កម្ពុជា-តុលាការ

សាលាក្តីខ្មែរក្រហមគ្រោងថវិកាជាង៤៦លានដុល្លារសម្រាប់ពីរឆ្នាំខាងមុខ

សាលាក្តីខ្មែរក្រហមត្រូវការទឹកប្រាក់ជាង៤៦លានដុល្លារ សម្រាប់ចំណាយរយៈពេលពីរឆ្នាំ ខាងមុខ ពោល ពីឆ្នាំ២០១៨ ដល់ឆ្នាំ២០១៩។ អ្នកនាំពាក្យសាលាក្តីខ្មែរក្រហមប្រាប់វិទ្យុបារាំង RFI ថា ថវិកាដែលគ្រោងចំណាយនៅពីរឆ្នាំខាងមុខនេះ គឺតិចជាងថវិកាដែលបានចំណាយកាលពី២ឆ្នាំកន្លងមក។

ចុះផ្សាយនៅថ្ងៃ៖ 26/12/2017 - 06:52កែប្រែថ្ងៃទី៖ 26/12/2017 - 14:02

ផ្សាយពាណិជ្ជកម្ម

ដោយ អ៊ឹង ប៊ុនថន

ការដែលតុលាការកូនកាត់មួយនេះ បន្ថយការចំណាយនៅរយៈពេលពីរឆ្នាំខាងមុខនោះ ត្រូវបាន លោក នេត ភក្រ្តា អ្នកនាំពាក្យសាលាក្តីខ្មែរក្រហម ពន្យល់ថា គឺដោយសារតែសំណុំរឿងមួយចំនួនត្រូវបានបិទបញ្ចប់ទាំងការស៊ើបអង្កេត និងបិទបញ្ចប់ទាំងសវនាការ ខណៈសំណុំរឿង០០៣ និង០០៤ក៏ត្រូវបានបិទការស៊ើបអង្កេតដែរនោះ។

បើតាម លោក នេត ភក្ត្រា អង្គជំនុំជម្រៈវិសមញ្ញក្នុងតុលាការកម្ពុជាឬហៅថាសាលាក្តីខ្មែរក្រហម កំពុងតែស្នើសុំថវិកាសរុបចំនួន ៤៦,១២លានដុល្លារ សម្រាប់ចំណាយរយៈពេលពីរឆ្នាំទៅមុខ។ ក្នុងនោះ ២៤,៧២លានដុល្លារសម្រាប់ចំណាយឆ្នាំ២០១៨ និង ២១,៤០លានដុល្លារ សម្រាប់ចំណាយឆ្នាំ២០១៩។

គម្រោងថវិកានេះត្រូវដាក់ស្នើសុំការអនុម័តពីក្រុមប្រទេសម្ចាស់ជំនួយសំខាន់ៗរួមមាន ជប៉ុន អាមេរិក បារាំង អង់គ្លេស អូស្រាលី អាឡឺម៉ង់ រួមនឹងសហភាពអ៊ឺរ៉ុប។នេះជាបញ្ជាក់របស់អ្នកនាំពាក្យដដែល។

បើទោះបីជាសហរដ្ឋអាមេរិក និងសហភាពអ៊ឺរ៉ុប ព្រមានពីការផ្តាច់ជំនួយមកកាន់ប្រទេសកម្ពុជា ដោយសារតែរំលាយគណបក្សសង្រ្គោះជាតិក៏ដោយ ប៉ុន្តែវាមិនមានការបារម្ភចំពោះការផ្តាច់ជំនួយដល់សាលាក្តីខ្មែរក្រហមនោះទេ។ នេះជាការអះអាងរបស់ លោក នេត ភក្រ្តា។

សូមបញ្ជាក់ថា ការចំណាយប្រាក់ខែនិងប្រតិបត្តិការរបស់ភាគីកម្ពុជាចំពោះសាលាក្តីខ្មែរក្រហមសម្រាប់ពីរឆ្នាំខាងមុខគឺមានជាង១១លានដុល្លារគឺតិចជាងការចំណាយរបស់ភាគីអន្តរជាតិក្នុងដំណើរការតុលាការកូនកាត់មួយនេះ។

បើតាម លោក នេត ភក្ត្រា នៅឆ្នាំ២០១៨ ភាគីកម្ពុជាត្រូវចំណាយ៥លានជាង៧សែនដុល្លារ ហើយរដ្ឋាភិបាលកម្ពុជាបានផ្តល់៤លានដុល្លារ។

កាលពីឆ្នាំ២០១៦ និងឆ្នាំ២០១៧ សាលាក្តីខ្មែរក្រហម ចំណាយទឹកប្រាក់ជិត ៦០លានដុល្លាអាមេរិកពោលច្រើនគម្រោងឆ្នាំ២០១៨ និងឆ្នាំ២០១៩ ដែលគ្រោងចំណាយជាង៤៦លានដុល្លារ។ ទោះជាយ៉ាងណាគេមិនទាន់ដឹងថា ដំណើរការទៅមុខទៀត សាលាក្តីខ្មែរក្រហមប្រឈមនឹងបញ្ហាខ្វះថវិកាទៀតឬយ៉ាងណាទេ។ប៉ុន្តែសាលាក្តីកូនកាត់មួយនេះក៏ធ្លាប់ជួបប្រទះនឹងវិបត្តិខ្វះថវិកាបើកប្រាក់ខែឲ្យបុគ្គលិកជាច្រើនដងមកហើយ ជាពិសេសភាគីកម្ពុជា៕