គណបក្សកាន់អំណាច និងគណបក្សប្រឆាំងអួតគោលនយោបាយគ្នាមុនការបោះឆ្នោតឃុំ-សង្កាត់អាណត្តិទី ៤
គណបក្សដែលកំពុងមានអាសនៈនៅក្នុងរដ្ឋសភាទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ បានចេញផ្សាយដល់សាធារណៈជនដូចគ្នា នូវគោលនយោបាយរបស់ខ្លួន ដែរ ដោយគណៈបក្សសង្គ្រោះជាតិមាន ៥ចំណុច និងគណបក្សប្រជាជនមាន ១៣ចំណុច។ ការបង្ហាញពីគោលនយោបាយរបស់គណបក្ស ដែលជាគូប្រឆាំងគ្នាទាំងពីរ ខណៈដែលការបោះឆ្នោតជ្រើសរើសក្រុមប្រឹក្សាឃុំ សង្កាត់ នឹងឈានមកដល់នៅថ្ងៃទី ៤ខែមិថុនាខាងមុខ។
ចុះផ្សាយនៅថ្ងៃ៖
ស្តាប់ - ០២:៤៣
ក្នុងចំណោមគោលនយោបាយទាំង ១៣ ចំណុចនេះ គណបក្សប្រជាជន កម្ពុជាបានផ្តោតច្រើនជាងគេទៅលើ បច្ចុប្បន្នភាពនៃការងាររដ្ឋាភិបាលដូចជាបញ្ហាហិរញ្ញវត្ថុ ដោយឃុំ សង្កាត់ ទទួលបានធនធានហិរញ្ញវត្ថុមិនតិចជាង ២,៨% នៃចំណូលចរន្តថវិកាជាតិប្រចាំឆ្នាំ។ ចំណុចនេះ គោលនយោបាយគណបក្សសង្គ្រោះជាតិ ក៏បានលើកឡើងដែរ តែនិយាយពី វិមជ្ឈការ ដែលរួមមាន ៣ចំណុចគឺ ធ្វើវិមជ្ឈការអំណាចដល់ ឃុំ- សង្កាត់។ វិមជ្ឈការថវិកា គឺផ្តល់ថវិកាយ៉ាងតិច ៥០០.០០០ដុល្លារ សម្រាប់ឃុំ-សង្កាត់នីមួយៗ ក្នុងមួយឆ្នាំស្មើនឹងប្រមាណ ២០%នៃថវិកាជាតិ។វិមជ្ឈការសាធារណៈក្នុង វិស័យអាទិភាព ដូចជា អប់រំ សង្គមកិច្ច ប្រព័ន្ធទឹកស្អាត ផ្លូវឃុំ-សង្កាត់ និងផ្តល់អ្នកជំនាញបច្ចេកទេសកសិកម្ម សុខាភិបាលជាដើម។
ជាមួយគ្នានេះ គោលនយោបាយគណបក្សប្រជាជនឲ្យដឹងទៀតថា មានការគាំទ្រពីរដ្ឋដើម្បីធានាការបង្កើនផលិតកម្ម និងការរកទីផ្សារដើម្បីលក់កសិផលក្នុងតម្លៃសមរម្យ និង ការខិតខំកាត់បន្ថយអត្រាការប្រាក់ក្នុងមីក្រូហិរញ្ញវត្ថុឲ្យស្ថិតក្នុង កម្រិតសមរម្យ និងពង្រឹងកិច្ចការពារប្រជាជនក្រីក្រដែលជាអ្នកខ្ចីប្រាក់ពី ស្ថាប័នហិរញ្ញវត្ថុ ក៏ត្រូវបានលើកឡើងផងដែរ។
ក្រៅពីនេះ គណបក្សកាន់អំណាចក៏បាននិយាយពីការផ្តល់ដីដល់ប្រជាជនដើម្បីសង់លំនៅដ្ឋាន និងបង្កបង្កើនផល តាមរយៈការអនុវត្ត កម្មវិធីសម្បទានដីសង្គមកិច្ច។ ការផ្តល់សេវាអត្រានុកូលដ្ឋានជូនប្រជាជន ដោយមិនគិតថ្លៃ។ ផ្តល់សេវា ពិនិត្យ និងព្យាបាលជំងឺ កាន់តែល្អប្រសើរ តាមមណ្ឌលសុខភាព និងមន្ទីរពេទ្យរបស់រដ្ឋ។ ប្រជាជនក្រីក្រនិងអ្នកខ្វះលទ្ធភាព ទទួលបានសេវាពិនិត្យ និងព្យាបាលជំងឺដោយឥតបង់ថ្លៃតាមមណ្ឌលសុខភាព និងមន្ទីរពេទ្យរបស់រដ្ឋ។
គិតគូរលើវិស័យអប់រំ ជម្រុញ ការអនុវត្តប្រព័ន្ធទឹកស្រោចស្រពដំណាំ និងទឹកស្អាតសម្រាប់ប្រើប្រាស់ក្នុងជីវភាពរស់នៅគ្រប់ឃុំ-សង្កាត់។ ការតបណ្តាញអគ្គិសនីគ្រប់ភូមិ និងតម្លៃថោក។ការស្ថាបនាផ្លូវ កសាងឃុំ-សង្កាត់នៅជាប់ព្រំដែន ទៅជាឃុំ-សង្កាត់ប្រកបដោយសន្តិភាព និងការអភិវឌ្ឍ។ រក្សាសិទ្ធិកាន់កាប់ ប្រើប្រាស់ និងអាស្រ័យផល ទៅកូនចៅ ឬអ្នកដទៃបាន ដោយមិនមានកំណត់អាណត្តិ និងគោលនយោបាយភូមិ ឃុំ មានសុវត្ថិភាព។ គណបក្សប្រឆាំងវិញ បញ្ជាក់ចំណុចនេះថាជាការពង្រឹងប្រសិទ្ធភាព និងលើកកម្ពស់ការងារនគរបាលឃុំ-សង្កាត់ប្រកបដោយសុវត្ថិភាព គ្មានគ្រឿងញៀន និងអំពើហិង្សា។
ដោយឡែក គោលនយោបាយគណបក្សសង្គ្រោះជាតិវិញ សេវាសាធារណៈ ផ្តល់លិខិតស្នាមផ្សេងៗដោយមិនរើសអើង ស្អាតស្អំ និងទាន់ពេលកំណត់។ព្រមទាំងបង្កើតមូលនិធិសម្រាប់ជនងាយរងគ្រោះ ត្រូវបានលើកឡើង ជាមួយនឹងការពង្រឹងសិទ្ធិអំណាចប្រជាពលរដ្ឋ ដោយផ្តល់ឱកាសនិងលើកទឹកចិត្តប្រជាពលរដ្ឋ បង្កើតសហគមន៍ ផ្តល់យោបល់ វាយតម្លៃ និងចូលរួមសេចក្តីសម្រេចនានាក្នុងឃុំ-សង្កាត់។
គណបក្សប្រឆាំងក៏បានបន្ថែមពីការលើកកម្ពស់ប្រជាពលរដ្ឋ និងអភិវឌ្ឍន៍តាមរយៈការពារកម្មសិទ្ធិដីធ្លីស្របច្បាប់ និងមិនចុះហត្ថលេខាលើការវិនិយោគ ឬសម្បទានណា ដែលប៉ះពាល់ផលប្រយោជន៍ជាតិ និងប្រជាពលរដ្ឋ។ ប្រឹក្សាយោបល់ និងផ្តល់ព័ត៌មានជូនប្រជាពលរដ្ឋពាក់ព័ន្ធនឹងការខ្ចីបុលនិងទីផ្សារ កសិផល។ អភិវឌ្ឍន៍ និងវិនិយោគដោយផ្តល់ផលប្រយោជន៍ជាអាទិភាពដល់ប្រជាពលរដ្ឋក្នុងឃុំ-សង្កាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ