លោក ហ៊ុន សែន ត្រូវបានជ្រើសរើសជាទូតសុច្ឆន្ទៈសម្រាប់វិស័យទេសចរណ៍
លោកនាយករដ្ឋមន្ត្រី ហ៊ុន សែន នៅថ្ងៃសៅរ៍នេះត្រូវបានគេជ្រើសតាំងជាឯកអគ្គរដ្ឋទូតសុច្ឆន្ទៈពិភពលោក សម្រាប់វិស័យទេសចរណ៍ និងគោលដៅនៃការអភិវឌ្ឍប្រកបដោយចីរភាព ពីក្រុមប្រឹក្សាទេសចរណ៍និងពាណិជ្ជកម្មអឺរ៉ុប។ លោក ហ៊ុន សែន ចាត់ទុកតួនាទីថ្មីរបស់លោកនេះគឺជាមោទនៈភាពរបស់កម្ពុជាទាំងមូល។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងតួនាទីជាឯកអគ្គរដ្ឋទូតសុច្ឆន្ទៈពិភពសម្រាប់វិស័យទេសចរណ៍ លោកនាយករដ្ឋមន្ត្រី ហ៊ុន សែន អះអាងថា នឹងប្រើតួនាទីនេះ ជំរុញវិស័យទេសចរណ៍នៅកម្ពុជាឲ្យលេចធ្លោនៅលើឆាកអន្តរជាតិ។ លោកនាយករដ្ឋមន្ត្រីក៏បានប្ដេជ្ញា នឹងប្រឹងប្រែងសម្រេចឲ្យបានតាមការចង់បានរបស់ក្រុមប្រឹក្សាទេសចរណ៍ និងពាណិជ្ជកម្មអឺរ៉ុប ក្នុងការជំរុញវិស័យទេសចរណ៍។
ក្រុមប្រឹក្សាភិបាលទេសចរណ៍និងពាណិជ្ជកម្មអឺរ៉ុបត្រូវបានបង្កើតឡើងតាំងពីឆ្នាំ២០០៥ ដោយមានសមាជិកមកពីប្រទេសទាំង២៧ក្នុងសហគមន៍អឺរ៉ុប ។ ក្រុមប្រឹក្សានេះគឺជាស្ថាប័នចាស់ ជាងគេនិងមានសារៈសំខាន់ក្នុងសហគមន៍អឺរ៉ុបដែលមានជំនាញលើវិស័យស្រាវជ្រាវនិងផ្សព្វផ្សាយទេសចរណ៍ដោយមានទីផ្សារអតិថិជនរហូតដល់ ៨០០ លាននាក់ក្នុងទូទាំងសហគមន៍អឺរ៉ុប។
ទន្ទឹមនឹងនេះ វិស័យឯកជនបានចាត់ទុកតួនាទីជាឯកអគ្គរដ្ឋទូតសុច្ឆន្ទៈពិភពសម្រាប់វិស័យទេសចរណ៍របស់ប្រមុខរដ្ឋាភិបាលលោក ហ៊ុន សែន គឺជាចំណុចវិជ្ជមានមួយដ៏ល្អសម្រាប់លើកស្ទួយវិស័យទេសចរណ៍នៅកម្ពុជា។ ម្យ៉ាងទៀតការផ្ដល់តួនាទីនេះក៏លើកទឹកចិត្តដល់វិស័យឯកជនផងដែរ នៅក្នុងការចូលរួមអភិវឌ្ឍន៍វិស័យទេសចរណ៍។
តែទោះជាបែបនេះក្ដីលោក ហូរ វណ្ឌី ទីប្រឹក្សាសភាពាណិជ្ជកម្មកម្ពុជា មានយោបល់ថា ភាគីពាក់ព័ន្ធនៅក្នុងវិស័យទេសចរណ៍ត្រូវតែចេះជួយគ្នាឲ្យស្របទៅនឹងការថ្លែងរបស់លោកនាយករដ្ឋមន្ត្រី ហ៊ុន សែន ដែលថា តួនាទីថ្មីរបស់លោកគឺជាមោទនៈភាពរបស់កម្ពុជាទាំងមូល។
ដោយឡែកចំពោះការអភិវឌ្ឍន៍វិស័យទេសចរណ៍នៅក្នុងស្រុកវិញ ប្រមុខរដ្ឋាភិបាលលោក ហ៊ុន សែន ជំរុញទៅអ្នកពាក់ព័ន្ធត្រូវធានាឲ្យបានមិនត្រូវឲ្យទេសចរណ៍បំពានទៅលើវប្បធម៌នោះទេ ។ មានន័យថា បេតិកភណ្ឌពិភពលោក ប្រាសាទអង្គរវត្ត ប្រាសាទព្រះវិហារ និងប្រាសាទសំបូរព្រៃគុក មិនត្រូវរងការបំពាននោះទេ។ ក្នុងនោះ ប្រជាពលរដ្ឋ និងវិស័យឯកជនត្រូវរួមគ្នាកុំឲ្យវិស័យទេសចរណ៍បំពានលើវប្បធម៌ តែផ្ទុយទៅវិញត្រូវយកវប្បធម៌ ដើម្បីពង្រីកវិស័យទេសចរណ៍ ទើបធ្វើឲ្យវិស័យទេសចរណ៍មាននិរន្តរភាព។ នេះបើតាមលោកនាយករដ្ឋមន្ត្រី។
បើតាមលោក ហូរ វណ្ឌី កម្ពុជាត្រូវធ្វើការងារមួយចំនួនទៀតដើម្បីលើកស្ទួយវិស័យទេសចរណ៍រួមមានៈ ការរក្សាសុវត្ថិភាព សណ្ដាប់ធ្នាប់ និងអនាម័យ។ បច្ចុប្បន្នវិស័យទេសចរណ៍កម្ពុជានៅជួបបញ្ហាតម្លាភាពនៃការគ្រប់គ្រងអាជីវកម្ម។ នេះបើតាម លោក ហូរ វណ្ឌី។ គួរបញ្ជាក់ថា កម្ពុជាទទួលបានភ្ញៀវទេសចរជាង៥លាននាក់ក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ