រដ្ឋាភិបាលនៅតែប្រើយន្តការសម្របសម្រួល ករណីកម្មករ៣រោងចក្រផ្ទុះការតវ៉ាមកដល់ថ្ងៃនេះ
រដ្ឋាភិបាលកម្ពុជា អះអាងថា ករណីកម្មករចំនួន៣រោងចក្រផ្ទុះការតវ៉ាព្រមៗគ្នាច្រើនថ្ងៃមកនោះ គណៈកម្មាធិការដោះស្រាយវិវាទនៃក្រសួងការងារកំពុងតែធ្វើការសម្របសម្រួលតាមយន្តការដោះស្រាយវិវាទក្រៅប្រព័ន្ធតុលាការ។ ការបញ្ជាក់យ៉ាងដូច្នេះ របស់មន្រ្តីរដ្ឋាភិបាល គឺជាការឆ្លើយតបចំពោះមុខការបន្តធ្វើកូដកម្មជាថ្មីទៀត របស់កម្មករ ប្រមាណជាង៣០០នាក់ នៅចំថ្ងៃចូលឆ្នាំនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
លោក វង្ស សុវណ្ណ អគ្គលេខាធិការរង គណៈកម្មាធិការដោះស្រាយបញ្ហាកូដកម្ម បាតុកម្ម គ្រប់មុខសញ្ញា បានប្រាប់វិទ្យុបារាំងRFIថា ការដែលគណៈកម្មាធិការដោះស្រាយវិវាទកំពុងតែធ្វើការសម្របសម្រួលនោះ គឺធ្វើទៅតាមសំណើរបស់កម្មករដែលមិនចង់ឲ្យប្តឹងទៅកាន់តុលាការ។
បើតាមលោក វង្ស សុវណ្ណ ប្រសិនបើនៅតែមិនអាចដោះស្រាយបានក្រៅប្រព័ន្ធតុលាការទេគឺមានតែប្តឹងទៅតុលាការដើម្បីលក់ឡាយឡុងទ្រព្យសម្បត្តិរបស់រោងចក្រមកទូទាត់សងកម្មករ។
សូមបញ្ជាក់ថា កម្មករប្រមាណជាង៣០០នាក់ មកពីរោងចំនួន៣ ក្នុងខណ្ឌពោធិ៍សែនជ័យ បានមកប្រមូលផ្តុំគ្នា បន្តធ្វើកូដកម្មជាថ្មីទៀតនៅចំថ្ងៃចូលឆ្នាំចិននេះ ខណៈដែលថៅកែចិនជាម្ចាស់រោងចក្ររត់ចោល ហើយមិនបានបើកប្រាក់ឈ្នួលជូនពួកគេ។
រោងចក្រទាំង៣ដែលថៅកែចិនរត់ចោលនោះ គឺរោងចក្រ យូដាអ៊ិនដាស់ មានកម្មករសរុប៤៩២នាក់។ រោងចក្រ អេស អ អ៊ីហ្គាមេន មានកម្មករសរុប៣៧៧នាក់។ រោងចក្រ អី ហ្វា មានកម្មករ៧២០នាក់ ។
បើតាម លោក វង្ស សុវណ្ណ ថៅកែរោងចក្រទាំង៣ គឺមានម្ចាស់តែមួយជាជនជាតិចិន ដែលក្រុមហ៊ុននីមួយៗមានការទទួលខុសត្រូវដាច់ពីគ្នា។ រោងចក្រទាំងនេះ ក៏ធ្លាប់បានព្យូរកាងារកម្មករនាពេលកន្លងមកដែរ ដោយអះអាងថាអស់អ្នកបញ្ជាទិញ។ នេះបើតាម លោក វង្ស សុវណ្ណ។
គួររំលឹកដែរ កម្មករប្រហែល ២ពាន់នាក់ នៃរោងចក្រទាំង៣នោះ បានផ្ទុះការតវ៉ាតាំងពីថ្ងៃទី៨ ខែកុម្ភៈ បន្ទាប់ពីពួកគេបានឃើញមានការដឹកជញ្ជូនសម្ភារៈចេញពីរោងចក្រ និងបាត់វត្តមានអ្នកគ្រប់គ្រងរោងចក្រ។
ក្រុមកម្មករឲ្យដឹងថា ពួកគេបាននាំគ្នាដេកយាមរោងចក្រ ចាប់តាំងពីថ្ងៃផ្ទុះការតវ៉ា ដោយបារម្ភខ្លាចថៅកែលួចដឹកសម្ភារៈនៅសេសសល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ