លោកអ៊ុំ សំអាន មិនឆ្លើយសំណួររបស់ចៅក្រមព្រោះសំអាងលើអភ័យឯកសិទ្ធិតំណាងរាស្រ្ត
ចៅក្រមស៊ើបសួរនៃសាលាដំបូងរាជធានីភ្នំពេញនៅព្រឹកថ្ងៃពុធនេះ បានបើកសវនាការសាកសួរបន្ថែមទៀតទៅលើលោកអ៊ុំ សំអាន អ្នកតំណាងរាស្រ្តគណបក្សសង្រ្គោះជាតិជុំវិញដំណើររឿងរិះគន់ និងបង្ហោះឯកសារផែនទីព្រំដែនកម្ពុជា និងវៀតណាមនៅលើបណ្តាញសង្គម។ ទោះបីប្រើពេលអស់ជាង២ម៉ោងក៏ដោយ ក៏ប៉ុន្តែចៅក្រមស៊ើបសួរមិនទទួលបានលទ្ធផលអ្វីនោះទេ ព្រោះថាអ្នកតំណាងរាស្រ្តមណ្ឌលខេត្តសៀមរាបរូបនេះ មិនព្រមឆ្លើយនឹងសំណួរណាមួយរបស់ចៅក្រមឡើយ។
ចុះផ្សាយនៅថ្ងៃ៖
ស្តាប់ - ០២:១៣
លើកនេះក៏ដូចកាលពីការសាកសួរលើកដំបូងដែរ គឺលោកអ៊ុំ សំអាន មិនបានឆ្លើយតបទៅនឹងសំណួរចំនួន៦របស់ចៅក្រមស៊ើបសួរសាលាដំបូងរាជធានីភ្នំពេញនោះទេ។ ធ្វើដូចនេះ គឺដោយសារអ្នកតំណាងរាស្រ្តគណបក្សសង្គោះជាតិ សំអាងនៅមុខចៅក្រមថា គាត់ គឺជាតំណាងរាស្រ្តដែលមានអភ័យឯកសិទ្ធិពេញលេញហើយត្រូវការពារដោយច្បាប់រដ្ឋធម្មនុញ្ញ។ ដូច្នេះហើយ បើចង់ឲ្យគាត់ឆ្លើយនឹងសំណួររបស់ចៅក្រម លុះត្រាតែមានការសម្រេចពីរដ្ឋសភាជាតិក្នុងសំឡេង២ភាគ៣ ដើម្បីដក ឫក៏ព្យួរអភ័យឯកសិទ្ធិជាតំណាងរាស្រ្តរបស់គាត់សិន។ នេះបើតាមការបញ្ជាក់ប្រាប់ពីលោកសំ សុគង់ មេធាវីការពារក្តីឲ្យលោកអ៊ុំ សំអាន។
តំណាងរាស្រ្តកំពុងនៅមានអភ័យឯកសិទ្ធិ លោកអ៊ុំ សំអាន ក្នុងសំលៀកបំពាក់ជាអ្នកទោសដោយដៃជាប់ខ្នោះផងនោះ ត្រូវបានបញ្ជូនមកកាន់តុលាការក្រុងភ្នំពេញទាំងមេឃកំពុងភ្លៀងនៅម៉ោងប្រមាណជាង៨ ព្រឹក។ ក្រោយបញ្ចប់ការសាកសួរ លោកត្រូវបានអាជ្ញាធរនាំបញ្ជូនទៅក្នុងរថយន្តយ៉ាងប្រញាប់ ដើម្បីដឹកបញ្ជូនទៅកាន់ពន្ធនាគារព្រៃសវិញ។ តែទោះជាយ៉ាងណា អ្នកតំណាងរាស្រ្តរូបនេះ បាននិយាយប្រាប់អ្នកកាសែតយ៉ាងខ្លីថា លោកអត់ឆ្លើយនឹងសំណូរចៅក្រមទេ។ ចម្លើយខ្លីនេះ ក៏ព្រោះតែអ្នកកាសែតនៅតែព្យាយាមប្រជ្រៀតតាមសួរគាត់ បើទោះសន្តិសុខសាលាដំបូងរាជធានីភ្នំពេញ បានគម្រាមដកម៉ាស៊ីនថតរូប និងថតសំឡេង បើសិនអ្នកកាសែតណាហ៊ានសួរនាំ និងថតរូបគាត់នោះ។
សូមបញ្ជាក់ថា លោកអ៊ុំ សំអាន ដែលជាតំណាងរាស្រ្តគណបក្សប្រឆាំងមួយរូបដែលសកម្មនឹងបញ្ហាព្រំដែនកម្ពុជា និងវៀតណាមនោះ ត្រូវបានអាជ្ញាធរខ្មែរចាប់ខ្លួនកាលពី ថ្ងៃទី១១ ខែមេសា ឆ្នាំ២០១៦ នៅក្នុងខេត្តសៀមរាប ដោយរដ្ឋាភិបាលបានចោទប្រកាន់គាត់ពាក់ព័ន្ធរឿងប្រើប្រាស់ផែនទីក្លែងក្លាយ។ រំលងមួយថ្ងៃ ពោលគឺនៅថ្ងៃទី១២ មេសា គាត់ត្រូវបានព្រះរាជអាជ្ញាអមសាលាដំបូងរាជធានីភ្នំពេញ បានសម្រេចចោទប្រកាន់ពីបទញុះញង់បង្កភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៥ និងបទញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌកម្ពុជា និងបញ្ជូនទៅឃុំខ្លួននៅក្នុងពន្ធនាគារព្រៃសតែម្តង។
កាលពីចុងខែមេសា សាលាដំបូងរាជធានីភ្នំពេញ បានទាត់ចោលសំណើសុំនៅក្រៅឃុំរបស់គាត់ម្តងរួចមកហើយៗកាលពីថ្ងៃទី១៧ ខែឧសភាកន្លងទៅនេះ សាលាឧទ្ធរណ៍បានទាត់ចោលសំណើសុំនៅក្រៅឃុំរបស់គាត់ទៀត។ យ៉ាងណាក៏ដោយ ក្រុមមេធាវីការពារក្តីឲ្យលោកអ៊ុំ សំអាន កាលពីសប្តាហ៍មុន បានបន្តដាក់បណ្តឹងសារទុក្ខទៅកាន់តុលាការកំពូលបន្ថែមទៀតជុំវិញសំណើសុំនៅក្រៅឃុំបណ្តោះអាសន្ននេះ។ ក៏ប៉ុន្តែមកដល់ពេលនេះ តុលាការកំពូលនៅមិនទាន់សម្រេច ថានឹងបើកសវនាការនៅពេលណាមួយនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ