អ្នកជំនាញឯកភាពគ្នាថា កម្ពុជាត្រូវការច្បាប់គ្រប់គ្រងគ្រឿងស្រវឹងជាបន្ទាន់
ក្រុមអ្នកជំនាញខាងសុខភាពបានឯកភាពគ្នាថា កម្ពុជាត្រូវការច្បាប់គ្រប់គ្រងគ្រឿងស្រវឹងជាបន្ទាន់ និងចាំបាច់បំផុត។ តម្រូវការច្បាប់គ្រប់គ្រងគ្រឿងស្រវឹង គឺជាការឆ្លើយតបទៅនឹងកំណើននៃអ្នកប្រើប្រាស់គ្រឿងស្រវឹងនៅកម្ពុជា ដែលរបាយការណ៍ស្ទង់មតិមួយនៅចុងឆ្នាំ២០១៤បានបង្ហាញថា ប្រជាពលរដ្ឋពេញវ័យកម្ពុជាលើសពី៥០%បានប្រើប្រាស់គ្រឿងស្រវឹងក្នុងនោះ មានស្រ្តី២៣%។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
កំណើននៃអ្នកសេពគ្រឿងស្រវឹងនិងឥទ្ធិពលអាក្រក់របស់វា បានក្លាយជាក្តីបារម្ភយ៉ាងខ្លាំង សម្រាប់អ្នកជំនាញខាងសុខភាពសាធារណៈ និងក្រុមអ្នកកាសែតដែលបានលើកឡើងនៅក្នុងសិក្ខាសាលារយៈពេល២ថ្ងៃស្តីពីគ្រឿងស្រវឹង និងវិធានការកាត់បន្ថយការប្រើប្រាស់ ដែលបានបិទបញ្ចប់ទៅកាលពីថ្ងៃអង្គារទី១២ឧសភានៅឯមន្ទីរពេទ្យកុមារជាតិ។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាដែលផ្តួចផ្តើមឱ្យមានសិក្ខាសាលានេះ បានលើកឡើងពីរបាយការណ៍ស្ទង់មតិមួយ ដែលបានធ្វើឡើងកាលពីចុងឆ្នាំ២០១៤ថា ក្នុងរយៈពេល១២ខែចុងក្រោយនេះ ប្រជាពលរដ្ឋខ្មែរពេញវ័យ៥៤% បានប្រើប្រាស់គ្រឿងស្រវឹង ក្នុងនោះបុរសមាន៧៣.៣% និងស្ត្រីមាន២៣.២%។
របាយការណ៍ស្ទង់មតិដែលបានធ្វើឡើងដោយសាកលវិទ្យាល័យភូមិន្ទភ្នំពេញកាលពីចុងឆ្នាំ២០១៤ ក្រោមការគាំទ្រពីអង្គការសុខភាពពិភពលោក អង្គការចលនាដើម្បីសុខភាពកម្ពុជា និងដៃគូសុវត្ថិភាពចរាចរណ៍ផ្លូវគោកសកល បានជួបសម្ភាសន៍ជាមួយប្រជាពលរដ្ឋខ្មែរចំនួន១១៥៦នាក់។ របាយការណ៍នេះបានបង្ហាញដែរថា ប្រជាពលរដ្ឋកម្ពុជាភាគច្រើនបានចាប់ផ្តើមប្រើប្រាស់គ្រឿងស្រវឹងក្នុងវ័យយុវជននិងកុមារមាន៩១%ឯណោះ។ ចំនួននេះ បានបង្ហាញពីការព្រួយបារម្ភយ៉ាងខ្លាំងទៅលើអនាគតរបស់ពួកគេ ដែលកំពុងតែពង្វក់ទៅដោយគ្រឿងស្រវឹង តាមរយៈការអូសទាញមួយចំនួនតួយ៉ាងដូចជាការ ផ្សាយពាណិជ្ជកម្ម ការប្រកួតប្រជែងគ្នាផឹក ការជំរុញ និងការលើកទឹកចិត្តជាដើម។
ដើម្បីកាត់បន្ថយការប្រើប្រាស់គ្រឿងស្រវឹងនេះ លោក មុំ គង់ បានលើកឡើងពី យុទ្ធសាស្ត្រសកលរបស់អង្គការសុខភាពពិភពលោកកាលពីឆ្នាំ២០១០ថា មានវិធានការចាំបាច់និងមានប្រសិទ្ធភាពចំនួន៤ លើការកាត់បន្ថយការប្រើប្រាស់គ្រឿងស្រវឹងនេះ គឺទី១.រដ្ឋាភិបាលត្រូវមានវិធានការតម្លើងពន្ធ ទី២.ហាមផ្សាយពាណិជ្ជកម្ម ទី៣.កំហិតការលក់គ្រឿងស្រវឹង និងទី៤ គឺកំណត់អាយុអ្នកអាចប្រើប្រាស់គ្រឿងស្រវឹងបាន។ បន្ថែមពីលើនេះ រដ្ឋាភិបាល ត្រូវបង្កើតច្បាប់ស្តីពីការគ្រប់គ្រងគ្រឿងស្រវឹងឱ្យបានឆាប់បំផុត។ សេចក្តីព្រាងច្បាប់ស្តីពីការគ្រប់គ្រងគ្រឿងស្រវឹង ដែលកំពុងស្ថិតនៅក្នុងដៃរបស់ក្រសួងសុខាភិបាល មិនទាន់ត្រូវបានបង្ហាញពីភាពជឿនលឿនណាមួយនៅឡើយទេ ខណៈដែលមន្ត្រីក្រសួងសុខាភិបាលក៏មិនទាន់ហ៊ានធ្វើអត្ថាធិប្បាយណាមួយ លើសេចក្តីព្រាងច្បាប់នេះនៅឡើយដែរ។
សូមបញ្ជាក់ថា ស្រាបៀរគឺជាប្រភេទគ្រឿងស្រវឹងដែលប្រជាពលរដ្ឋកម្ពុជានិយមសេពច្រើនជាងគេដែលមានរហូតដល់៨៤%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ