នាយឧត្តមសេនីយ៍យោធាម្នាក់ទៀត អំពាវនាវឲ្យកងទ័ពត្រៀមខ្លួនអនុវត្តបទបញ្ជាការពារការប៉ុនប៉ងផ្តួលរំលំរដ្ឋាភិបាល
លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា បានអំពាវនាវនៅថ្ងៃទី៣កញ្ញានេះ ឲ្យកងកម្លាំងប្រដាប់អាវុធទាំងអស់ ត្រៀមខ្លួនអនុវត្តបទបញ្ជាថ្នាក់លើ ក្នុងការកាពារ និងទប់ស្កាត់រាល់ការប៉ុនប៉ងផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត។ ប៉ុន្តែអ្នកវិភាគព្រឹត្តិការណ៍នយោបាយនៅកម្ពុជាបានចាត់ទុកសេចក្តីអំពាវនាវនេះថា គឺជាការខ្លាចស្រមោលខ្លួនឯង ហើយថា គេមិនឃើញមានសញ្ញានៃការប្តួលរំលំរដ្ឋាភិបាលនោះទេ។
ចុះផ្សាយនៅថ្ងៃ៖
ស្តាប់ - ០២:២៣
សេចក្តីអំពាវនាវរបស់លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា នៅថ្ងៃនេះ មិនបានបញ្ជាក់ថា តើនឹងមានសញ្ញានៃការកើតឡើងនូវចលនាប៉ុនប៉ងផ្តួលរំលំរដ្ឋាភិបាលនោះទេ ប៉ុន្តែបានអំពាវនាវឲ្យកងកម្លាំងប្រដាប់អាវុធទាំងអស់ត្រៀមខ្លួនឲ្យបានល្អដើម្បីអនុវត្តបទបញ្ជាថ្នាក់លើក្នុងការកាពារ និងទប់ស្កាត់រាល់ការប៉ុនប៉ងផ្តួលរំលំរាជរដ្ឋាភិបាលស្របច្បាប់ដែលកើតចេញពីការបោះឆ្នោត។
គេមិនអាចទាក់ទងសុំការពន្យល់បន្ថែមពីលោកឧបនាយករដ្ឋមន្ត្រីទៀ បាញ់ បានទេប៉ុន្តែលោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិកម្ពុជាបានចាត់ទុកសេចក្តីអំពាវនាវនេះថា គឺផ្លូវការ។ បើតាមលោក ឈុំ សុជាតិ ការអំពាវនាវនេះ ទំនងជាសំដៅទៅលើបុរស់ម្នាក់ដែលមានឈ្មោះ សោម សវុណ្ណារ៉ា ជាសមាជិកក្រុមរណសិរ្សរំដោះជាតិខ្មែរដែលបានអំពាវនាវនៅលើបណ្តាញសង្គមហ្វេសបុក កាលពីអំឡុងខែកក្កដាកន្លងទៅ ឲ្យមានការផ្តួលរំលំរដ្ឋាភិបាលកម្ពុជា។ ប៉ុន្តែបុរសម្នាក់នេះត្រូវបានគេដឹងថា បានចាកចេញពីប្រទេសកម្ពុជាទៅហើយ។
សម្រាប់អ្នកស្រាវជ្រាវសង្គមលោកបណ្ឌិត មាស នី និងអ្នកវិភាគនយោបាយលោក អ៊ូ វីរៈ បានចាត់ទុកការអំពាវនាវនេះថា ជាការខ្លាចស្រមោលខ្លួនឯង។ សម្រាប់លោក មាស នី ក្នុងកាលៈទេសៈបច្ចុប្បន្ននេះ គេមិនឃើញមានសញ្ញានៃចលនាផ្តួលរំលំរដ្ឋាភិបាលកើតឡើងនោះទេ។ ចំណែកលោក អ៊ូ វីរៈ ក៏បានចាត់ទុកការអំពាវនាវនេះថា គឺជាការបង្ហាញសាច់ដុំ និងជាការគំរាមកំហែងថ្មីមួយទៀត។
ប៉ុន្តែយ៉ាងណាក៏ដោយ នេះគឺជាការប្តេជ្ញាចិត្ត ឬការអំពាវនាវថ្មីមួយទៀតដែលចេញមកពីមន្ត្រីយោធាជាន់ខ្ពស់កម្ពុជា ក្នុងការការពាររដ្ឋាភិបាលស្របច្បាប់។ កាលពីប៉ុន្មានថ្ងៃមុននេះ នាយឧត្តមសេនីយ៍ គន់ គីម អគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទក៏បានប្តេជ្ញាចិត្តក្នុងការការពាររាល់ការប៉ុនប៉ងផ្តួលរំលំរដ្ឋាភិបាលស្របច្បាប់ផងដែរ។ មិនតែប៉ុណ្ណោះនាយឧត្តមសេនីយ៍យោធាជាន់ខ្ពស់រូបនេះ ថែមទាំងធានាជួយចាប់ខ្លួនមេដឹកនាំគណបក្សប្រឆាំង លោក សម រង្ស៊ី និងលោក កឹម សុខា ផងដែរ ប្រសិនបើមានការស្នើសុំពីតុលាការ។ ហើយប៉ុន្មានម៉ោងក្រោយពីការអំពាវនាវនោះដែរ គេបានឃើញមានការហោះហើររបស់ឧត្ថម្ភាគចក្រយោធាជាច្រើនគ្រឿង ការចល័តយោធា និងអូប័រ នៅជុំវិញទីស្នាក់ការគណបក្សសង្គ្រោះជាតិជាដើម។ ប៉ុន្តែអ្នកនាំពាក្យក្រសួងការពារជាតិ បានចេញសេចក្តីប្រកាសព័ត៌មានច្រានចោលរាល់ការបារម្ភនានាថា គឺជាការហ្វឹកហាត់របស់កងទ័ពដើម្បីការពារទឹកជំនន់តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ