រដ្ឋាភិបាលសម្រេចបណ្ដេញវិទ្យាស្ថានជាតិប្រជាធិបតេយ្យ NDI ចេញពីកម្ពុជា
នៅទីបំផុត រដ្ឋាភិបាលកម្ពុជា បានសម្រេចបញ្ឈប់សកម្មភាពរបស់វិទ្យាស្ថានជាតិប្រជាធិបតេយ្យ ហៅកាត់ថា NDI និងបណ្ដេញបុគ្គលិករបស់វិទ្យាស្ថាននេះចេញពីកម្ពុជាក្នុងរយៈពេល៧ថ្ងៃ។ នេះបើតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី២៣សីហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
បើតាមសេចក្ដីប្រកាសព័ត៌មាន មានមូលហេតុពីរសំខាន់ដែលធ្វើឲ្យរដ្ឋាភិបាលកម្ពុជាសម្រេចបញ្ឈប់សកម្មភាពរបស់វិទ្យាស្ថាន NDI នៅកម្ពុជា។ ទី១៖ គឺដោយសារតែ NDI បានធ្វើសកម្មភាព ខណៈមិនទាន់ទទួលបានសេចក្ដីសម្រេចលើពាក្យស្នើសុំចុះបញ្ជីពីក្រសួងការបរទេសកម្ពុជា។ បើតាមក្រសួងការបរទេស អង្គការ NDI ដែលបានប្រតិបត្តិការនៅកម្ពុជាតាំងពីឆ្នាំ១៩៩២ បានដាក់ពាក្យស្នើសុំចុះបញ្ជីនៅថ្ងៃទី២១ខែមិថុនាឆ្នាំ២០១៦។ ក្នុងអំឡុងពេលរង់ចាំសេចក្ដីសម្រេចពីក្រសួង អង្គការនេះបានបន្តសកម្មភាពជាបន្តបន្ទាប់។ ជាសកម្មភាពដែលក្រសួងចាត់ទុកថា មិនបានគិតគូរពីការគោរពច្បាប់សោះឡើយ។
ចំណែកមូលហេតុទី២៖ គឺព្រោះតែអង្គការ NDI មិនបានចុះបញ្ជីរដ្ឋបាលសារពើពន្ធ។ មាត្រា១០១នៃច្បាប់ស្ដីពីសារពើពន្ធចែងថា បុគ្គលទាំងឡាយត្រូវចុះបញ្ជីនៅរដ្ឋបាលសារពើពន្ធក្នុងអំឡុង១៥ថ្ងៃក្រោយពីចាប់ផ្ដើមធ្វើសកម្មភាពសេដ្ឋកិច្ច។ ប៉ុន្តែសម្រាប់អង្គការ NDI អគ្គនាយកដ្ឋានពន្ធដារបានអះអាងថា អង្គការនេះមិនបានចុះបញ្ជីនៅរដ្ឋបាលសារពើពន្ធឡើយ ដែលនេះគឺបទល្មើសព្រហ្មទណ្ឌលើបទប្បញ្ញត្តិស្ដីពីពន្ធដារ ផ្អែកតាមមាត្រា១២៨នៃច្បាប់សារពើពន្ធ។
បើទោះបីជាយ៉ាងដូច្នេះក៏ដោយ គេដឹងថា ការបញ្ឈប់សកម្មភាពរបស់អង្គការ NDI ពីសំណាក់រដ្ឋាភិបាលកម្ពុជានាពេលនេះ ធ្វើឡើងបន្ទាប់ពីមានឯកសារបែកធ្លាយនៅលើទំព័រហ្វេសប៊ុកឈ្មោះ «កូនខ្មែរ» ដោយចោទថា អង្គការ NDI បានរៀបចំយុទ្ធសាស្ត្រជួយគណបក្សប្រឆាំង ដើម្បីផ្ដួលរំលំគណបក្សកាន់អំណាច។ ប៉ុន្តែអង្គការ NDI បានច្រានចោលការចោទប្រកាន់នេះ។ NDI គូសបញ្ជាក់ថា ខ្លួនគឺជាស្ថាប័នឯករាជ្យ មិនលំអៀងទៅរកគណបក្សនយោបាយណាមួយទេ។ ហើយការងាររបស់ NDI ផ្ដោតសំខាន់លើការពង្រឹងដំណើរការប្រជាធិបតេយ្យ ដើម្បីផ្ដល់ជាប្រយោជន៍ដល់ពលរដ្ឋកម្ពុជាដែលជាម្ចាស់ឆ្នោតនិងគ្រប់គណបក្សទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ