តុល្យភាពសម្លេងគាំទ្រនៅក្រៅប្រទេសអាចជាឧបសគ្គនៃការរៀបចំបោះឆ្នោតនៅខាងក្រៅ
ចុះផ្សាយនៅថ្ងៃ៖
ស្តាប់ - ០៤:៥៤
ការរៀបចំឲ្យមានការបោះឆ្នោតនៅក្រៅប្រទេសនឹងមិនអាចធ្វើទៅបានទេ ដរាបណាតុល្យភាពនៃសម្លេងគាំទ្រនៅក្រៅប្រទេស នៅមិនទាន់រកឃើញ រវាងគណបក្សកាន់អំណាចនិងគណបក្សប្រឆាំង។ ម្យ៉ាងទៀត ទម្លាប់ដែលមិនមានការរៀបចំបោះឆ្នោតនៅក្រៅប្រទេស ត្រូវបានគេអនុវត្តចាប់តាំងពីការបោះឆ្នោតដំបូងរៀបចំដោយអ៊ុនតាក់។ ការខកខាននេះមិនអាចកែប្រែបានឡើងនៅពេលដែលគណបក្សកាន់អំណាចកម្ពុជាសព្វថ្ងៃនៅតែរឹងមាំ។
នៅក្នុងជំនួបជាមួយប្រជាពលរដ្ឋខ្មែរប្រមាណជា៥០០នាក់ នៅមុនកិច្ចប្រជុំកំពូលឯសហរដ្ឋ អាមេរិក លោកនាយករដ្ឋមន្ត្រី ហ៊ុន សែន បានបង្ហើបពីភាពមិនអាចប្រព្រឹត្តទៅបានក្នុងការរៀបចំឲ្យពលរដ្ឋខ្មែរបោះឆ្នោតនៅក្រៅប្រទេស។ លោកនាយករដ្ឋមន្ត្រីលើកឡើងថា បោះឆ្នោតនៅស្រុកយើង នៅគេថាយើងបន្លំ ចុះទម្រាំបោះឆ្នោតនៅអាមេរិកនៅឆ្ងាយ»? នេះជាមូលហេតុមួយ ហើយបញ្ហាម៉ោងខុសគ្នា ក៏ជាបញ្ហាមួយទៀតដែរ។
សម្រាប់លោក ហ៊ុន សែន កម្ពុជាអាចនឹងពិចារណាអំពីការរៀបចំបោះឆ្នោតនៅក្រៅប្រទេសបានល្គឹកណា វាជាការបោះឆ្នោតប្រធានាធិបតី ឬជាការបោះឆ្នោតឯកត្តនាម។ ប៉ុន្តែថា បើជាការបោះឆ្នោតបែបសមាមាត្រដូចសព្វថ្ងៃគឺមិនអាចរៀបចំការបោះឆ្នោតក្រៅប្រទេសបានឡើយ។
មន្ត្រីគណបក្សកាន់អំណាចក៏បានបន្ទរផងដែរថា កម្ពុជានៅមិនទាន់មានលទ្ធភាពអាចរៀបចំឲ្យពលរដ្ឋខ្មែរបានចូលរួមបោះឆ្នោតនៅក្រៅប្រទេសបានទេ ដោយហេតុថាមានការខ្វះខាតច្រើនយ៉ាង ទាំងធនធានមនុស្សអ្នករៀបចំ ការចំណាយថវិកា រួមទាំងការបារម្ភពីការចោទប្រកាន់លើសុច្ចរិតភាពនិងភាពយុត្តិធម៌ បន្ទាប់ពីមានការប្រកាសលទ្ធផលឆ្នោត។
ចំពោះទស្សនៈអ្នកតាមដាននយោបាយនៅប្រទេសកម្ពុជាវិញ ថាការរៀបចំបោះឆ្នោតសម្រាប់ពលរដ្ឋខ្មែរនៅក្រៅប្រទេសពិតជាអាចធ្វើទៅបាន ក៏ប៉ុន្តែដោយសារតែរឿងនេះវាជាប់ទាក់ទងទៅនឹងឆន្ទៈនយោបាយ។
ជាទូទៅគណបក្សប្រឆាំងនៅប្រទេសកម្ពុជាតាំងពីដើមរៀងមក តែងប្រាថ្នាចង់ឲ្យប្រជាពលរដ្ឋខ្មែរនៅក្រៅស្រុក អាចបោះឆ្នោតបាន ដោយសារតែនៅសម័យសង្គ្រាមនិងជាបន្តបន្ទាប់មានជនជាតិខ្មែររាប់លាននាក់កំពុងរស់នៅនិងប្រកបការងារនៅឯក្រៅប្រទេស រួមទាំងពលករដែលចេញទៅធ្វើការនៅប្រទេសថៃ ប្រទេសកូរ៉េ និងប្រទេសមួយចំនួនទៀត។
តើមានមូលហេតុអ្វីបានជាមិនមានការព្រមព្រៀងរវាងអ្នកនយោបាយក្នុងការបង្ហាញឆន្ទៈ អាចឲ្យខ្មែរនៅក្រៅស្រុកបានបោះឆ្នោត ដូចដែលប្រទេសមួយចំនួននៅលើពិភពលោកបានធ្វើសម្រាប់ពលរដ្ឋរបស់គេ?
បើពិនិត្យមើលឲ្យបានដិតដល់ គណបក្សប្រជាជនកម្ពុជាគឺជាគណបក្សកាន់អំណាចអស់រយៈពេល៥អាណត្តិមកហើយ។ តាមភាសាល្បែង គេតែងគិតថា «មេមិនដែលនៅក្រោមពងទេ»ពោលគឺគណបក្សប្រជាជនប្រៀបបានជា«មេ»។ ដូច្នេះគណបក្សកាន់អំណាច ជាធម្មតាទេតែគិតគូរ និងមើលឃើញវែងឆ្ងាយពីផលចំណេញក្នុងថានៈជាអ្នកមានប្រៀបខាងនយោបាយ។
គណបក្សកាន់អំណាចតែងចាត់ចែងអ្វីៗគ្រប់យ៉ាង ដែលខ្លួនគិតថាអាចធ្វើទៅបានដោយមិនមានការខាតបង់និងផលប៉ះពាល់អនាគតរបស់បក្សខ្លួនផង។ គណបក្សនេះតែងតែគិតពីតុល្យភាពនៃការគាំទ្រជានិច្ច ទាក់ទងទៅនឹងសម្លេងពលរដ្ឋខ្មែរនៅក្រៅប្រទេស ខណៈដែលសម្លេងគាំទ្រគណបក្សប្រឆាំងនៅបរទេសត្រូវគេមើលឃើញថា អាចមានពី៧០ ទៅ៧៥ភាគរយនៅឡើយ។
ជាការកត់សម្គាល់ មួយរយៈចុងក្រោយនេះ ក្នុងដំណើរចាកចេញទៅក្រៅប្រទេសរបស់ប្រមុខគណបក្សកាន់អំណាច លោកនាយករដ្ឋមន្ត្រីហ៊ុន សែន តែងបានបង្ហាញពីឥរិយាបទស្និទ្ធស្នាល និងទន់ភ្លន់ជាមួយជនជាតិខ្មែរដែលរស់នៅឯបរទេស។ បន្ថែមពីនេះ កូនប្រុសច្បងរបស់លោកនាយករដ្ឋមន្ត្រី គឺលោក ហ៊ុន ម៉ាណែត ក៏បានបង្ហាញពីបេសកកម្មជាប្រវត្តិសាស្ត្ររបស់ខ្លួនដែរទៅកាន់ឯនាយសមុទ្រ និងបានជួបប្រាស្រ័យទាក់ទងជាមួយអាណិកជនខ្មែរនៅបណ្តាប្រទេសអឺរ៉ុប ក្នុងនាមជាជំនួបក្នុងក្របខណ្ឌគណបក្សប្រជាជនកម្ពុជានៅក្រៅប្រទេស។
ទាំងនេះត្រូវអ្នកតាមដាននយោបាយមើលឃើញថាអាចជាយុទ្ធនាការកៀងគរសម្លេងគាំទ្រគណបក្សកាន់អំណាច នៅឯក្រៅប្រទេសផងដែរ ដើម្បីថ្លឹងថ្លែងមើលកម្លាំងគាំទ្រ និងលទ្ធភាពដែលអាចធ្វើអ្វីទៀតបាន ទាក់ទងទៅនឹងការរៀបចំការបោះឆ្នោតនៅក្រៅប្រទេស។
ដរាបណាបេះដូងពលរដ្ឋខ្មែរ មិនអាចចែករំលែកទៅឲ្យគណបក្សកាន់អំណាចភាគច្រើន នោះការបោះឆ្នោតនៅក្រៅប្រទេសសម្រាប់ពលរដ្ឋខ្មែរនៅតែមិនអាចកើតមានឡើងជារៀងរហូត ដែលនេះវាជាក្រិត្យក្រមសត្យានុម័ត មិនមែនក្រិត្យក្រមនយោបាយដូចប្រទេសដទៃឡើយ។
ម្យ៉ាងទៀត វាអាចជាទម្លាប់ពីអតីតកាលមកក៏ថាបាន។ ទម្លាប់ដោយសារ ចាប់តាំងពីសម័យបោះឆ្នោតដំបូង ដែលរៀបចំឡើងដោយអង្គការសហប្រជាជាតិ(អ៊ុនតាក់) នៅឆ្នាំ១៩៩៣ មកប្រទេសកម្ពុជាមានការប្រទាញប្រទង់គ្នាខាងទស្សនៈពីការផ្តល់លទ្ធភាពឲ្យពលរដ្ឋខ្មែរនៅក្រៅប្រទេសបោះឆ្នោត។
ការអាក់ខានជាលើកដំបូង ដែលមិនមានការរៀបចំឲ្យពលរដ្ឋខ្មែរក្រៅស្រុកបោះឆ្នោតនេះ គឺជាទម្លាប់ ដែលគេបន្តអនុវត្តរហូតមកទល់ពេលនេះ ហើយទម្លាប់នេះមិនអាចកែប្រែបាន ដោយងាយៗបានទេ ប្រសិនបើសម្លឹងមើលទៅលើបរិបទនយោបាយកម្ពុជាបច្ចុប្បន្ន ទោះជាមានការលើកឡើងទឡ្ហីករណ៍គ្រប់ជ្រុងជ្រោយយ៉ាងណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ