តឹងវៀតណាម រឿងព្រំដែន
តំណាងរាស្ត្របក្សប្រឆាំង ១០នាក់ នឹងចុះហត្ថលេខាលើលិខិតរួមគ្នាមួយ ផ្ញើទៅកាន់លោកនាយករដ្ឋមន្ត្រីហ៊ុន សែន នៅថ្ងៃព្រហស្បតិ៍ ឬថ្ងៃសុក្រ សប្តាហ៍នេះ ដើម្បីស្នើឲ្យរដ្ឋាភិបាលកម្ពុជា ប្តឹងទៅតុលាការយុត្តិធម៌អន្តរជាតិក្រុងឡាអេ ស្តីពីការរំលោភបំពានដីព្រំដែនកម្ពុជា ពីភាគីវៀតណាម។ បក្សប្រឆាំង អះអាងថា ពេលនេះគឺសមរម្យណាស់ សម្រាប់ខ្មែរ ដែលត្រូវស្វែងរកអន្តរាគមពីអន្តរជាតិ ព្រោះថាវៀតណាម នៅតែមិនបានអើពើចំពោះកំណត់ទូត ដែលក្រសួងការបរទេសកម្ពុជា បានផ្ញើទៅជាច្រើនលើកច្រើនសារ។
ចុះផ្សាយនៅថ្ងៃ៖
ស្តាប់ - ០២:២១
ទោះបីជាមានការសម្របសម្រួលតាមផ្លូវការទូត តាមរយៈការផ្ញើកំណត់ទូតរបស់ក្រសួងការបរទេសកម្ពុជា ជាច្រើនលើកច្រើនសារ ទៅកាន់ភាគីវៀតណាមក៏ដោយ ប៉ុន្តែភាគីវៀតណាម ហាក់មិនអើពើ មិនព្រមតបវិញ ហើយនៅតែបន្តរំលោភលើបូរណភាពដែនដីកម្ពុជា។ ប្រការនេះ បានធ្វើឲ្យតំណាងរាស្ត្របក្សប្រឆាំង សម្រេចថា គ្រោងនឹងសរសេរលិខិតផ្លូវការរួមគ្នាមួយ ផ្ញើជូនលោកនាយករដ្ឋមន្ត្រីហ៊ុន សែន ក្នុងសប្តាហ៍នេះ ដើម្បីជំរុញឲ្យរដ្ឋាភិបាល យកករណីវៀតណាមរំលោភដែនដីកម្ពុជា ទៅប្តឹងនៅតុលាការយុត្តិធម៌អន្តរជាតិ ក្រុងឡាអេ ICJ។
លោកអ៊ុំ សំអាន តំណាងរាស្ត្រគណបក្សសង្គ្រោះជាតិ បានប្រាប់វិទ្យុបារាំងថា បញ្ហាព្រំដែន នឹងត្រូវបានដោះស្រាយ ប្រសិនបើមានការប្តឹងរកយុត្តិធម៌ពីតុលាការអន្តរជាតិ ។ លោកអ៊ុំ សំអាន បានបញ្ជាក់ថា ពេលនេះគឺសមរម្យបំផុតក្នុងការប្តឹងផ្តល់ មិនមែនទាល់តែពេលមានការផ្ទុះអាវុធដាក់គ្នា ដូចរឿងប្រាសាទព្រះវិហារ ទើបស្វែងរកអន្តរាគមនោះទេ។
តំណាងរាស្ត្របក្សប្រឆាំងដដែល បានឲ្យដឹងថា រឿងព្រំដែនកម្ពុជា-វៀតណាម និងកម្ពុជា-ថៃ គឺមិនខុសគ្នាប៉ុន្មានឡើយ។ ប្រសិនបើភាគីខ្មែរ រើបំរះ នោះដំណោះស្រាយប្រសើរតាមផ្លូវច្បាប់ នឹងកើតឡើងជាក់ជាមិនខាន។ ប៉ុន្តែតាមលោកអ៊ុំ សំអាន បញ្ហាដែលវៀតណាមហ៊ានបំពានដូច្នេះ គឺព្រោះតែរដ្ឋាភិបាលខ្មែរ មានភាពទន់ភ្លន់ពេក ជាមួយភាគីវៀតណាម។ លោកថា ទាហាន ឬប៉ូលិស ដែលបានតវ៉ា ពីបញ្ហាព្រំដែន កម្ពុជា-វៀតណាម តែងតែត្រូវបានដកហូតតំណែងចេញ។
តាមអ្នកនាំពាក្យទីស្តីការគណៈរដ្ឋមន្ត្រី និងជាអ្នកនាំពាក្យរដ្ឋាភិបាល លោកផៃ ស៊ីផាន យន្តការតុលាការយុត្តិធម៌អន្តរជាតិ រវាងកម្ពុជា និងវៀតណាម គឺជាជម្រើសចុងក្រោយរបស់រដ្ឋាភិបាលក្រុងភ្នំពេញ ក្នុងការដោះស្រាយបញ្ហាព្រំដែន។ លោកផៃ ស៊ីផាន បានប្រាប់វិទ្យុបារាំងថា ការអនុវត្តតាមតុលាការអន្តរជាតិ គឺជាបន្ទាត់នយោបាយរបស់កម្ពុជា ក្នុងការថែរក្សាទំនាក់ទំនងរវាងប្រទេសជិតខាង ព្រោះថាបញ្ហាព្រំដែន គឺជាកិច្ចការអន្តរជាតិដែលកើតឡើងពីកិច្ចសហការជាមួយប្រទេសជិតខាង។ ហើយរដ្ឋាភិបាលកម្ពុជា ក៏គ្មានគោលការណ៍ប្រើហិង្សា ចំពោះកិច្ចការព្រំដែននោះទេ។ ម្យ៉ាងទៀត កម្ពុជានឹងនៅតែប្រើឥរិយាបទទន់ភ្លន់ម៉ឺងម៉ាត់ជាបន្តទៀត។
គួររម្លឹកជូនថា កម្ពុជាបានធ្វើកំណត់ទូតជាបន្តបន្ទាប់ទៅកាន់ប្រទេសវៀតណាម រួមមាន តាំងពីការជីករណ្តៅ ក្នុងខេត្តរតនៈគីរី ការកសាងសង់ប៉ុស្តិ៍យោធា នៅចំណុចស ក្នុងស្រុកកោះធំ ខេត្តកណ្តាល ជាដើម។ ប៉ុន្តែរដ្ឋាភិបាលកុម្មុយនិស្តក្រុងហាណូយ មិនព្រមបញ្ឈប់សកម្មភាព ហើយថែមទាំងបានធ្វើប៉ុស្តិ៍យោធានោះ ធំជាងមុនថែមទៀតផង។ គិតពីឆ្នាំ២០១៣ រហូតដល់ពេលនេះ ក្រសួងការបរទេសកម្ពុជា បានបញ្ជូនកំណត់ទូតតវ៉ាចំនួន ១០លើកទៅហើយ។ ប៉ុន្តែប្រទេសវៀតណាម មិនបានឆ្លើយតបសូម្បីតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ