បក្សនយោបាយនៅតែកេងយកផលចំណេញពីទំនាស់ព្រំដែនជាមួយប្រទេសជិតខាង
ចុះផ្សាយនៅថ្ងៃ៖
ស្តាប់ - ០៣:៤៩
ការចោទប្រកាន់សមាជិកព្រឹទ្ធសភាគណបក្សប្រឆាំងបានលាតត្រដាងពីកំហុសវិជ្ជាជីវៈមួយចំនួនរបស់អ្នកនយោបាយ។ ប៉ុន្តែមួយផ្នែកទៀត វាក៏បង្ហាញពីការវិលវល់របស់អ្នកនយោបាយក្នុងការកេងចំណេញនយោបាយលើទំនាស់ព្រំដែនជាមួយប្រទេសវៀតណាមផងដែរ។
ការចាប់ឃាត់ខ្លួននិងចោទប្រកាន់សមាជិកព្រឹទ្ធសភាលោកហុង សុខហួរ របស់គណបក្សសម រង្ស៊ី ដែលជាគណបក្សមួយក្នុងចំណោមគណបក្សពីរដែលរួមគ្នាបង្កើតទៅជាគណបក្សសង្គ្រោះជាតិ បានបង្ហាញពីនយោបាយដែលមិនទាន់ឯកភាពគ្នាដោយរលូននៅឡើយរវាងគណបក្សកាន់អំណាចនិងគណបក្សប្រឆាំងក្នុងគោលជំហរឆ្ពោះទៅដោះស្រាយវិបត្តិព្រំដែនជាមួយប្រទេសវៀតណាម។
ពិតមែនហើយលោក ហុង សុខហួរ បានបង្ហោះសេចក្តីអត្ថាធិប្បាយស្តីពីការរំលាយកិច្ចព្រមព្រាងបោះបង្គោលព្រំដែនរួមជាមួយប្រទេសវៀតណាមដែលមានលក្ខណៈចោទប្រកាន់លើមេដឹកនាំគណបក្សកាន់អំណាច។
ការបង្ហោះសេចក្តីអត្ថាធិប្បាយនេះធ្វើឡើងក្រោយពីមេដឹកនាំគណបក្សសង្គ្រោះជាតិនិងគណបក្សប្រជាជនកម្ពុជាបានឯកភាពគ្នាលើការសហការដោះស្រាយបញ្ហាព្រំដែន។ ព្រឹត្តិការណ៍ចុងក្រោយនេះហាក់ដូចជាបានទាក់ទាញឲ្យមានភាពរំជើបរំជួលក្នុងនយោបាយហើយបាននាំឲ្យមានកង្វល់ពីអស្ថេរភាពនយោបាយផងដែរ។
ប៉ុន្តែបើគេសម្លឹងមើលឲ្យជ្រៅបន្តិចបញ្ហាហាក់ដូចជាកើតឡើងយ៉ាងសាមញ្ញ។ ពោលគឺចំណុចចាប់ផ្តើមបានកើតចេញពីបន្ទាត់នយោបាយរបស់គណបក្សប្រឆាំងដែលមិនបានណែនាំដល់មន្ត្រីនយោបាយរបស់ខ្លួនឲ្យដើរតាមការឯកភាពគ្នាលើកិច្ចការព្រំដែនក្រោយពីមានការចរចារវាងលោកកឹម សុខា អនុប្រធានគណបក្សសង្គ្រោះជាតិនិងលោកស ខេង មន្ត្រីជាន់ខ្ពស់សំខាន់មួយរូបរបស់គណបក្សប្រជាជនកម្ពុជានិងជារដ្ឋមន្ត្រីក្រសួងមហាផ្ទៃ។
បន្ទាប់មកសមាជិកព្រឹទ្ធសភានៃគណបក្សប្រឆាំងបានប្រព្រឹត្តិដោយខុសឆ្គងក្នុងការបង្ហាញភាពមិនច្បាស់លាស់នៃឯកសាររបស់ខ្លួនប្រើប្រាស់។
ដោយឡែកប្រមុខដឹកនាំគណបក្សកាន់អំណាចបានចាប់ចំណុចខុសឆ្គងនេះថាជាហានិភ័យមួយព្រមទាំងស្នើឲ្យមានចំណាត់ការតាមផ្លូវច្បាប់ដោយចោទប្រកាន់ថាសមាជិកព្រឹទ្ធសភាបក្សប្រឆាំងលោកហុង សុខហួរ បានប្រព្រឹត្តិបទឧក្រិដ្ឋជាក់ស្តែង។
ជាការពិតការចាប់ខ្លួននិងចោទប្រកាន់តាមផ្លូវតុលាការលើសមាជិកព្រឹទ្ធសភានៃគណបក្សប្រឆាំងដោយមិនមានការដកអភ័យឯកសិទ្ធិមិនមែនជាទង្វើផ្ទុយនឹងច្បាប់នោះទេ ដោយសារមាត្រាទី១២នៃច្បាប់ស្តីពីលក្ខខន្តិកៈសមាជិកព្រឺទ្ធសភាបានផ្តល់អំណាចដល់មន្ត្រីមានសមត្ថកិច្ចចាប់ខ្លួនឬចោទប្រកាន់ដល់សមាជិកសភាជាន់ខ្ពស់ល្គឹកណាមានបទឧក្រិដ្ឋជាក់ស្តែង។
ប៉ុន្តែអ្វីដែលជាការមន្ទិលនោះគឺការបកស្រាយបែបណាទើបសមស្របចំពោះសេចក្តីអត្ថាធិប្បាយរបស់សមាជិកព្រឹទ្ធសភាបក្សប្រឆាំងចំពោះសេចក្តីអះអាងពីបទល្មើសជាក់ស្តែងដែលជាប្រភេទបទឧក្រិដ្ឋនោះ។
សរុបមកវិញកំហុសរបស់មន្ត្រីច្បាប់របស់គណបក្សសម រង្ស៊ី គឺជាផ្នែកមួយ។ ហើយភាពមិនច្បាស់លាស់ក្នុងការបកស្រាយពីបទឧក្រិដ្ឋជាក់ស្តែងលើមន្ត្រីរូបនោះក៏ជាផ្នែកមួយទៀតដែលគួរយកមកថ្លឹងថ្លែង។
មួយវិញទៀតគេហាក់ដូចជានៅតែមើលឃើញថាដំណោះស្រាយបញ្ហាព្រំដែនជាមួយប្រទេសវៀតណាមនៅតែជាចំណុចរសើបនិងជាគន្លឹះទាក់ទាញយករូបភាពនយោបាយរបស់គណបក្សទាំងពីរដែលមានអសនៈក្នុងរដ្ឋសភា។
ដូច្នេះបើធៀបទៅនឹងទំហំនៃភាពស្មុគ្រស្មាញក្នុងដំណោះស្រាយបញ្ហាព្រំដែនជាមួយប្រទេសវៀតណាម ការរកឯកភាពជាតិមិនបានលើចំណុចរួមដើម្បីទៅតតាំងតាមលក្ខណៈបច្ចេកទេសជាមួយប្រទេសជិតខាងមួយនេះវាកាន់តែធ្វើឲ្យប្រជាជាតិកម្ពុជាចុះទន់ខ្សោយនយោបាយផ្ទៃក្នុងនិងកាត់បន្ថយទម្ងន់ឥទ្ធិពលលើបរទេស។
មួយវិញទៀតការរក្សាភាពស្ងប់ស្ងាត់និងបញ្ឈប់ការកេងចំណេញនយោបាយលើបញ្ហាព្រំដែនជាមួយប្រទេសវៀតណាមគឺជាកត្តាចាំបាច់ដែលនឹងបញ្ចៀសបាននូវកង្វល់របស់ប្រជារាស្ដ្រនិងបង្កើនការទុកចិត្តរបស់ពួកគេលើភាពចាស់ទុំផ្នែកនយោបាយនៃគណបក្សប្រកួតប្រជែងគ្នា៕
បទវិភាគ របស់គង់ សុឋានរិទ្ធ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ