គណៈកម្មាធិការសិទ្ធិមនុស្សកម្ពុជាប្រតិកម្មនឹងប្រធានក្រុមសមាជិកសភាអាស៊ាន
គណៈកម្មាធិការសិទ្ធិមនុស្សកម្ពុជាបានធ្វើសន្និសីទកាសែតមួយនៅព្រឹកនេះ ប្រតិកម្មនឹងប្រធានក្រុមសមាជិកសភាអាស៊ានដើម្បីសិទ្ធិមនុស្ស (APHR) រួមទាំងស្ថាប័ននេះ ដែលបានចេញរបាយការណ៍រិះគន់ចំពោះការប្រើប្រព័ន្ធតុលាការ និងរដ្ឋសភាលើគណបក្សប្រឆាំង។ គណៈកម្មាធិការសិទ្ធិមនុស្សកម្ពុជា ចាត់ទុករបាយការណ៍នោះ ថាមិនឆ្លុះបញ្ចាំងពីការពិតនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:១៦
លោកកែវ រ៉េមីប្រធានគណៈកម្មាធិការសិទ្ធិមនុស្សកម្ពុជាបានពន្យល់នៅក្នុងសន្និសីទកាសែតនៅថ្ងៃទី ២៧ ខែមីនា ថាលោក Charl Santiago សមាជិកសភាម៉ាឡេស៊ី និងជាប្រធាននៃក្រុមសមាជិកសភាអាស៊ានដើម្បីសិទ្ធិមនុស្ស បានធ្វើខុសជាលើកទី ២ ចំពោះការប្រតិកម្មការពាររបាយការណ៍របស់លោក ដែលជារបាយការណ៍រិះគន់រដ្ឋាភិបាលកម្ពុជា។ លោកកែវ រ៉េមី បញ្ជាក់ថាលោក Charl Santiago ខុសលើកទី ១ នៅត្រង់ថារបាយការណ៍នោះ មិនឆ្លុះបញ្ចាំងពីការពិតនៅកម្ពុជា។
ការចេញមកប្រតិកម្មរបស់លោកកែវ រ៉េមីនេះ គឺបន្ទាប់ពី APHR បានចេញផ្សាយរបាយការណ៍មួយ កាលពីថ្ងៃទី ២០ ខែមីនារិះគន់លើការធ្វើវិសោធនកម្មច្បាប់ស្តីពីគណបក្សនយោបាយកាលពីពេលថ្មីៗនេះ ដោយចាត់ទុកថាជាការធ្វើទុក្ខបុកម្នេញតាមផ្លូវច្បាប់លើបក្សប្រឆាំង និងបង្កើតឲ្យមាន បរិយាកាសភ័យខ្លាច ដែលជាសញ្ញានៃការរំលាយរបបប្រជាធិបតេយ្យជាប្រព័ន្ធរបស់រដ្ឋាភិបាលកម្ពុជា និងបានដាក់ការសង្ស័យចំពោះការបោះឆ្នោតនាពេលខាងមុខ។
ប្រធានគណៈកម្មាធិការសិទ្ធិមនុស្សកម្ពុជាបានពន្យល់ទៅកាន់ប្រធាន APHR និងជាការឆ្លើយតបទៅកាន់របាយការណ៍នោះថា កម្ពុជាមានកម្មវិធីសមធម៌តាមប្រព័ន្ធផ្សព្វផ្សាយ សម្រាប់គណបក្សនយោបាយ ខណៈប្រទេសអាស៊ានមួយចំនួនទៀតមិនមានទេ។ កម្ពុជាមានប្រព័ន្ធផ្សព្វផ្សាយបរទេសផ្សាយជាខេមរៈភាសា ប៉ុន្តែបណ្តាប្រទេសមួយចំនួនទៀតមិនមានទេ។ ពលរដ្ឋកម្ពុជាមានសិទ្ធិបោះឆ្នោតនៅអាយុ ១៨ឆ្នាំ ខណៈប្រទេសអាស៊ានមួយចំនួនគឺតម្រូវឲ្យមានអាយុ ២១ឆ្នាំ។ លោកបន្ថែមថានៅកម្ពុជាពលរដ្ឋមានសិទ្ធិធ្វើបាតុកម្មនៅមុខតុលាការ រិះគន់តុលាការ ខណៈប្រទេសអាស៊ានមួយចំនួនមិនមានទេ។
គួរជម្រាបជូនថានេះគឺជាលើកទី ២ ហើយដែលរដ្ឋាភិបាលកម្ពុជាបានប្រតិកម្មទៅនឹងរបាយការណ៍ «ជួងមរណៈសម្រាប់ប្រជាធិបតេយ្យ» ដែលចេញផ្សាយដោយ APHR។ កាលពីលើកទី ១ អ្នកនាំពាក្យក្រសួងការបរទេសកម្ពុជា បានចេញសេចក្តីថ្លែងការណ៍ប្រតិកម្មចំពោះរបាយការណ៍នេះ ដោយបានចាត់ថាការវាយតម្លៃដែលមាននៅក្នុងរបាយការណ៍នោះ គឺជាការវាយតម្លៃដ៏ខ្មៅងងឹត។
លោក ជុំ សុន្ទរីអ្នកនាំពាក្យក្រសួងការបរទេសកម្ពុជាបានបញ្ជាក់ក្នុងសេចក្តីថ្លែងការណ៍ ដែលចេញផ្សាយកាលពីថ្ងៃទី ២២ ខែមីនាថា ការវាយតម្លៃដែលមិនអាចជឿបាន នៅក្នុងរបាយការណ៍របស់ APHR គ្រាន់តែបានឆ្លុះបញ្ចាំងពីទស្សនៈខ្មៅងងឹតរបស់បុគ្គលមួយចំនួនតូច ដែលពុំបានយោងលើការពិតជាក់ស្តែង មុននឹងធ្វើការចោទប្រកាន់ទាំងទទឹងទិសរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ