លោក កឹម សុខា៖ អំពើឃោរឃៅថ្មីៗនេះ ធ្វើឲ្យបក្សប្រឆាំងមិនអាចធ្វើសកម្មភាពបាន
ការកើនឡើងកម្តៅនយោបាយនៅកម្ពុជា នៅមិនទាន់បញ្ចប់នៅឡើយ ដោយពេលនេះគណបក្សសង្រ្គោះជាតិបាន បានសម្តែងការព្រួយបារម្ភ ចំពោះអំពើឃោរឃៅនៅកម្ពុជាក្នុងរយៈពេលថ្មីៗនេះ បានធ្វើឲ្យតំណាងរាស្ត្រគណបក្សសង្គ្រោះជាតិ មិនអាចធ្វើសកម្មភាពតាមតួនាទីរបស់ខ្លួនបាន។ នេះគឺជាការលើកឡើងរបស់លោក កឹម សុខា នៅព្រឹកនេះ ក្រោយពីស្ថាប័នធំៗ ដែលមានទាំងអង្គការសហប្រជាជាតិផងនោះ ក៏បានអំពាវនាវឲ្យមានការស្វែងរកជនដៃដល់ ដែលវាយតំណាងរាស្ត្រមានអភ័យឯកសិទ្ធិ២រូប កាលពីថ្ងៃទី២៦ តុលា។
ចុះផ្សាយនៅថ្ងៃ៖
ស្តាប់ - ០១:៤៧
អនុប្រធានគណបក្សសង្រ្គោះជាតិ និងជាអតីតអនុប្រធានរដ្ឋសភា បានសរសេរនៅលើបណ្តាញសង្គមរបស់លោកនៅព្រឹកនេះថា អំពើឃោរឃៅនាប៉ុន្មានសប្តាហ៍នេះ បានធ្វើឲ្យតំណាងរាស្ត្រគណបក្សសង្គ្រោះជាតិ មិនអាចធ្វើសកម្មភាពតាមតួនាទីរបស់ខ្លួនបានទេ បើបរិយាកាសនយោបាយបែននេះនៅតែបន្ត។
តាមរយៈសេចក្តីថ្លែងការណ៍របស់ខ្លួន នៅថ្ងៃទី១ វិច្ឆិកា គណបក្សសង្រ្គោះជាតិ បានក៏ឲ្យដឹងដែរថាការយឺតយ៉ាវ ក្នុងការស៊ើបអង្កេតរកជនដៃដល់ គឺមិនបានបង្ហាញទំនុកចិត្តដល់មហាជន ធ្វើឲ្យតំណាងរាស្ត្របក្សប្រឆាំងនៅតែព្រួយបារម្ភពីសុវត្ថិភាព។ ក្រៅពីនេះបក្សប្រឆាំងក៏ស្នើឲ្យរដ្ឋាភិបាល អញ្ជើញតំណាងឧត្តមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សចូលរួមក្នុងដំណើរការស៊ើបអង្កេតផងដែរ។
គួររំលឹកជូនថា កាលពីថ្ងៃទី២៦ តុលា កន្លងទៅ អ្នកតំណាងរាស្ត្រគណបក្សសង្រ្គោះជាតិពីររូប គឺលោក ញ៉យ ចំរើន និង លោក គង់ សភា ត្រូវបានក្រុមជនមិនស្គាល់មុខស្ទាក់វាយលោកទាំងពីរ ខណៈដែលលោកជិះរថយន្តចេញពីរដ្ឋសភា ក្រោយពេលដែលមានបាតុកម្មទាមទារទម្លាក់លោក កឹម សុខា ពីអនុប្រធានរដ្ឋសភា។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្រ្គោះជាតិ បានឲ្យវិទ្យុបារាំងដឹងថារហូតមកដល់ពេលនេះស្ថានភាពរបួសរបស់អ្នកតំណាងរាស្ត្រទាំងពីរ គឺនៅមានការឈឺចាប់ក្នុងខ្លួននៅឡើយ ក្រោយពីការវះកាត់របស់គ្រូពេទ្យ។ អ្នកនាំពាក្យរូបនេះ បានបញ្ជាក់ថា រហូតមកដល់ពេលនេះ ថ្លៃវះកាត់ និងការព្យាបាលអ្នកតំណាងរាស្ត្រទាំងពីរ គឺអស់១ម៉ឺនដុល្លារអាមេរិក ហើយបើទោះបីជាគណបក្សសង្រ្គោះជាតិបានទទួលថវិកាមួយចំនួនពីរដ្ឋសភាមែន តែថវិកានោះមិនគ្រប់គ្រាន់ទេ។
ទាក់ទងនឹងករណីវាយតំណាងរាស្ត្របក្សប្រឆាំង ដែលបក្សប្រឆាំងចាត់ទុកថាជាអំពើឃោរឃៅនោះ រាជរដ្ឋាភិបាលកម្ពុជាក៏បានប្រកាសបង្កើតគណៈកម្មការស្រាវជ្រាវស៊ើបអង្កេតមួយ ដោយពេលនេះមិនទាន់មានការផ្សព្វផ្សាយពីលទ្ធផលយ៉ាងណានៅឡើយទេ៕ ក្រសួងមហាផ្ទៃ និងគណៈកម្មការនេះ ក៏បានអំពាវនាវឲ្យមានការចូលរួមផ្តល់ព័ត៌មានពីអ្នកក្នុងហេតុការណ៍នោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ