លោក ហ៊ុន សែន នឹងចូលរួមហែក្បួនឃោសនាបោះឆ្នោតនៅថ្ងៃចុងក្រោយ
លោកនាយករដ្ឋមន្រ្តី ហ៊ុន សែន នឹងចេញហែក្បួនឃោសនាបោះឆ្នោតនៅថ្ងៃបិទបញ្ចប់យុទ្ធនាការឃោសនាបោះឆ្នោតឃុំ-សង្កាត់ នៅថ្ងៃទី ០២ ខែមិថុនាខាងមុខ។ អ្វីជាការកត់សំគាល់ នេះគឺជាលើកទីមួយហើយ ដែលលោក ហ៊ុន សែន ចេញមុខឃោសនាដោយផ្ទាល់ ចាប់តាំងពីលោកបានក្លាយជាប្រធានគណបក្សកាន់អំណាចតាំងពីខែមិថុនាឆ្នាំ ២០១៥មក។
ចុះផ្សាយនៅថ្ងៃ៖
ស្តាប់ - ០១:៥១
គឺនៅក្នុងគោលដៅដើម្បីគាំទ្រដល់បេក្ខជនក្រុមប្រឹក្សាឃុំ-សង្កាត់របស់ខ្លួន ប្រមុខបក្សកាន់អំណាច លោក ហ៊ុន សែន នឹងចូលរួមនៅក្នុងក្បួនឃោសនាបោះឆ្នោតរបស់គណបក្សប្រជាជនកម្ពុជានៅថ្ងៃទី ០២ មិថុនាខាងមុខ។ នេះបើតាមការប្រកាសរបស់លោកនាយករដ្ឋមន្រ្តី នៅលើគណនេយ្យហ្វេសបុក (Facebook) របស់លោក នាព្រឹកថ្ងៃទី ២៣ ឧសភា នេះ។ វត្តមានរបស់លោកនាយករដ្ឋមន្រ្តី នៅក្នុងក្បួនឃោសនាបោះឆ្នោត ក៏ដើម្បីបង្ហាញពីសាមគ្គីភាព និងដើម្បីលើកទឹកចិត្តដល់សមាជិក-សមាជិកក្រុមប្រឹក្សាឃុំ-សង្កាត់របស់លោកផងដែរ។ នេះបើតាមការបញ្ជាក់បន្ថែមពីលោក សុខ ឥសាន អ្នកនាំពាក្យគណបក្សប្រជាជនកម្ពុជា។
ប៉ុន្តែអ្វីជាការកត់សំគាល់ ប្រសិនបើលោកនាយករដ្ឋមន្រ្តី ហ៊ុន សែន បង្ហាញមុខជាសាធារណៈនៅក្នុងក្បួនឃោសនាបោះឆ្នោត នៅថ្ងៃចុងក្រោយនេះមែន នោះអាចចាត់ទុកថា គឺជាលើកទី ១ហើយ ដ្បិតនៅក្នុងយុទ្ធនាការឃោសនាបោះឆ្នោតនាប៉ុន្មានអាណត្តិមកនេះ លោកនាយករដ្ឋមន្រ្តីមិនដែលមានវត្តមាននៅក្នុងក្បួនឃោសនាបោះឆ្នោតនោះទេ។ ហើយនេះ ក៏អាចជាការបង្ហាញវត្តមានជាសាធារណៈរបស់លោកនៅក្នុងក្បួនឃោសនាបោះឆ្នោតរបស់គណបក្សកាន់អំណាចជាលើកដំបូងដែរ បន្ទាប់ពីលោកបានក្លាយជាប្រធានគណបក្សប្រជាជនកម្ពុជា កាលពី ខែមិថុនា ឆ្នាំ ២០១៥មក។
លោក ហ៊ុន សែន បានបញ្ជាក់នៅក្នុងគណនេយ្យហ្វេសបុករបស់លោកដែរថា វត្តមានរបស់លោកនៅក្នុងក្បួនឃោសនាបោះឆ្នោតរបស់គណបក្សកាន់អំណាចនាថ្ងៃចុងក្រោយ ក៏ជាការឆ្លើយតបទៅនឹងសំណួររបស់អ្នកគាំទ្រមួយចំនួនរបស់លោក ដែលបានចូលមកខាំមិន (Comment) តាមរយៈទំព័រហ្វេសប៊ុក (Facebook) របស់លោក ថា អត់ឃើញលោកនាយករដ្ឋមន្រ្តីចេញហែក្បួន។
គួរជំរាបជូនថា គិតត្រឹមថ្ងៃទី ២៣ ឧសភានេះ គឺជាថ្ងៃទី៤ហើយ នៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់រយៈពេល ១៥ថ្ងៃ ដែលបានចាប់ផ្តើមពីថ្ងៃទី ២០ ឧសភា ដល់ថ្ងៃទី ០២ មិថុនា។ ហើយការបោះឆ្នោត នឹងប្រព្រឹត្តទៅនៅថ្ងៃទី ០៤ មិថុនា ដោយមានគណបក្សនយោបាយចំនួន ១២ចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ