អង្គការសមាជិកសភាអាស៊ានព្រួយបារម្ភពីការកើនឡើងវាយប្រហារលើសិទ្ធិមនុស្សនិងប្រជាធិបតេយ្យនៅកម្ពុជា
អង្គការសមាជិកសភាអាស៊ាន (APHR) ដែលជាអង្គការនីតិបញ្ញត្តិមួយប្រចាំនៅតំបន់អាស៊ាន នៅថ្ងៃទី ២០ មីនានេះ បានចេញផ្សាយរបាយការណ៍មួយ ស្តីពី “ការស្លាប់នៃប្រជាធិបតេយ្យ៖ ការវាយប្រហារទៅលើអ្នកតំណាងរាស្ត្រ និងការគំរាមកំហែងដល់ស្ថាប័នកម្ពុជា»។ ជារបាយការណ៍ចុងក្រោយ ដែលមានកម្រាស់ជាង៥០ទំព័រ ត្រូវបានដាក់បង្ហាញ នៅទីក្រុងបាងកកប្រទេសថៃ នៅថ្ងៃនេះ ដោយបានព្រមានថា ការវាយប្រហារទៅលើអ្នកតំណាងរាស្ត្រកម្ពុជាក្នុងពេលបច្ចុប្បន្ននេះ កំពុងតែគំរាមកំហែងដល់ភាពស្របច្បាប់នៃប្រព័ន្ធនយោបាយនៅកម្ពុជា។ អ្នកនាំពាក្យគណបក្សកាន់អំណាច បានច្រានចោលរបាយការណ៍នេះ នឹងបានចាត់ទុកថា ជាក្រុមសភាប្រឆាំងនឹងធម្មនុញ្ញអាស៊ាន។
ចុះផ្សាយនៅថ្ងៃ៖
ស្តាប់ - ០២:៣៤
ពីទីក្រុងបាងកកប្រទេសថៃ ក្រុមសមាជិកអង្គការសភាអាស៊ានដើម្បីសិទ្ធិមនុស្ស (APHR) បានព្រមានពីការប្រឈមនៃលទ្ធិប្រជាធិតេយ្យនៅកម្ពុជា និងការគំរាមកំហែងពីភាពស្របច្បាប់នៃប្រព័ន្ធនយោបាយនៅក្នុងប្រទេសនេះ។ នេះបើយោងតាមរបាយការណ៍កម្រាស់ជាង៥០ទំព័រ ដែលត្រូវបានចេញផ្សាយ នៅទីក្រុងបាងកកប្រទេសថៃ នៅថ្ងៃទី២០មីនានេះ។
លោក Charles Santiago តំណាងរាស្ត្រម៉ាឡេស៊ី និងជាប្រធានអង្គការសមាជិកសភាអាស៊ានដើម្បីសិទ្ធិមនុស្ស (APHR) បានព្រមានពីភាពស្របច្បាប់នៃប្រព័ន្ធនយោបាយនៅកម្ពុជាថា កំពុងស្ថិតនៅក្នុងការគំរាមកំហែង ខណៈមានការវាយប្រហារទៅលើតំណាងរាស្ត្រគណបក្សប្រឆាំងចាប់តាំងពីពាក់កណ្តាលឆ្នាំ២០១៥មក។ នៅខែតុលាឆ្នាំ២០១៥ មានការវាយដុំទៅលើអ្នកតំណាងរាស្ត្រគណបក្សប្រឆាំងលោក គង់ សភា, លោក ញ៉យ ចំរើន និងការធ្វើទុកបុកម្នេញទៅលើក្រុមសមាជិករដ្ឋសភា ព្រឹទ្ធសភា របស់គណបក្សប្រឆាំងការចាប់ខ្លួន និងការកាត់ទោសទៅលើអ្នកការពារសិទ្ធិមនុស្សផងដែរ។ លោកបានលើកឡើងថា ប្រសិនបើគណបក្សប្រឆាំងឈ្នះការបោះឆ្នោតឃុំសង្កាត់នៅខែមិថុនាខាងមុខនេះ ការគាប់សង្កត់នឹងកាន់តែកើនឡើង។
នៅក្នុងសេចក្តីថ្លែងការណ៍បន្ថែមពីលើរបាយការណ៍ដែលមានចំនងជើងថា “ការស្លាប់នៃប្រជាធិបតេយ្យ៖ ការវាយប្រហារលើអ្នកតំណាងរាស្ត្រនិងការគំរាមកំហែងដល់ស្ថាប័នរបស់កម្ពុជា» នេះ ក៏បានទាមទារឲ្យរដ្ឋាភិបាលកម្ពុជា ធានានូវការប្រកួតប្រជែងជាមួយគណបក្សប្រឆាំងដោយស្មើភាពគ្នា។ តាមរយៈសេចក្តីថ្លែងការណ៍នេះ សមាជិកសភាអាស៊ាននៅក្នុងប្រទេសមួយចំនួនក៏បានព្រមានដែរថា ការរំលោភសិទ្ធិមនុស្សនិងលទ្ធិប្រជាធិបតេយ្យនៅកម្ពុជានឹងកាន់តែកើនឡើង ប្រសិនបើសហគមន៍នៅក្នុងតំបន់និងអន្តរជាតិ បរាជ័យក្នុងការថ្កោលទោស ឬដាក់សម្ពាធទៅលើរដ្ឋាភិបាលកម្ពុជា។
ប៉ុន្តែលោក សុខ ឥសាន សមាជិកសភាគណបក្សប្រជាជនកម្ពុជានិងជាអ្នកនាំពាក្យគណបក្សកាន់អំណាច មិនបានឲ្យតម្លៃទៅលើរបាយការណ៍របស់អង្គការសមាជិកសភាអាស៊ាននេះទេ។ សម្រាប់លោក សុខ ឥសាន ក្រុមនេះ គឺជាក្រុមសមាជិកសភាប្រឆាំង ដែលមិនស្របនឹងធម្មនុញ្ញអាស៊ាននោះឡើយ។
សូមបញ្ជាក់ថា អង្គការសមាជិកសភាអាស៊ានដើម្បីសិទ្ធិមនុស្ស (APHR) គឺជាតំណាងអង្គការ នីតិបញ្ញត្តិមួយ ដែលត្រូវបានបង្កើតឡើងកាលពីខែមិថុនាឆ្នាំ២០១៣ ដោយក្រុមសមាជិកសភាមកពីប្រទេសផ្សេងៗគ្នានៅក្នុងតំបន់អាស៊ាន។ បេសកកម្មនៃស្ថាប័នដែលមានមូលដ្ឋាននៅប្រទេសឥណ្ឌូនេស៊ីមួយនេះ គឺដើម្បីលើកកម្ពស់បញ្ហាសិទ្ធិមនុស្ស, លទ្ធិប្រជាធិបតេយ្យ និងយុត្តិធម៌ នៅក្នុងតំបន់អាស៊ីអាគ្នេយ៍។ ហើយការចេញផ្សាយរបាយការណ៍ស្តីពីកម្ពុជា នៅថ្ងៃនេះ គឺបានធ្វើឡើង បន្ទាប់ពីតំណាងបេសកម្មនៃសមាជិកសភាអាស៊ានពីររូប មកពីប្រទេស ម៉ាឡេស៊ី និងហ្វីលីពីន បានបញ្ចប់ដំណើរបេសកកម្មស្វែងរកការពិតនៅក្នុងប្រទេសកម្ពុជា កាលពីពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ