ចំនួនអ្នកសង្កេតការណ៍អន្តរជាតិមានការកើនឡើងបើធៀបនឹងការបោះឆ្នោតមុនៗនៅកម្ពុជា
ចំនួនអ្នកសង្កេតការណ៍អន្តរជាតិដែលត្រៀមឃ្លាំមើលដំណើរការបោះឆ្នោតនៅថ្ងៃទី២៩ខែកក្កដាខាងមុខនេះ មានចំនួន២២០នាក់ មកពីតំណាង អង្គការ ស្ថាប័ន និងប្រទេសចំនួន៥២ ជុំវិញពិភពលោក។ ចំនួននេះត្រូវបានគេចាត់ទុកថា មានការកើនឡើងបើធៀបនឹងការបោះឆ្នោតកាលពីអាណត្តិមុនៗ ខណៈការបោះឆ្នោតជាតិឆ្នាំ២០១៣ មានអ្នកសង្កេតការណ៍ចំនួន២០០នាក់ចូលរួម។
ចុះផ្សាយនៅថ្ងៃ៖
ស្តាប់ - ០២:០៦
លោក កឹមរ័ត្ន វិសិដ្ឋ ប្រធានក្រុមប្រឹក្សាភិបាល នៃវេទិកាសម្ព័ន្ធសង្គមស៊ីវិលបានលើកឡើងនៅក្នុងសន្និសីទកាសែត កាលពីល្ងាចថ្ងៃទី២៤ខែកក្កដាថា ចំនួនអ្នកសង្កេតការណ៍អន្តរជាតិមានការកើនឡើង បើធៀបនឹងការបោះឆ្នោតនៅអាណត្តិមុនៗ។ ចំនួនដ៏ច្រើននេះទំនងជាដោយសារតែមានការលើកឡើងថា ការបោះឆ្នោតនៅកម្ពុជាក្លែងក្លាយ ជាហេតុធ្វើឲ្យគេចង់មកមើលដោយផ្ទាល់។
លោក កឹមរ័ត្ន វិសិដ្ឋ គូសបញ្ជាក់ថា អង្គការ ស្ថាប័នអន្តរជាតិ ដែលនឹងចូលរួមសង្កេតការណ៍ការបោះឆ្នោតនៅកម្ពុជានាពេលនេះ មានបទពិសោធន៍ចូលរួមសង្កេតការណ៍បោះឆ្នោតនៅប្រទេសជាច្រើន ទូទាំងពិភពលោក។ ក្រោយដំណើរការឃ្លាំមើលការបោះឆ្នោត អ្នកសង្កេតការណ៍អន្តរជាតិទាំងនោះមានសិទ្ធិពេញលេញនៅក្នុងការចេញសេចក្ដីថ្លែងការណ៍ ដោយគ្មានការបង្ខិតបង្ខំ និងការគំរាមកំហែងឡើយ ជុំវិញដំណើរការបោះឆ្នោតនៅកម្ពុជា។
សូមបញ្ជាក់ថា អ្នកសង្កេតការណ៍អន្តរជាតិទាំង២២០នាក់នេះ មានប្រភពមកពីអង្គការអ្នកប្រជាធិបតេយ្យនិយមកណ្តាលអន្តរជាតិ (CDI) សន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) អង្គការអ្នកប្រជាធិបតេយ្យនិយមកណ្ដាលអាស៊ី-ប៉ាស៊ីហ្វិក (CAPDI) អង្គការសមាគមសភាអាស៊ី (APA) និងអង្គការសមាគមអន្តរសភាអាស៊ាន (AIPA) ជាដើម។
ចំពោះបេសកកម្មដាច់ដោយឡែក អ្នកសង្កេតការណ៍អន្តរជាតិទាំងនេះ នឹងមានឱកាសជួបពិភាក្សាការងារជាមួយថ្នាក់ដឹកនាំសំខាន់ៗរបស់កម្ពុជារួមមាន៖ លោកនាយករដ្ឋមន្ត្រី ហ៊ុន សែន និងលោកឧបនាយករដ្ឋមន្ត្រី ស ខេង ជាដើម។ ក្រៅពីថ្នាក់ដឹកនាំជាន់ខ្ពស់ ពួកគេនឹងបន្តជួបគណបក្សនយោបាយមួយចំនួនក្នុងចំណោមគណបក្សទាំង២០ដែលចូលរួមប្រកួតប្រជែងនៅក្នុងការបោះឆ្នោតជាតិឆ្នាំ២០១៨នេះ។
គួររំឮកថា ក្រៅពីអ្នកសង្កេតការណ៍ជាតិអន្តរជាតិដែលមានចំនួនជាង២០០ គណៈកម្មាធិការជាតិរៀបចំការបោះឆ្នោតហៅកាត់ថា គជប បានទទួលស្គាល់អ្នកសង្កេតការណ៍ជាតិចំនួន ៨ម៉ឺននាក់ មកពីគណបក្សនយោបាយ និងអង្គការសង្គមស៊ីវិលជាដើម។ បើតាមគណៈកម្មាធិការជាតិរៀបចំការបោះឆ្នោត ចំនួនអ្នកសង្កេតការណ៍ជាតិមានការកើនឡើងទ្វេដង បើធៀបការបោះឆ្នោតឆ្នាំ២០១៣។ ការបោះឆ្នោតឆ្នាំ២០១៣ ដែលមានអ្នកសង្កេតការណ៍ជាតិតែចំនួនជាង៤ម៉ឺននាក់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ