កម្ពុជាប្រតិកម្មនឹងលោកស្រី ស្មីត ដែលអំពាវនាវឲ្យរដ្ឋាភិបាលថ្កោលទោសចំពោះការបំភ័យដល់អ្នកមិនទៅបោះឆ្នោត
ក្រសួងការបរទេសកម្ពុជា កាលពីម្សិលមិញ បានចេញសេចក្តីថ្លែងការណ៍មួយ ដោយសម្តែងការសោកស្តាយ ចំពោះការលើកឡើងចុងក្រោយរបស់អ្នករាយការណ៍ពិសេសអង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា គឺលោកស្រី រ៉ូណា ស្មីត។ លោកស្រី ស្មីត កាលពីថ្ងៃទី២០កក្កដា តាមរយៈទំព័រ Twitter លោកស្រីបានអំពាវនាវដល់រដ្ឋាភិបាលកម្ពុជាឲ្យថ្កោលទោសចំពោះការបំភិតបំភ័យ ដល់អ្នកមិនទៅបោះឆ្នោត និងធានាថាសិទ្ធិសេរីភាពបញ្ចេញមតិរបស់ជនគ្រប់រូប រាប់ទាំងអ្នកដែលអំពាវនាវឲ្យធ្វើពហិការមិនចូលរួមបោះឆ្នោតផងនោះ ត្រូវបានគោរពមុនការបោះឆ្នោតមកដល់។
ចុះផ្សាយនៅថ្ងៃ៖
ស្តាប់ - ០១:៥៥
នៅក្នុងសេចក្តីថ្លែងការណ៍ជាភាសាអង់គ្លេស អ្នកនាំពាក្យក្រសួងការបរទេសកម្ពុជា បានចាត់ទុកការអំពាវនាវរបស់លោកស្រី រ៉ូណា ស្មីត ថាធ្វើឡើងដោយលម្អៀង និងមានលក្ខណៈបុរេនិច្ឆ័យ មុនការបោះឆ្នោតនៅកម្ពុជា។
បើតាមក្រសួងការបរទេសកម្ពុជា ការអំពាវនាវរបស់លោកស្រី ស្មីត ហាក់ដូចជាការគាំទ្រដល់យុទ្ធនាការរបស់លោក សម រង្ស៊ី និងសមាជិកគណបក្សសង្គ្រោះជាតិ ដទៃទៀត ដែលអំពាវនាវមិនឲ្យពលរដ្ឋទៅបោះឆ្នោតដូចគ្នានេះដែរ។
យ៉ាងនេះក្ដី អ្នកនាំពាក្យក្រសួងការបរទេសបញ្ជាក់ថា កម្ពុជាមិនមានច្បាប់ចែងដាក់ទោសទណ្ឌដល់ពលរដ្ឋទាំងឡាយណា ដែលមិនទៅបោះឆ្នោតនោះទេ។ ក៏ប៉ុន្តែអះអាងថា ច្បាប់បោះឆ្នោតរបស់កម្ពុជា នឹងដាក់ទោសទណ្ឌចំពោះជនទាំងឡាយណា ដែលរារាំងអ្នកដទៃមិនឲ្យទៅបោះឆ្នោត។
សូមរំលឹកថា អ្នករាយការណ៍ពិសេសអង្គការសហប្រជាជាតិស្តីពីបញ្ហាសិទ្ធិមនុស្សនៅកម្ពុជា គឺលោកស្រីរ៉ូណា ស្មីត កាលពីថ្ងៃទី២០កក្កដា តាមរយៈ Twitter លោកស្រីបានអំពាវនាវដល់រដ្ឋាភិបាលកម្ពុជាឲ្យថ្កោលទោសចំពោះការបំភិតបំភ័យដល់អ្នកមិនទៅបោះឆ្នោត និងធានាថាសិទ្ធិសេរីភាពបញ្ចេញមតិរបស់ជនគ្រប់រូប រាប់ទាំងអ្នកដែលអំពាវនាវឲ្យធ្វើពហិការមិនចូលរួមបោះឆ្នោតផងនោះ ត្រូវបានគោរពមុនការបោះឆ្នោតថ្ងៃទី២៩ ខែកក្កដា។
លោកស្រី ស្មីត លើកឡើងដូច្នេះ ដោយអះអាងថាលោកស្រីទទួលបានរបាយការណ៍នានារបស់តំណាងរដ្ឋាភិបាលដែលលើកឡើងថា ការមិនបោះឆ្នោតឲ្យគណបក្សណាមួយគឺខុសច្បាប់ ហើយថាអាចនឹងមានការដាក់ពិន័យលើមនុស្ស ដែលផ្ញើសារអំពីការមិនបោះឆ្នោតឲ្យគណបក្សណាមួយ ឬការធ្វើពហិការមិនបោះឆ្នោត ។ ជាមួយគ្នានេះ លោកស្រីក៏ព្រួយបារម្ភផងដែរលើរបាយការណ៍ដែលថាអាជ្ញាធរមូលដ្ឋានបានគំរាមដកហូតសេវាសាធារណៈពីអ្នកដែលមិនបោះឆ្នោតឲ្យគណបក្សកាន់អំណាច។
ប៉ុន្តែលោកសុខ ឥសាន អ្នកនាំពាក្យគណបក្សកាន់អំណាច បានអះអាងថា អាជ្ញាធរកម្ពុជាមិនបានបំភិតបំភ័យដល់ពលរដ្ឋមិនទៅបោះឆ្នោតនោះឡើយ។ ផ្ទុយទៅវិញ គឺមានតែការលើកទឹកចិត្តពួកគេឲ្យទៅបោះឆ្នោតតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ