កម្ពុជាប្រកាសមិនជួលនាវាផលិតថាមពលអគ្គិសនីតួកគី ព្រោះរឿងតម្លៃ និងមកមិនទាន់សភាពការណ៍
លោកនាយករដ្ឋមន្រ្តីហ៊ុន សែន បានប្រកាសមិនជួលនាវាផលិតថាមពលអគ្គិសនីរបស់ប្រទេសតួកគី ដើម្បីផ្គត់ផ្គង់ការខ្វះខាតអគ្គីសនីនៅកម្ពុជានោះទេ។ លោកនាយករដ្ឋមន្រ្តីប្រកាសដូច្នេះនៅក្នុងកិច្ចប្រជុំគណៈរដ្ឋមន្ត្រីនៅព្រឹកថ្ងៃសុក្រនេះ។ តាមលោកហ៊ុន សែន នេះគឺមកពីការមកដល់របស់នាវាផលិតថាមពលអគ្គិសនីរបស់តួកគីមិនទាន់សភាពការណ៍ដែលកម្ពុជាត្រូវការនិងបញ្ហាតម្លៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ការមកមិនទាន់សភាពការណ៍កម្ពុជា និង ការចរចាមិនត្រូវគ្នាលើបញ្ហាតម្លៃ គឺជាហេតុផលដែលរដ្ឋាភិបាលកម្ពុជា បានសម្រេចមិនជួលនាវាផលិតថាមពលអគ្គិសនីរបស់ប្រទេសតួកគីវិញ។ លោកផៃ ស៊ីផាន អ្នកនាំពាក្យរដ្ឋាភិបាលកម្ពុជាបាននាំពាក្យលោកនាយករដ្ឋមន្រ្តីហ៊ុន សែន ពីក្នុងកិច្ចប្រជុំគណៈរដ្ឋមន្ត្រីនៅព្រឹកថ្ងៃសុក្រនេះមកប្រាប់យ៉ាងដូច្នេះ ហើយបន្ថែមថា នាវាផលិតថាមពលអគ្គិសនីរបស់ប្រទេសតួកគី គឺប្រើប្រាស់រយៈពេលយូរទម្រាំមកដល់កម្ពុជា ហើយបញ្ហាតម្លៃក៏មានកម្រិតខ្ពស់ដែលមិនអាចទទួលយកបាន។ តាមលោកផៃ ស៊ីផាន រដ្ឋាភិបាលកម្ពុជាចង់ប្រើប្រាស់ថវិកាចំណាយលើការជួលនាវាផលិតថាមពលអគ្គិសនីតួកគីដែលមានតម្លៃថ្លៃនោះ មកទិញម៉ាស៊ីនភ្លើងដាក់នៅទីក្រុងភ្នំពេញសម្រាប់ប្រើប្រាស់រយៈពេលវែងឆ្ងាយតទៅមុខទៀត។
ម្យ៉ាងទៀត បើតាមលោកផៃ ស៊ីផាន គឺនៅពេលនេះកម្ពុជាទទួលបានការបង្កើនការផ្គត់ផ្គង់បន្ថែមថាមពលអគ្គិសនីពីប្រទេសជិតខាង។ ជាក់ស្ដែង កម្ពុជាទទួលបាន៥៥មេហ្គាវ៉ាត់ពីប្រទេសថៃសម្រាប់ការផ្គត់ផ្គង់បន្ថែម ព្រមទាំងការស្រូបយកថាមពលអគ្គិសនីពីប្រទេសឡាវ និងវៀតណាមផងដែរ។ ជាមួយគ្នានេះ កម្ពុជាក៏បានការដាក់ឲ្យដំណើរការនូវស្ថានីយ៍អគ្គិសនីប្រើដោយថាមពលព្រះអាទិត្យ២០មេហ្គាវ៉ាត់ នៅតំបន់ត្មាតពង ជិតភ្នំប្រសិទ្ធិ បញ្ចូលមកបណ្តាញអគ្គិសនីជាតិ។
ចំណែក សណ្ឋាគារ និងរោងចក្រធំៗក៏បានជួយបញ្ចេញម៉ាស៊ីនភ្លើងរបស់ខ្លួន ដើម្បីបន្ថយការប្រើប្រាស់ថាមពលអគ្គិសនីថែមទៀត។ ហេតុដូច្នេះហើយ សម្រាប់លោកផៃ ស៊ីផាន គឺកម្ពុជាកំពុងមានភ្លើងអគ្គិសនី ២០០មេហ្គាសម្រាប់សម្រួលការលំបាករយៈពេលជាង១ខែ មុនរដូវភ្លៀងចូលមកដល់នាពេលខាងមុខ។
សូមបញ្ជាក់ថា នៅក្នុងឆ្នាំ២០១៩នេះ កម្ពុជាកំពុងជួបប្រទះការខ្វះខាតថាមពលអគ្គិសនីរហូតដល់ទៅប្រមាណ៤០០មេហ្គាវ៉ាត់។ នេះគឺដោយសារតែនារដូវប្រាំងនេះ កម្ពុជាជួបប្រទះការក្តៅហួតហែងខ្លាំង ជាពិសេសនៅក្នុងខែមេសា និងឧសភា ដែលកម្តៅនឹងហក់ឡើងដល់ទៅ ៤០ ទៅ៤២អង្សា ព្រោះតែរងឥទ្ធិពលបាតុភូតអែលនីណូ (El Nino) ដែលធ្វើឲ្យវារីអគ្គិសនី មិនអាចផលិតថាមពលបានគ្រប់គ្រាន់។ ចំពោះមុខបញ្ហានេះ លោកនាយករដ្ឋមន្រ្តីហ៊ុន សែន បានអំពាវនាវឱ្យប្រជាពលរដ្ឋអត់ធ្មត់ និងស្នើឱ្យកាត់បន្ថយការប្រើប្រាស់ណាដែលមិនចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ