វត្តមានលោក ហ៊ុន សែន នៅអូស្រ្តាលី ត្រូវបានស្វាគមន៍លាយឡំនឹងការតវ៉ា
ដូចការគ្រោងទុក គ្រាន់តែលោកនាយករដ្ឋមន្រ្តី ហ៊ុន សែន ឈានជើងជាន់ទឹកដីអូស្រ្តាលីភ្លាម ពលរដ្ឋរាប់រយនាក់រាប់ទាំងមន្រ្តីរដ្ឋាភិបាលកម្ពុជាផង បានឈរធ្វើការលើកបដាស្រែកស្វាគមន៍ ខណៈពលរដ្ឋខ្មែរអូស្រ្តាលីមួយក្រុមទៀតធ្វើបាតុកម្មប្រឆាំង។ ក្រុមអ្នកធ្វើបាតុកម្មប្រឆាំង និងក្រុមអ្នកស្វាគមន៍ត្រូវបានគេអះអាងថាមានគ្នារាប់រយនាក់ដូចគ្នា ក្នុងនោះមានទាំងលោក ហុង លីម តំណាងរាស្ត្រប្រចាំរដ្ឋវិចតូរីយ៉ា និងអ្នកស្រី ប៊ូ រចនា ភរិយា លោក កែម ឡី ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
តាមវីដេអូដែលផ្សាយតាមហ្វេសប៊ុករបស់លោក គឹម សន្តិភាព អ្នកនាំពាក្យក្រសួងយុត្តិធម៌បានបង្ហាញពីវត្តមានលោក ហេង សួរ អ្នកនាំពាក្យក្រសួងការងារ និងពលរដ្ឋរាប់រយនាក់ឈរលើចឹញ្ចើមថ្នល់ លើកដា ដោយមានខ្លឹមសារស្វាគមន៍ដំណើរទស្សនៈកិច្ចរបស់ប្រមុខរដ្ឋាភិបាលខ្មែរទៅទីក្រុងស៊ីដនី។ ជាមួយនឹងបដាស្វាគមន៍ យូរៗម្តង ក្រុមអ្នកគាំទ្របានស្រែកតាមមេក្រូកោតសរសើរលោកនាយករដ្ឋមន្រ្តី ហ៊ុន សែន។
ចំណែកទំព័រហ្វេសប៊ុករបស់លោក ហ៊ុន សែន វិញក៏ផ្សាយដែរ ពីទិដ្ឋភាពរបស់នាយករដ្ឋមន្រ្តីកម្ពុជា ដែលអមដំណើរផ្ទាល់ដោយ លោក ហ៊ុន ម៉ាណែត កូនប្រុសច្បងរបស់លោកនិងក្រុមយុវជនគណបក្សប្រជាជនឯទៀតហែរហមដំណើរ ខណៈលោកនាយករដ្ឋមន្ត្រីជួបសំណេះសំណាលនិងចាប់ដៃជាមួយប្រជាពលរដ្ឋខ្មែរនៅអូស្ត្រាលីដែលគាំទ្រលោក។
បើតាមហ្វេសប៊ុកដដែល ក្នុងពេលមកដល់ព្រលានយន្តហោះទីក្រុងស៊ីដនី គឺមានមន្រ្តីនៃរដ្ឋាភិបាលអូស្រ្តាលី និងមន្រ្តីស្ថានទូតខ្មែរជាច្រើននាក់មកទទួលស្វាគមន៍ លោក ហ៊ុន សែន។ រីឯនៅសណ្ឋាគារវិញក៏មានពលរដ្ឋខ្មែរមកពីប្រទេស នូវែលសេឡង់ និង អូស្ត្រាលី ជាច្រើននាក់បានមកទទួលស្វាគមន៍ផងដែរ។
ផ្ទុយពីទិដ្ឋភាពទាំងអស់នេះ ពលរដ្ឋខ្មែរអូស្រ្តាលីប្រមាណជា៥០០នាក់ មកពីបណ្តារដ្ឋនានា នៃប្រទេស អូស្រ្តាលី ក៏ជួបជុំគ្នានៅក្រុងស៊ីដនី ធ្វើបាតុកម្មប្រឆាំងនឹងវត្តមានមេដឹកនាំកម្ពុជារូបនេះផងដែរ។ នេះបើតាម លោក ហុង លីម តំណាងរាស្ត្រអូស្ត្រាលី ដើមកំណើតខ្មែរ ប្រចាំរដ្ឋវិចតូរីយ៉ា។ លោក ហុង លីម បានប្រាប់វិទ្យុបារាំងអន្តរជាតិRFIថា ពួកគេជួបជុំគ្នានៅម៉ោង៦ល្ងាច ថ្ងៃទី១៦ខែមីនានេះ នៅតាមគោលដៅមួយចំនួនដែល លោក ហ៊ុន សែន ស្នាក់នៅនិងឆ្លងកាត់។ បាតុកម្មដែលគេអះអាងថា ដែលមានការចូលរួមពីសំណាក់អ្នកស្រី ប៊ូ រចនា ភរិយាលោកបណ្ឌិត កែម ឡី ផងនោះ ត្រូវបានលោក ហុង លីម អះអាងថា នឹងការមានដុតរូបទីងមោង និងដង្ហែសាកសពតំណាងមេដឹកនាំកម្ពុជាទៀតផង។
ការធ្វើបាតុកម្មបែបនេះ ដោយ លោក ហុង លីម និយាយថា មកពីមេដឹកនាំកម្ពុជាសព្វថ្ងៃ ដឹកនាំបែបហិង្សា និងរំលាយគណបក្សសង្រ្គោះជាតិ។
តាមគម្រោង ក្នុងកិច្ចប្រជុំកំពូលពិសេសអាស៊ាន-អូស្រា្តលីពីថ្ងៃទី១៦ ដល់ថ្ងៃទី១៨ ខែមីនានេះ លោកហ៊ុន សែន រួមជាមួយថ្នាក់ដឹកនាំអាស៊ាន និងនាយករដ្ឋមន្រ្តីអូស្រ្តាលី នឹងធ្វើជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងអាស៊ាន និងអូស្រា្តលី ស្តីពីកិច្ចសហប្រតិបត្តិការប្រយុទ្ធប្រឆាំងភេរវកម្មអន្តរជាតិ ។ លោក ហ៊ុន សែន ក៏នឹងជួបសំណេះសំណាលដោយផ្ទាល់ជាមួយប្រជាពលរដ្ឋខ្មែរ អូស្ត្រាលី និង នូវែលសេឡង់ ដែលគេថាមានគ្នាប្រមាណ៨០០ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ