គ្រឿងសំអាង “ក្លែងក្លាយ” ជិត១០០តោនត្រូវបានដុតចោល
ដូចការគ្រោងទុក នៅព្រឹកនេះ គណៈកម្មាធិការប្រយុទ្ធប្រឆាំងផលិតផលក្លែងក្លាយ បានដុតកម្ទេចចោលគ្រឿងសំអាងជិត១០០តោន ដែលសមត្ថកិច្ចថាជារបស់ក្លែងក្លាយ ខុសច្បាប់។ ការដុតកម្ទេចចោលនូវគ្រឿងសំអាងដ៏ក្រាស់ក្រែល ដែលមានតំលៃរាប់លានដុល្លារនៅពេលនេះ បានធ្វើឡើងបន្ទាប់ពីសមត្ថកិច្ចធ្វើការបង្ក្រាបនិងរឹបអូសពីទីតាំងខុសច្បាប់នានា ចាប់តាំងពីដើមឆ្នាំ២០១៧កន្លងទៅ។
ចុះផ្សាយនៅថ្ងៃ៖
ស្តាប់ - ០១:៣៤
អត្ថបទដោយ៖ អ៊ឹង ប៊ុនថន
សមត្ថកិច្ចក្រសួងមហាផ្ទៃ ឲ្យដឹងថា គ្រឿងសំអាងក្លែងក្លាយដែលដុតកម្ទេចចោលនៅថ្ងៃអង្គារនៅទីលានចាក់សំរាម ជើងឯក ក្នុងខណ្ឌដង្កោនេះមានចំនួន៨១តោន។ តាមរបាយការណ៍របស់ប៉ូលីស ផលិតផលក្លែងក្លាយ ដែលយកមកដុតចោលទាំងនោះរួមមាន៖ សាប៊ូកក់សក់ម៉ាកប៉ង់តែន រីចយស៍ សាន់ស៊ីលឃ៍ និងសាប៊ូកក់សក់ ម៉ាក ឃ្លៀរ រួមទាំងឡេលាបស្បែកជាដើមដែលមានតម្លៃសរុបជាទឹកប្រាក់ស្មើនឹង៥ទៅ៦លានដុល្លារ។
លោក វណ្ណ ផេង អនុប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ប្រាប់វិទ្យុបារាំងអន្តរជាតិRFIថាក្នុងឆ្នាំ២០១៧ សមត្ថកិច្ចជំនាញបង្រ្កាបបានផលិតផលក្លែងក្លាយប្រហែល២០០តោន នៃចំនួន១២ករណី។ ប៉ុន្តែលោកថាការដុតចោលនៅថ្ងៃនេះតែ៨១តោននោះគឺធ្វើតាមអំណាចសាលដីការបស់តុលាការ។
លោកវរសេនីយឯក វណ្ណ ផេង ឲ្យដឹងថា ការជួញដូរផលិតផលក្លែងក្លាយនេះធ្វើឡើងដោយជនជាតិចិន និងខ្មែរដែលនាំចូលពីខាងក្រៅដោយក្លែងបន្លំ។
លោក ស ខេង រដ្ឋមន្ត្រីក្រសួងមហាផ្ទៃ ដែលបានចូលរួមនៅក្នុងពិធីដុតកំទេចផលិតផលគ្រឿងសំអាងក្លែងកា្លយនេះដែរ បានអំពាវនាវឲ្យប្រជាពលរដ្ឋទាំងអស់ឲ្យមានការប្រុងប្រយ័ត្នខ្ពស់ ចំពោះការប្រើប្រាស់ផលិតផលសំអាង ក៏ដូចជាផលិតផលផ្សេងៗទៀត ដើម្បីជៀសវាងប៉ះពាល់ដល់សុខភាពនិងអាយុជីវិត។
កាលពីពេលថ្មីៗនេះ សមត្ថកិច្ចខេត្តកណ្តាល បានចាប់ខ្លួនស្រ្តីម្នាក់ ដោយចោទថាលក់គ្រឿងសំអាងក្លែងក្លាយខុសច្បាប់ ហើយក្រោយមកតុលាការខេត្តនេះបានដោះលែងវិញ បន្ទាប់ពីការរិះគន់ជាច្រើនតាមបណ្តាញសង្គមចំពោះចំណាត់ការនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ