បន្ទាប់ពីទទួលជ័យជំនះភ្លូកទឹកភ្លូកដី នៅក្នុងការបោះឆ្នោតឆ្នាំ ២០០៨ គណបក្សប្រជាជនកម្ពុជា បានស្គាល់នូវការបរាជ័យមួយដែលនឹកស្មានមិនដល់ នៅក្នុងការបោះឆ្នោតឆ្នាំ ២០១៣។ បរាជ័យនេះ គឺជាសារព្រមានមួយ ដែលបញ្ជាក់ថា ប្រជាប្រិយភាពរបស់គណបក្សនេះ បានធ្លាក់ចុះក្នុងចំណោមពលរដ្ឋខ្មែរដែលជាម្ចាស់ឆ្នោត។ ដើម្បីទទួលបានការគាំទ្រនៅក្នុងការបោះឆ្នោតនាឆ្នាំ ២០១៧ និង ២០១៨ គណ-បក្សប្រជាជនកម្ពុជា កំពុងតែរៀបចំកសាងយុទ្ធសាស្ត្រ ដើម្បីស្តារប្រជាប្រិយភាពរបស់ខ្លួនឡើងវិញ។ ប៉ុន្តែមកទល់នឹងពេលនេះ គេមិនដឹងច្បាស់ទេថា តើប្រជាប្រិយភាពរបស់បក្សនេះ កំពុងស្ថិតនៅចំណុចណាមួយ។
តាមរយៈមហាសន្និបាត ដែលទើបនឹងបញ្ចប់ទៅថ្មីៗនេះ គណបក្សប្រជាជនកម្ពុជាហាក់ដូចជាបានបង្ហាញក្តីបារម្ភរបស់ខ្លួន។ បារម្ភ ព្រោះការកើនឡើងនៃសន្ទុះប្រជាប្រិយភាពរបស់គណបក្សសង្គ្រោះជាតិ។ ដើម្បីសាកល្បងលុបបំបាត់ក្តីបារម្ភ និងស្តារប្រជាប្រិយភាព ក្នុងគោលដៅទាក់ទាញការគាំទ្រពីប្រជាពលរដ្ឋម្ចាស់ឆ្នោតឡើងវិញ មហាសន្និបាតរបស់គណបក្សប្រជាជន ក៏បានលើកឡើង និងបានដាក់អោយអនុវត្តនូវវិធានការមួយចំនួន។ វិធានការដែលតាមមើលទៅគ្មានគោលដៅអ្វីផ្សេង ក្រៅតែពីការផ្គាប់ចិត្តម្ចាស់ឆ្នោត និងបំពេញសេចក្តីត្រូវការភ្លាមៗរបស់ប្រជាពលរដ្ឋនោះទេ។
វិធានការទាំងនោះរួមមាន ជំរុញការដំឡើងប្រាក់ខែមន្ត្រីរាជការ កងកម្លាំងប្រដាប់អាវុធ ការដំឡើងរបបប្រាក់សោធននិវត្តន៍ ការដំឡើងប្រាក់ឈ្នួលដល់កម្មករ ការយកតម្លៃភ្លើងអគ្គិសនីក្នុងតម្លៃថោក ជាដើម។
គួរជំរាបផងដែរថា ការបំពេញចិត្តប្រជាពលរដ្ឋពីសំណាក់គណបក្សប្រជាជនកម្ពុជា មិនមែនទើបតែចាប់ផ្តើមធ្វើឡើងក្នុងពេលថ្មីៗនេះទេ។ កន្លងមក ក៏មានដែរនូវការផ្គាប់ចិត្តម្ចាស់ឆ្នោត ដូចជាការបញ្ឈប់ការយកប្រាក់នៅលើផ្លូវ២០០៤ ផ្លូវវេងស្រង និងផ្លូវជាតិលេខ៤ ព្រមទាំងការគ្រប់គ្រងប្រាសាទអង្គវត្តឡើងវិញដោយរដ្ឋ ជាដើម។
ជាមួយគ្នានេះដែរ រដ្ឋាភិបាលដែលដឹកនាំដោយ គណបក្សប្រជាជនកម្ពុជា បានសម្រេចលុបចោលប័ណ្ណបើកបរម៉ូតូដែលមានកម្លាំងចាប់ពី ១២៥ CC ចុះក្រោម ទទួលស្គាល់ការកាន់កាប់យានយន្តជាក់ស្តែង និង ព្យួរការបង់ពន្ធការផ្ទេរកម្មសិទ្ធិផងដែរ។
គណបក្សប្រជាជនកម្ពុជា ក៏មិនភ្លេចទេ ក្នុងការដាស់តឿនមន្ត្រីរបស់ខ្លួន អោយចូលរួមអនុវត្តកំណែទម្រង់ ស៊ីជម្រៅតាមអភិក្រម “ឆ្លុះកញ្ចក់ មុជទឹក ដុសក្អែល និងព្យាបាល” និងបម្រើប្រជាពលរដ្ឋអោយបានដិតដល់។
យ៉ាងណាមិញ ក្នុងចំណោមវិធានការទាំងអស់នេះ ក៏មានដែរនូវការអនុវត្តពាក្យសន្យាខ្លះរបស់គណបក្សសង្គ្រោះជាតិ។ ពាក្យសន្យា ដែលគណបក្សសង្គ្រោះជាតិ បានលើកឡើងមុនការបោះឆ្នោតឆ្នាំ ២០១៣។ ជាក់ស្តែងដូចជា កម្មករទទួលបានប្រាក់ខែទាបបំផុត៦០ម៉ឺនរៀលក្នុង១ខែ មន្រ្តីរាជការទទួលបានប្រាក់ខែទាបបំផុត១លានរៀលក្នុង១ខែ បញ្ចុះតម្លៃប្រេង ជីកសិកម្ម អគ្គីសនី និងបញ្ចុះអត្រាការប្រាក់ ជាដើម។ ការណ៍ដែលគណបក្សប្រជាជនកម្ពុជា យកគោលនយោបាយខ្លះរបស់គណបក្សសង្គ្រោះជាតិមកប្រើនៅពេលនេះ ក៏ព្រោះតែគោលនយោបាយនេះ មានប្រសិទ្ធភាពគ្រប់គ្រាន់ក្នុងការទាក់ទាញចំណាប់អារម្មណ៍របស់ម្ចាស់ឆ្នោត។ ម្យ៉ាងវិញទៀត ការយកពាក្យសន្យារបស់គណបក្សសង្គ្រោះជាតិមកប្រើនេះ គឺដើម្បីបញ្ជាក់ប្រាប់ម្ចាស់ឆ្នោតថា មានតែគណបក្សប្រជាជនទេ ដែលមានលទ្ធភាពអាចឆ្លើយតបទាន់ពេល ទៅនឹងតម្រូវការរបស់ពលរដ្ឋបាន។ ឯគណបក្សសង្គ្រោះជាតិ បានត្រឹមតែសន្យាខ្យល់តែប៉ុណ្ណោះ។
ម្យ៉ាងវិញទៀត គេសង្កេតឃើញថា គណបក្សប្រជាជនកម្ពុជា ចេះជ្រើសរើសឱកាសត្រឹមត្រូវក្នុងការអនុវត្តវិធានការបំពេញចិត្តពលរដ្ឋរបស់ខ្លួន។ ពេលវេលាដែលសាកសមនេះ គឺ១ឆ្នាំ មុនការបោះឆ្នោតឃុំ-សង្កាត់ និង២ឆ្នាំ មុនការបោះឆ្នោតជ្រើសតាំងតំណាងរាស្ត្រអាណតិ្តទី៦។ ការផ្គាប់ចិត្តម្ចាស់ឆ្នោត និងការឆ្លើយតបសេចក្តីត្រូវការភ្លាមៗក្នុងរយៈពេលចុងក្រោយនេះ ពិតជាពិបាកធ្វើអោយម្ចាស់ឆ្នោតភ្លេចណាស់។ ប៉ុន្តែបើធ្វើឡើងយូរពេក តាំងពីដើមអណត្តិ នោះម្ចាស់ឆ្នោតងាយនឹងភ្លេចទៅវិញ។
ប៉ុន្តែ តើបក្សប្រជាជនអាចស្តារប្រជាប្រិយភាពរបស់ខ្លួន និងអាចបន្តរក្សាអំណាចរបស់ខ្លួនបានទៀតឬទេ?
យោងតាមក្រុមអ្នកវិភាគនយោបាយ និងមន្ត្រីសង្គមស៊ីវិលមួយចំនួន យុទ្ធសាស្ត្រផ្គាប់ចិត្តរាស្ត្រ របស់គណបក្សប្រជាជនកម្ពុជាក្នុងរយៈពេលចុងក្រោយនេះ គឺធ្វើឡើងដើម្បីឆ្លើយតបនៅនឹងតម្រូវការរបស់ប្រជាពលរដ្ឋក្នុងរយៈពេលខ្លីតែប៉ុណ្ណោះ ហើយវាក៏មិនមែនជាគោលនយោបាយយូរអង្វែងនោះដែរ។ សម្រាប់អ្នកវិភាគ ការឆ្លើយតបទៅនឹងតម្រូវការខ្លះ មិនមានអំណាចគតិយុត្តដែលអាចអនុវត្តបានភ្លាមៗឡើយ។ ឧទាហរណ៍ដូចជា ការលុបចោលប័ណ្ណបើកបរម៉ូតូ ដែលទាមទារអោយមានការធ្វើវិសោធន៍កម្មច្បាប់។ ឯការឆ្លើយតបខ្លះទៀត មានភាពលម្អៀងនៅលើអ្នកមានលុយ និងមានអំណាច ហើយអាចអោយរដ្ឋខាតបង់ចំណូលផងក៏ថាបាន។ ឧទាហរណ៍ដូចជា ការព្យួរការបង់ពន្ធ និងការផ្ទេរកម្មសិទ្ធិ ជាដើម។
ជាការពិត ដើម្បីស្តារប្រជាប្រិយភាពឡើងវិញ ក្នុងគោលដៅដើម្បីបង្កើនការគាំទ្រក្នុងចំណោមម្ចាស់ឆ្នោត គណបក្សប្រជាជនកម្ពុជា ត្រូវព្យាបាលដំបៅសង្គមដែលឈឺរ៉ាំរ៉ៃច្រើនឆ្នាំមកហើយ។ ការព្យាបាលជំងឺសង្គមទាំងនោះ រួមមាន ការដោះស្រាយបញ្ហាព្រំដែនជាមួយប្រទេសជិតខាង បញ្ហាជនអន្តោប្រវេសន៍ខុសច្បាប់ ជម្លោះដីធ្លី ការលុបបំបាត់អំពើពុករលួយ បញ្ហាអយុត្តិធម៌សង្គម ការលើកកម្ពស់វិស័យសុខាភិបាល និង អប់រំជាដើម។
ម្យ៉ាងវិញទៀត ចូរកុំភ្លេចថា ២២កៅអីដែលបានទៅគណបក្សសង្គ្រោះជាតិ ក៏មានការបោះឆ្នោតអោយ ដោយអ្នកដែលធ្លាប់ស្មោះស្ម័គ្រនឹងគណបក្សប្រជាជនកម្ពុជាផងដែរ។ ដូច្នេះ ក្រៅតែពីការផ្គាប់ចិត្ត ឬបំពេញសេចក្តីត្រូវការរបស់ប្រជាពលរដ្ឋភ្លាមៗហើយនោះ គណបក្សនេះត្រូវតែកសាងទំនុកចិត្ត និងប្រជាប្រិយភាពឡើងវិញ ក្នុងចំណោមមន្ត្រី និងអ្នកធ្លាប់គាំទ្រខ្លួនផងដែរ។
រយៈពេល១ឆ្នាំ ឬ២ឆ្នាំទៅមុខទៀត មិនយូរនោះទេ។ ដូច្នេះគណបក្សប្រជាជនត្រូវពិនិត្យឡើងវិញជាបន្ទាន់នូវអ្វីដែលជាតម្រូវការពិតប្រាកដ និងជាអាទិភាពរបស់ម្ចាស់ឆ្នោត ហើយត្រូវឆ្លើយតបអោយបានពេញលេញ។ បើពុំនោះសោតទេ គណបក្សប្រជាជនកម្ពុជា នឹងអាចបន្តបាត់បង់អសនៈរបស់ខ្លួនបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ