កម្ពុជាត្រៀមខ្លួនរួចរាល់ហើយ ដើម្បីធ្វើការជាមួយអ្នកបច្ចេកទេសផែនទីបារាំង
ការស្នើរបស់ភាគីកម្ពុជានិងឡាវ ទៅប្រទេសបារាំង ដើម្បីសុំឲ្យបារាំងផ្តល់ជំនួយបច្ចេកទេសទាក់ទងទៅនឹងបញ្ហាផែនទីរវាងប្រទេសទាំងពីរពេលនេះ បារាំងយល់ព្រមហើយ។ ការទទួលចំលើយជាវិជ្ជមានពីប្រទេសបារាំងនៅពេលនេះ បានធ្វើឡើងបន្ទាប់ពីកម្ពុជានិងឡាវ ព្រមព្រៀងគ្នាកាលពីដើមខែកញ្ញា ធ្វើលិខិតស្នើទៅរដ្ឋាភិបាលបារាំង សុំអ្នកជំនាញជួយប្តូរខ្នាតផែនទីប្រទេសទាំងពីរ ពីខ្នាត១លើ១០០ពាន់ មកខ្នាត១លើ៥០ពាន់វិញ។
ចុះផ្សាយនៅថ្ងៃ៖
ស្តាប់ - ០២:១៤
«សម្តេចនាយករដ្ឋមន្ត្រីបានអោយដឹងថា រដ្ឋាភិបាលបារាំងបានយល់ព្រមអោយអ្នកឯកទេសមកជួយរឿងផែនទីកម្ពុជា-ឡាវហើយ»។ នេះជាការលើកឡើងរបស់លោកខៀវ កាញារីទ្ធ រដ្ឋមន្ត្រីក្រសួងព័ត៌មាន នៅលើទំព័រហ្វេសប៊ុករបស់លោកនៅថ្ងៃនេះ។ ដោយឡែក កាលបរិច្ឆេទច្បាស់លាស់នៃការបញ្ជូនអ្នកបច្ចេកទេសបារាំងជំនាញផែនទី គេមិនទាន់បានដឹងប្រាកដនៅឡើយទេ។
លោកស្រី កុយ ពិសី អនុប្រធានគណៈកម្មាធិការទទួលបន្ទុកកិច្ចការព្រំដែនកម្ពុជាថ្លែងប្រាប់វិទ្យុបារាំងអន្តរជាតិ RFI ថា លោកស្រីនៅមិនទាន់បានឃើញលិខិតជាផ្លូវការនៅឡើយទេ ក៏ប៉ុន្តែលោកស្រីយល់ថាវាជាដំណឹងរីករាយ ដែលរដ្ឋាភិបាលបារាំងបានឆ្លើយតបដោយវិជ្ជមាន បំពេញបំណងនិងសេចក្តីត្រូវការរបស់ប្រទេសកម្ពុជានិងឡាវ ដែលស្នើសុំបារាំងឲ្យជួយ។
អនុប្រធានគណៈកម្មាធិការទទួលបន្ទុកកិច្ចការព្រំដែនកម្ពុជារូបនេះ បានអះអាងថាភាគីកម្ពុជាបានត្រៀមលក្ខណៈរួចរាល់ហើយដើម្បីធ្វើកិច្ចសហការជាមួយអ្នកបច្ចេកទេសផែនទីបារាំង។ លោកស្រីពន្យល់ថា កម្ពុជា-ឡាវ ត្រូវបន្តជជែកគ្នាបន្ថែមទៀតលើបែបបទបច្ចេកទេស ដើម្បីព្រមព្រៀងគ្នាឲ្យអ្នកជំនាញបារាំងជួយបញ្ហាផែនទីនេះ លើតួនាទីនិងភារកិច្ចអ្វីខ្លះ។
សូមរំលឹកថា កាលពីដើមខែកញ្ញាឆ្នាំ២០១៧ កន្លងទៅ រដ្ឋមន្ត្រីក្រសួងការបរទេស ក៏ដូចជានាយករដ្ឋមន្ត្រីនៃប្រទេសទាំងពីរ កម្ពុជា-ឡាវ បានឯកភាពគ្នាទៅលើពង្រាងលិខិត ដាក់ជូន រដ្ឋាភិបាលបារាំង ដើម្បីសុំអ្នកជំនាញមកជួយប្តូរខ្នាតផែនទីកម្ពុជាពីខ្នាត១លើ១០០ពាន់ មកខ្នាត១លើ៥០ពាន់វិញ។ ការស្នើសុំនេះ បានធ្វើឡើង បន្ទាប់ពីប្រទេសទាំងពីរ ជួបនូវភាពចំរូងចំរះនឹងគ្នា ខណៈ ឡាវបានដាក់កងទ័ពចូលមកលើទឹកដីកម្ពុជានៅតំបន់អូរអាឡៃ ស្រុកសៀមប៉ាង ខេត្តស្ទឹងត្រែង ហើយក៏ត្រូវកម្ពុជាស្នើឲ្យដកទៅវិញទាំងអស់កាលពីខែសីហា កន្លងទៅ នៅពេលមានសំណើពីនាយករដ្ឋមន្ត្រីកម្ពុជា។
សូមបញ្ជាក់ថា ប្រទេសកម្ពុជា មានព្រំដែនជាប់នឹងប្រទេសឡាវប្រវែង៥៤០គីឡូម៉ែត្រ ហើយត្រូវបោះបង្គោលព្រំដែនសរុបចំនួន ១៤៥បង្គោល។បច្ចុប្បន្នប្រទេសទាំងពីរបោះបង្គោលបានចំនួន ១២១បង្គោលរួចហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ