ក្រសួងពាណិជ្ជកម្មមិនបានចេញរបាយការណ៍ ពីការបិទរោងចក្រកាត់ដេរចំនួន១៣០ នៅកម្ពុជា ក្នុងឆ្នាំ២០១៥នោះទេ
កាលពីសប្តាហ៍មុននេះ មានកាសែតក្នុងស្រុកមួយបានចុះផ្សាយថា ក្នុងឆ្នាំ២០១៦នេះ អាចនឹងមានក្រុមហ៊ុន និងរោងចក្រកាត់ដេរសម្លៀកបំពាក់ចំនួន ១៥០ គ្រោងនឹងបិទទ្វារ ដោយលើកហេតុផលថាមកពីមានការប្រកួតប្រជែងទាប និងការដំឡើងប្រាក់ឈ្នួលគោលជាដើម។ កាសែតមួយនោះបានបន្តទៀតថា យោងតាមក្រសួងពាណិជ្ជ កាលពីឆ្នាំ២០១៥ មានរោងចក្រកាត់ដេរចំនួន ១៣០បានបិទទ្វារជាស្ថាពរ។ ប៉ុន្តែឆ្លើយតបនឹងការលើកឡើងនេះ មន្ត្រីខាងក្រសួងពាណិជ្ជកម្មបានបញ្ជាក់ផ្ទុយពីការលើកឡើងរបស់កាសែតក្នុងស្រុកមួយនេះ ដោយថា ខាងក្រសួងពុំបានដឹងពីរបាយការណ៍នោះទេ។
ចុះផ្សាយនៅថ្ងៃ៖
ស្តាប់ - ០១:៤៦
លោកហូ ស៊ីវយ៉ុង ប្រធាននាយកដ្ឋាននាំចូល នាំចេញនៅក្រសួងពាណិជ្ជកម្មកម្ពុជា បានបញ្ជាក់ប្រាប់វិទ្យុបារាំងថា កន្លងមកក្រសួងមិនដែលបានដឹងពីរបាយការណ៍ស្តីពីការបិទរោងចក្រនៅកម្ពុជានោះទេ ព្រោះថាប្រសិនបើមាននោះ រោងចក្រទាំងអស់នោះ ត្រូវតែធ្វើការលុបបញ្ជីរបស់ខ្លួននៅក្រសួងពាណិជ្ជកម្ម ជាមុនសិនមុននឹងប្រកាសបិទទ្វារជាសាធារណៈ។
ដោយឡែកលោក កាំង មូនីកា អ្នកនាំពាក្យសមាគមរោងចក្រកាត់ដេរកម្ពុជាGMAC បានលើកឡើងថាលោកក៏មិនច្បាស់នឹងតួលេខនៃចំនួនរោងចក្រដែលបិទទ្វារកាលពីឆ្នាំ២០១៥ ហើយគ្រោងនឹងបិទទ្វារក្នុងឆ្នាំ២០១៦នេះដែរ។ ប៉ុន្តែលោកបានបញ្ជាក់ថា វាអាចនឹងមានរោងចក្រកាត់ដេរជាប់កិច្ចសន្យាជួលបន្តតូច ឬ Sub Contract Company ត្រូវបានបិទទ្វារដែរ ដោយសារតែមានការប្រគួតប្រជែងពីកម្លាំងពលកម្ម។ ហើយលោកក៏បានបន្តទៀតថា កត្តាប្រគួតប្រជែងក្នុងតំបន់និងប្រទេសជិតខាងដូចជាវៀតណាម និងភូមាជាដើមនោះ អាចនឹងឲ្យរោងចក្រកាត់ដេរតូចនៅកម្ពុជាប្រឈមនឹងការបិទទ្វារផងដែរ។ រោងចក្រកាត់ដេរដែលលោកកាំង មូនីកា បានលើកឡើងនេះ គឺជារោងចក្រមួយដែលមានកម្មករ កម្មការនីប្រមាណពី១០០ ដល់ ៥០០នាក់ ធ្វើការនៅក្នុងមួយរោងចក្រតូចៗនោះ។
សូមបញ្ជាក់ផងដែរ របាយការណ៍ផ្លូវការរបស់ក្រសួងពាណិជ្ជកម្មចេញផ្សាយក្នុងរយៈពេល១០ខែដំបូងក្នុងឆ្នាំ ២០១៥ បង្ហាញឲ្យដឹងថាការនាំចេញសម្លៀកបំពាក់របស់កម្ពុជា ទៅកាន់ទីផ្សារបរទេសគឺមានការកើនឡើង ដោយនៅក្នុងនោះ ទីផ្សាសហគមន៍អឺរ៉ុបមានចំនួនជិត២១ភាគរយ ប្រៀបធៀបនិងឆ្នាំ២០១៤ ទីផ្សារកាណាដាមានចំនួនជិត១៣ភាគរយ ប៉ុន្តែទីផ្សារអាមេរិកធ្លាក់ចុះជិត៥ភាគរយវិញ។ គួរជម្រាបជូនផងដែរថា ក្រុមហ៊ុនកាត់ដេរនៅកម្ពុជាមានចំនួនជាង៨០០ ហើយនៅក្នុងនោះមានមនុស្សជាង៨០ម៉ឺននាក់បម្រើការងារនៅក្នុងវិស័យនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ