ក្រសួងមហាផ្ទៃក្រើនរំលឹកអង្គភាពក្រោមឱវាទឱ្យពង្រឹងការគ្រប់គ្រងមន្ត្រីរាជការ
ប្រធានក្រុមជនបង្គោលប្រឆាំងអំពើពុករលួយផ្នែករដ្ឋបាលស៊ីវិលនៃក្រសួងមហាផ្ទៃ នៅថ្ងៃសុក្រនេះ បានជំរុញឱ្យអង្គភាពចំនួន៩ ដែលស្ថិតក្រោមឱវាទក្រសួង ចាត់វិធានការពង្រឹងការគ្រប់គ្រងមន្ត្រីរាជការស៊ីវិលឱ្យមកបម្រើការងារជូនអង្គភាពឱ្យបានទៀងទាត់។
ចុះផ្សាយនៅថ្ងៃ៖
ស្តាប់ - ០២:០៤
លោក សក់ សេដ្ឋា រដ្ឋលេខាធិការក្រសួងមហាផ្ទៃ បានសរសេរលិខិតជូនអគ្គលេខាធិការ អគ្គនាយក អគ្គាធិការ ប្រធានក្រុមប្រឹក្សា ប្រធាននាយកដ្ឋាន ដើម្បីជម្រុញឱ្យអ្នកទទួលខុសត្រូវចំពោះអង្គភាពចំនួន៩ដែលស្ថិតក្រោមឱវាទស្ថាប័នេះ ពង្រឹងការគ្រប់គ្រងមន្ត្រីរាជការស៊ីវិលរបស់ខ្លួន។
ក្នុងនាមជាប្រធានក្រុមជនបង្គោលប្រឆាំងអំពើពុករលួយផ្នែករដ្ឋបាលស៊ីវិលផង លោក សក់ សេដ្ឋា ដែលបានទទួលរបាយការណ៍ពីមន្ត្រីរបស់លោក បានបញ្ជាក់ថា មានមន្ត្រីរាជការមួយចំនួនមិនបានមកបម្រើការងារទៀងទាត់ឡើយ។ ដោយមិនបានបញ្ជាក់អំពីចំនួនពិតប្រាកដនៃមន្ត្រីខ្វះវិន័យទាំងនោះ លោករដ្ឋលេខាធិការបានស្នើវិធានការមួយចំនួនដែលរួមមាន៖ ធ្វើកិច្ចសន្យាជាលាយលក្ខណ៍អក្សរជាមួយមន្ត្រីដែលមកធ្វើការរហេតរហូត ឱ្យមន្ត្រីទាំងនោះស្ថិតក្នុងភាពទំនេរគ្មានបៀវរត្ស ឬលាលែងពីការងារដ្ឋ និងលើកសំណើសុំលុបឈ្មោះចេញពីក្របខ័ណ្ឌរដ្ឋចំពោះមន្ត្រីណាមិនមកបង្ហាញខ្លួនតាមការអញ្ជើញជាដើម។
នៅក្នុងឆ្នាំ២០១៣-២០១៤ មន្ត្រីរាជការស៊ីវិលរបស់ក្រសួងមហាផ្ទៃមានសរុប១២៣០០នាក់ ក្នុងនោះស្រីចំនួន២៤៨០នាក់ ហើយមន្ត្រីដែលធ្វើការនៅថ្នាក់ជាតិមានតែ៩២០នាក់។ ក្នុងអំឡុងពេលនោះ មន្ត្រីចំនួន៥៧០នាក់បានផ្ទេរចេញពីក្រសួងមហាផ្ទៃ និងចូលនិវត្តន៍ ខណៈពេលដែលមន្ត្រីចូលថ្មីតាមរយៈការប្រឡង និងផ្ទេរចូលមាន៣៧០នាក់។
កន្លងទៅ ក្រុមជនបង្គោលប្រឆាំងអំពើពុករលួយផ្នែករដ្ឋបាលស៊ីវិលនៃក្រសួងមហាផ្ទៃ បានស្នើឱ្យអង្គភាពនីមួយៗចំណុះទីស្តីការក្រសួង ធ្វើសេចក្តីរាយការណ៍អំពីស្ថានភាពនៃការមកបំពេញការងាររបស់មន្ត្រីរាជការស៊ីវិលក្នុងអង្គភាពរបស់ខ្លួនឱ្យបានមុនថ្ងៃទី០៦ ខែកុម្ភៈ ឆ្នាំ២០១។ ស្រាប់តែនៅថ្ងៃទី០៩ ខែកុម្ភៈ ឆ្នាំដដែល លោក ស ខេង បានរិះគន់មន្ត្រីថ្នាក់ក្រោមជាតិមួយចំនួនដែលអសកម្មចំពោះការងារ ហើយដែលលោករដ្ឋមន្ត្រីក្រសួងមហាផ្ទៃថ្លែង ពេលតែងតាំងអ្នកដឹកនាំតាមអង្គភាពជំនាញថា បញ្ហានេះនាំឲ្យប៉ះពាល់ដល់ប្រសិទ្ធភាពការងារ និងការអភិវឌ្ឍថ្នាក់មូលដ្ឋាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ