១ឧសភា លើកទឹកចិត្តដល់សហជីពកម្មករក្នុងការទាមទារ
ចុះផ្សាយនៅថ្ងៃ៖
ស្តាប់ - ០៥:១៩
ជារៀងរាល់ឆ្នាំសហជីពកម្មករ និងអង្គការក្រៅរដ្ឋាភិបាលនានានៅប្រទេសកម្ពុជាតែងប្រារព្ធ ទិវាពលកម្មអន្តរជាតិថ្ងៃ១ឧសភា ប្រយោជន៍ដើម្បីផ្ញើរសារទៅនិយោជកក៏ដូចជារដ្ឋាភិបាលនូវចំណុចទាមទារជាគន្លឹះមួយចំនួន។ តាមរយៈថ្ងៃ១ឧសភានេះ ក្រុមសហជីពកម្មករយល់ថា ការតវ៉ារបស់ពួកគេត្រូវបានយកចិត្តទុកដាក់ផងដែរ ពីសំណាក់អ្នកវិនិយោគ និងរដ្ឋាភិបាល ដោយសារតែការទាមទារមួយចំនួនបានស្តែងចេញមកវិញនូវលទ្ធផលជាវិជ្ជមាន បើទោះណាជាមិនបាន១០០ភាគរយក៏ដោយ។
ថ្ងៃ១ឧសភា គឺជាទិវាពលកម្មអន្តរជាតិ ដែលមនុស្សម្នានៅលើពិភពលោកនាំគ្នាអបអរសាទរ
ទិវានេះ ។ នៅប្រទេសកម្ពុជា ១ឧសភាឆ្នាំ២០១៥នេះ ត្រូវបានភាគីរដ្ឋាភិបាលដែលជាភាគីកំណត់មូលដ្ឋានច្បាប់នៃការអនុវត្តសិទ្ធិការងារ និងភាគីអង្គការក្រៅរដ្ឋាភិបាលរួមមានអង្គការសហជីពដែលតែងតែធ្វើការទាមទារសិទ្ធិពីរដ្ឋាភិបាល បានប្រារព្ធពិធីនេះ ដូចៗគ្នា ក៏ប៉ុន្តែគោលដៅដែលចង់បានគឺមិនដូចគ្នាទេ។
ជាទូទៅការប្រារព្ធធ្វើទិវាអន្តរជាតិនៃការងារ១ឧសភានៅថ្ងៃនេះ គឺមិនមែនធ្វើដើម្បីធ្វើនោះទេ។ ទិវាដែលមានការទទួលស្គាល់ជាសកល ហើយកម្ពុជាជាភាគីហត្ថលេខីនៃអនុសញ្ញាអន្តរជាតិខាងការងារមួយចំនួនផងនោះ បាននាំមកនូវអត្ថប្រយោជន៍ជាច្រើនសម្រាប់កម្មករ និងនិយោជិក។ ក្រុមអ្នកសហជីពការងារតែងលើកឡើងថាថ្ងៃ១ឧសភាគឺជាថ្ងៃដ៏សំខាន់ក្នុងការប្រមូលផ្តុំគ្នាផ្ញើរសារ ដែលពួកគេចង់បានទៅកាន់មេដឹកនាំរដ្ឋឲ្យមានការពិចារណា និងដោះស្រាយជូនពួកគេ។
ជាការពិត ការទាមទារទ្រង់ទ្រាយធំនៅក្នុងវិស័យឧស្សាហកម្មកាត់ដេរ និងដេរស្បែកជើង ជាឧទាហរណ៍ស្រាប់។កាលពីទសវត្សឆ្នាំ៩០នៅពេលដែលប្រទេសកម្ពុជាចាប់ផ្តើមដំណើរការ
រោងចក្រកាត់ដេរដំបូង។ ប្រាក់ខែអប្បបរមារបស់កម្មករនៃវិស័យនេះ មានត្រឹមតែ២៥ដុល្លារប៉ុណ្ណោះក្នុងមួយខែ។ រីឯការអនុវត្តច្បាប់ការងារវិញកាលណោះ ស្ថិតនៅក្នុងកំរិតមួយដែល ភាគីទាំងសងខាងមានការគោរពនិងយល់ដឹងទាប។
ភាគីនិយោជកដែលទើបតែចូលមកវិនិយោគថ្មីៗ លើដែនដីដែលគេយល់ថាអាចចំណេញលើគោក នោះរងការប៉ះទង្គិចជាញឹកញាប់ជាមួយនឹងម្ចាស់ស្រុកដែលទើបតែសង្ឃឹមថាមានការងារធ្វើល្អមួយដែលអាចចិញ្ចឹមខ្លួនបានជាពិសេសទៅលើបញ្ហាប្រាក់ខែនិងលក្ខខណ្ឌការងារមួយចំនួនទៀត។ ក៏ប៉ុន្តែស្ថានភាពប្រាក់ខែនេះ មានការវិវត្តិជាបន្តបន្ទាប់ គឺដោយសារតែមានការតវ៉ា ហើយត្រូវបានដាក់បញ្ចូលជារៀងរាល់ឆ្នាំទៅក្នុងញត្តិទាមទារតាមរយៈទិវាអន្តរជាតិថ្ងៃ១ ឧសភានេះតែម្តង។
មានការទទួលស្គាល់ពីអ្នកសហជីពថា ថ្ងៃ១ឧសភានេះគឺជាថ្ងៃកំដៅសាច់ដុំមួយរបស់កម្មករក្នុងការចាប់ផ្តើមបំពេញការងារ និងជាព្រឹត្តិការណ៍លើកទឹកចិត្តមួយក្នុងការទាមទារលក្ខខណ្ឌសមស្របណាមួយបន្ថែមទៀតស្របទៅតាមបរិបទការងារដែលមានការវិវត្តនាពេលបច្ចុប្បន្ន។
ទោះជាមានការពេញចិត្តឬមិនពេញចិត្តយ៉ាណាក៏ដោយ ត្រូវគេមើលឃើញថារដ្ឋាភិបាលនិងថៅកែរោងចក្រនៅកម្ពុជា ចាំបាច់ត្រូវមានការទទួលយកជាបន្តបន្ទាប់នូវគោលគំនិត និងការចង់បានរបស់កម្មករនិយោជិក។ ដូចជាប្រាក់ខែកម្មករបានឡើងស្រឺតៗរយៈពេលបីទសវត្សកន្លងទៅនេះ រហូតដល់១២៨ដុល្លារក្នុងមួយខែ បូករួមទាំងប្រាក់បន្ថែមម៉ោង និងប្រាក់បន្ទាប់បន្សំផ្សេងៗទៀតដែលទាមទារបាននោះ គឺនៅក្នុងកំរិតមួយដែលបង្ហាញពីការមើលឃើញពីអ្នកដែលទទួលផលដោយកំលាំងកម្មករផងដែរ។
ដោយឡែករដ្ឋាភិបាលវិញត្រូវគេកត់សម្គាល់ប៉ុន្មានឆ្នាំចុងក្រោយនេះថា បានធ្វើអន្តរាគមន៍ជាច្រើនទៅលើភាពចម្រូងចម្រាស់លើបញ្ហាប្រាក់ខែ និងការទាមទារលក្ខខណ្ឌផ្សេងៗទៀតរបស់កម្មករនិយោជិក។ គេអាចនិយាយបានថាជាពេលវេលាដ៏សំខាន់របស់រដ្ឋាភិបាល ក្នុងការស្វែងរកការគាំទ្រពីកម្មករនិយោជិក។ ហេតុដូច្នេះហើយ ស្ថានភាពការងារដែលប្រសើរជាងមុន ប្រាក់ខែខ្ពស់ជាងមុនរបស់កម្មករនិយោជិក រួមផ្សំនឹងចរន្តសកលភាវូបនីយកម្មដែលតម្រូវដល់ជីវភាពរស់នៅរបស់មនុស្សផងនោះ គឺមិនអាចកាត់ផ្តាច់ពីឆន្ទៈរបស់រដ្ឋាភិបាលបានទេ។
ទោះជាអ្នកទាមទារនិងអ្នកជួយដោះស្រាយ ឬអ្នកផ្តល់ជូន នៅមិនទាន់ខិតជិតគ្នាមែនទែននោះ ក៏ប៉ុន្តែវាបង្ហាញនូវសុខដុមនីយកម្មនៃវិស័យការងារ ពោលគឺមានការកាត់បន្ថយការប្រឈមមុខដាក់គ្នា។ ភាគីទាំងសងខាងចាប់ផ្តើមស្គាល់ច្បាប់កាន់តែច្រើនឡើង ហើយបង្ហាញនូវវប្បធម៌និយាយស្តីរកគ្នាប្រកបដោយឬកពារទន់ភ្លន់រវាងនិយោជកនិងនិយោជិក ខុសពីប៉ុន្មានទសវត្សមុន។
ដូច្នេះការលើកឡើងនូវចំណុចចង់បាននានារបស់កម្មករនិយោជិក តាមរយៈថ្ងៃបុណ្យការងារ១ឧសភា វាឆ្លុះបញ្ចាំងនូវការវិវត្តមួយ ដែលអាជ្ញាធររដ្ឋាភិបាលត្រូវតែមានការពិចារណា និងចូលរួមដោះស្រាយ បើទោះណាជាការដោះស្រាយនោះទទួលបានលទ្ធផលក្នុងកំរិតណាមួយក៏ដោយ។ ពិតណាស់លទ្ធផលវិជ្ជមានដែលប្រកាសចេញដោយក្រសួងការងារកម្ពុជាជាបន្តបន្ទាប់ ទាក់ទងទៅនឹងការចរចារប្រាក់ឈ្នួលត្រីភាគី ការជួយឲ្យប្រសើរឡើងនូវលក្ខខណ្ឌការងារកន្លងមកក៏ដូចជាបច្ចុប្បន្នគឺជាការប្រជែងគ្នាយកប្រជាប្រិយភាពរវាងសហជីពកម្មករនិងរដ្ឋាភិបាល ក៏ប៉ុន្តែទោះយ៉ាងណាក៏ដោយចុះអត្ថប្រយោជន៍ ត្រូវគេមើលឃើញថាបានដល់កម្មករនិយោជកខ្មែរជាបណ្តើរៗហើយ នេះគេមិននិយាយដល់ការសន្យារបស់រដ្ឋាភិបាល តម្លើងប្រាក់បៀវត្សន៍ដល់មន្ត្រីរាជការរហូតដល់១លានរៀលនៅឆ្នាំ២០១៨ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ