បោះឆ្នោតជាតិ ៖ ប្រទេសលោកសេរី ប្រកាសមិនចូលរួមសង្កេតការណ៍ ខណៈអង្គការអន្តរជាតិ រិះគន់គុណភាពអ្នកសង្កេតការណ៍
ស្ថានទូតអាមេរិកប្រចាំកម្ពុជា នៅថ្ងៃម្សិលមិញ បានប្រកាសថា រដ្ឋាភិបាលសហរដ្ឋអាមេរិក នឹងមិនបញ្ជូនអ្នកសង្កេតការណ៍ផ្លូវការណាម្នាក់ ចូលរួមសង្កេតការណ៍បោះឆ្នោតជាតិនៅកម្ពុជា នៅថ្ងៃអាទិត្យខាងមុខនេះទេ។ ចំណែកអង្គការសម្ព័ន្ធអាស៊ាន ដើម្បីការបោះឆ្នោតដោយសេរី(ANFREL) រិះគន់ការដាក់អ្នកសង្កេតការណ៍ជាតិជិត ៨ម៉ឺននាក់ និងអន្តរជាតិ ដើម្បីចូលរួមឃ្លាំមើលការបោះឆ្នោត ថាមិនអាចជឿទុកចិត្តបាន។ ជាប្រតិកម្មឆ្លើយតប គណៈកម្មាធិការជាតិរៀបចំការបោះឆ្នោត (គ.ជ.ប) ចាត់ទុកការលើកឡើងនេះថា មានលក្ខណៈរើសអើង និងបន្តុះបង្អាប់ ដល់ដំណើរការបោះឆ្នោតនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:២៦
ស្ថានទូតអាមេរិកប្រចាំកម្ពុជា នៅថ្ងៃទី ២៥ ខែកក្កដា បានប្រកាសលើទំព័រហ្វេសប៊ុកថា «គ្មានភ្ញៀវ ឬអ្នកសង្កេតការណ៍ផ្លូវការណាម្នាក់មកពីរដ្ឋាភិបាលសហរដ្ឋអាមេរិកនឹងចូលរួមសង្កេតការណ៍បោះឆ្នោតជាតិនៅកម្ពុជា នៅថ្ងៃទី២៩ ខែកក្កដា ឆ្នាំ២០១៨ទេ»។ ជាការសម្រេចចិត្តដែលធ្វើឡើងស្របតាមសេចក្តីថ្លែងការណ៍របស់សហរដ្ឋអាមេរិក តាំងពីខែវិច្ឆិកា ឆ្នាំ២០១៧ ដែលបានសម្ដែងកង្វល់យ៉ាងជ្រាលជ្រៅចំពោះការវិវត្តផ្នែកនយោបាយនៅកម្ពុជា។
ការប្រកាសមិនបញ្ជូនអ្នកសង្កេតការណ៍មកឃ្លាំមើលការបោះឆ្នោតនៅកម្ពុជារបស់រដ្ឋាភិបាលអាមេរិក នាពេលនេះ ធ្វើឡើងដំណាលគ្នានឹងប្រទេសជប៉ុន ដែលជាម្ចាស់ជំនួយដ៏សំខាន់ នៅក្នុងបោះឆ្នោតនៅកម្ពុជា។ ទោះបីជាមិនបញ្ជូនអ្នកសង្កេតការណ៍មកឃ្លាំមើលដំណើរការបោះឆ្នោតក៏ពិតមែន ប៉ុន្តែអ្នកនាំពាក្យរដ្ឋាភិបាលជប៉ុន អះអាងថា ជប៉ុនបានបញ្ជូនអ្នកជំនាញជាច្រើនមកកម្ពុជា ក៏ដូចជាផ្ដល់ជំនួយបច្ចេកទេសដល់ការបោះឆ្នោតឆ្នាំ២០១៨នេះ។
សម្រាប់ការបោះឆ្នោតជ្រើសតាំងតំណាងរាស្រ្តនៅចុងសប្តាហ៍នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលស្គាល់អ្នកសង្កេតការណ៍ជាតិចំនួន ៨ម៉ឺននាក់ មកពីគណបក្សនយោបាយ និងអង្គការសង្គមស៊ីវិល ព្រមទាំង អ្នកសង្កេតការណ៍អន្តរជាតិ ចំនួន២២០នាក់ មកពីតំណាង អង្គការ ស្ថាប័ន និងប្រទេសចំនួន៥២ ជុំវិញពិភពលោក ដើម្បីឃ្លាំមើលដំណើរការបោះឆ្នោត។
យ៉ាងណាក៏ដោយ នាយិកាប្រតិបត្តិអង្គការសម្ព័ន្ធអាស៊ានដើម្បីការបោះឆ្នោតដោយសេរី ហៅកាត់ថា (ANFREL) នៅក្នុងសន្និសីទកាសែតមួយ កាលពីថ្ងៃអង្គារ បានរិះគន់ ការដាក់អ្នកសង្កេតការណ៍ជាតិជិត ៨ម៉ឺននាក់ថា មិនអាចជឿទុកចិត្តបាន ដោយថា ពួកគេមានប្រភពមកពីគណបក្សកាន់អំណាច និងគ្មានជំនាញច្បាស់លាស់។
មិនត្រឹមតែប៉ុណ្ណោះ នាយិកាអង្គការ ANFREL បានចោទសួរពីសមត្ថភាព និងជំនាញនៃការវាយតម្លៃបោះឆ្នោតរបស់ក្រុមអ្នកសង្កេតការណ៍អន្ដរជាតិ ដែលគ្រោងមកសង្កេតការណ៍បោះឆ្នោតនៅកម្ពុជានាពេលខាងមុខ។ និងថាពួកគេភាគច្រើន គ្មានបទពិសោធន៍ក្នុងការសង្កេតការណ៍បោះឆ្នោតតាមបែបប្រជាធិបតេយ្យនោះឡើយ។
ទោះបីជាយ៉ាងណាក៏ដោយ អ្នកនាំពាក្យ គ.ជ.ប លោក ហង្ស ពុទ្ធា បានហៅការរិះគន់របស់នាយិការអង្គការ ANFREL ថា មានលក្ខណៈរើសអើង និងបន្តុះបង្អាប់ ដល់ដំណើរការបោះឆ្នោតនៅកម្ពុជា។ លោកថា គ.ជ.ប បានផ្ដល់វគ្គបណ្ដុះបណ្ដាលជំនាញទាក់ទងនឹងការបោះឆ្នោត បើទោះបីពួកគេមិនធ្លាប់ចូលរួមសង្កេតការណ៍បោះឆ្នោតក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ