អង្គការឃ្លាំមើលការបោះឆ្នោតថា ពលរដ្ឋចុះឈ្មោះបោះឆ្នោតតិចមកពីបរិយាកាសនយោបាយ
គិតត្រឹមថ្ងៃទី០៩ ខែតុលា គឺនៅសល់តែ៣១ថ្ងៃទៀតប៉ុណ្ណោះ ការចុះឈ្មោះបោះឆ្នោត ក្នុងបញ្ជីបោះឆ្នោតថ្មី ឆ្នាំ២០១៧ និងការធ្វើបច្ចុប្បន្នភាពបញ្ជីបោះឆ្នោត ឆ្នាំ២០១៦ នឹងត្រូវបញ្ចប់។ ប៉ុន្តែចំនួនអ្នកមកចុះឈ្មោះបោះឆ្នោតថ្មីទើបបានតែជាង៣០ម៉ឺននាក់ប៉ុណ្ណោះ ខណៈចំនួនអ្នកមិនមានឈ្មោះក្នុងបញ្ជីបោះឆ្នោតមានរហូតដល់ជាង១លាននាក់។ អង្គការឃ្លាំមើលការបោះឆ្នោត និយាយថាការដែលពលរដ្ឋទៅចុះឈ្មោះតិចអាចមកពីបរិយាកាសនយោបាយ តែគជប បដិសេធការលើកឡើងនេះ។
ចុះផ្សាយនៅថ្ងៃ៖
ស្តាប់ - ០១:៣៥
អត្ថបទដោយ៖ អ៊ឹង ប៊ុនថន
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ ដើម្បីបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និចហ្វិច លោក សំ គន្ធាមី អះអាងថា លោកមានការព្រួយបារម្ភចំពោះចំនួនអ្នកចុះឈ្មោះបោះឆ្នោត ដែលមានចំនួនតិចនៅឡើយ។ បញ្ហានេះត្រូវលោក សំ គន្ធាមី យល់ថា បណ្តាលមកពីកត្តាព្រឹត្តិការណ៍នយោបាយថ្មីៗនេះ។ ព្រឹត្តិការណ៍នយោបាយកម្ពុជាបច្ចុប្បន្ន បានត្រូវបានអ្នកតាមដាននយោបាយនានាមើលឃើញថា បានឡើងកំដៅយ៉ាងខ្លាំង ខណៈការបោះឆ្នោតជ្រើសរើសសមាជិកសភានីតិកាលទី៦ នៅសល់ពេល១ឆ្នាំទៀត។
ក៏ប៉ុន្តែអ្នកនាំពាក្យ គជប លោក ហង្ស ពុទ្ធា មានប្រសាសន៍ថា ការដែលចំនួនអ្នកចុះឈ្មោះបោះឆ្នោតបានតិចដោយសារពលរដ្ឋដែលអត់ទាន់ចុះឈ្មោះភាគច្រើននៅក្រៅប្រទេស ហើយពលរដ្ឋមួយចំនួនទៀតអាចថាពួកគេរង់ចាំរហូតជិតដល់ថ្ងៃបិទបញ្ចប់ទើបសម្រុកមកចុះឈ្មោះ។ នេះជាបទពិសោធន៍កន្លងមក។
សូមបញ្ជាក់ថា ស្ថិតក្នុងបរិបថចំនួនអ្នកចុះបោះឆ្នោត មានតិចជាងការរំពឹងទុកនេះ គ.ជ.ប បានស្នើភាគីអន្ដរជាតិជួយជាថវិកាសម្រាប់ផ្សព្វផ្សាយ ដើម្បីទាក់ទាញពលរដ្ឋឲ្យមកចុះឈ្មោះបោះឆ្នោតឲ្យបានច្រើន។ ហើយសហគមន៍អន្តរជាតិបានសន្យាផ្តល់ជំនួយដើម្បីជំរុញឲ្យពលរដ្ឋទៅចុះឈ្មោះបោះឆ្នោតនៅកម្ពុជា។
តាមទិន្នន័យរបស់គ.ជ.បគឺមានពលរដ្ឋខ្មែរដែលទើបគ្រប់អាយុ១៨ឆ្នាំនិងអ្នកត្រូវបានផ្លាស់ប្តូរទីលំនៅ ហើយត្រូវទៅចុះឈ្មោះបោះឆ្នោតថ្មី មានរហូតដល់១លានជាង៦សែននាក់នៅឆ្នាំ២០១៧នេះ។ បើតាម លោក ហង្ស ពុទ្ធា ការធ្វើបច្ចុប្បន្នភាពបញ្ជីឈ្មោះបោះឆ្នោតដែលបានចាប់ផ្តើមតាំងពីថ្ងៃទី០១ ខែកញ្ញា មកដល់ថ្ងៃម្សិលមិញ គឺមានអ្នកចុះឈ្មោះថ្មីបានតែ៣០ម៉ឺននាក់ ពោលស្មើនឹងជាង២០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ