អ្នកវិភាគសេដ្ឋកិច្ចចាត់ទុកការសម្រេចបន្ថយពន្ធនាំចេញលើកៅស៊ូ អាចជួយកំណើនសេដ្ឋកិច្ច
នៅថ្ងៃទី០៤ ខែមិនា រាជរាដ្ឋាភិបាលកម្ពុជា បានចេញអុនក្រិត្យមួយស្តីពីការកែសម្រួលអត្រាអាករនាំចេញលើមុខទំនិញកៅស៊ូ។ ការណ៍នេះ បានធ្វើឲ្យអ្នកវិភាគសេដ្ឋកិច្ចចាត់ទុកថា ជាការចូលរួមធ្វើឲ្យកំណើនសេដ្ឋកិច្ចកម្ពុជាមានការកើនឡើងបន្ថែមទៀត ខណៈតម្លៃកៅស៊ូនៅក្នុងប្រទេសកម្ពុជាកំពុងតែបន្តធ្លាក់ថ្លៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ការកែសម្រួលអត្រាអាករនាំចេញលើមុខទំនិញកៅស៊ូរបស់រាជរដ្ឋាភិបាលកម្ពុជា ត្រូវបានអ្នកវិភាគសេដ្ឋកិច្ច លោក បណ្ឌិតកង ចន្ទតារារ័ត្ន មើលឃើញថាអាចបង្កើនសមត្ថភាពក្នុងការប្រកួតប្រជែងរបស់អ្នកដាំកៅស៊ូ និងផ្តល់ផលប្រយោជន៍ដល់អ្នកដាំ បើទោះបីជាតម្លៃកៅស៊ូនៅដដែលតែតម្លៃពន្ធនាំចេញត្រូវបានបន្ថយ។
តម្លៃកៅស៊ូនៅកម្ពុជាបានធ្លាក់ចុះជាបន្តបន្ទាប់ ចាប់តាំងពីឆ្នាំ២០១២មក ដែលធ្វើឲ្យម្ចាស់ចម្ការកៅស៊ូតូចៗនៅក្នុងប្រទេសកម្ពុជាបានបិទ ហើយបច្ចុប្បន្ននេះ គឺនៅសល់តែចំការកៅស៊ូ កសិឧស្សាកម្មធំៗតែប៉ុណ្ណោះ។ លោក ប៉ុល សុផា ជាប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានកៅស៊ូនៃក្រសួងកសិកម្ម បានបញ្ជាក់ប្រាប់វិទ្យុបារាំងអន្តរជាតិថាតម្លៃកៅស៊ូនៅតែមិនល្អដដែលសម្រាប់ដើមឆ្នាំ២០១៦នេះ ពោលគឺកៅស៊ូមួយតោនមានតម្លៃប្រហាក់ប្រហែល១១០០ដុល្លារតែប៉ុណ្ណោះ។
បើតាមអនុក្រិត្យស្តីពីការកែសម្រួលអត្រាអាករនាំចេញលើមុខទំនិញកៅស៊ូ ដែលមាន៣មាត្រនេះ បានកំណត់ថា កៅស៊ូក្នុងមួយតោន បើមានតម្លៃគិតអាករនាំចេញទាបជាង១០០០ដុល្លារ នោះពុំជាប់អាករនាំចេញទេ។ តម្លៃគិតអាករនាំចេញចាប់ពី១០០០ដុល្លារ ហើយក្រោម២០០០ដុល្លារ ត្រូវបង់អាករនាំចេញ៥០ដុល្លារក្នុងមួយតោន។ បើតម្លៃគិតអាករនាំចេញចាប់ពី២០០០ដុល្លារ តែទាបជាង ៣០០០ដុល្លារអាមេរិកក្នុងមួយតោន នោះត្រូវជាប់អាករនាំចេញ ១៥០ដុល្លារអាមេរិក។ បើតម្លៃគិតអាករនាំចេញចាប់ពី៣០០០ដុល្លារ តែទាបជាង ៤០០០ដុល្លារអាមេក្នុងមួយតោន នៅជាប់អាករនាំចេញ ២០០ដុល្លារអាមេរិក។ បើតម្លៃគិតអាករនាំចេញចាប់ពី៤០០០ដុល្លារ នោះចាប់អាករនាំចេញ២០០ដុល្លារក្នុងមួយតោន។
លោក ប៉ុល សុផា ជាប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានកៅស៊ូនៃក្រសួងកសិកម្ម បានបន្ថែម ថាដើម្បីធ្វើឲ្យតម្លៃកៅស៊ូឡើងថ្លៃឡើងវិញ គឺរដ្ឋាភិបាលកម្ពុជាបានដាក់ចេញគោលការណ៍អភិវឌ្ឍឧស្សហកម្ម ហើយប្រសិនបើគោលការណ៍នេះដំណើរការស្រួល នោះតម្លៃកៅស៊ូអាចនឹងប្រសើរឡើងវិញ។
យោងតាមរបាយការណ៍ ការងារកសិកម្មឆ្នាំ២០១៤-២០១៥ បានឲ្យដឹងថា ការនាំចេញផលិផលកៅស៊ូរបស់កម្ពុជារវាងឆ្នាំ២០១៣ និង២០១៤ មានការកើនឡើង១៦,៣៨ភាគរយ ប៉ុន្តែចំនួនទឹកប្រាក់ដែលទទួលបានពីការនាំចេញកៅស៊ូមានការថយចុះ ប្រមាណ១៨,៦១ភាគរយ ការថយចុះនេះ ត្រូវបានក្រសួងកសិកម្មបញ្ជាក់ថាដោយសារតែតម្លៃកៅស៊ូនាំចេញលើទីផ្សារអន្តរជាតិធ្លាក់ចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ