លោកស្រី កែ សុវណ្ណរតន៍៖ រដ្ឋាភិបាល គួររៀបចំថវិកាពិសេសជួយដល់គ្រួសារអ្នកភូមិរការ ដែលឆ្លងមេរោគអេដស៍
ចុះផ្សាយនៅថ្ងៃ៖
ស្តាប់ - ១១:១១
ភ្ញៀវប្រចាំថ្ងៃរបស់វិទ្យុបារាំង នៅថ្ងៃសៅរ៍នេះ គឺលោកស្រី កែ សុវណ្ណរតន៍ ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាល វិជ្ជាជីវៈ និងកិច្ចការនារី របស់រដ្ឋសភា ឬក៏គណៈកម្មការទី៨។ គណៈកម្មការទី៨ ដែលមានអ្នកតំណាងរាស្ត្រ ៨ រូប មកពីគណបក្សប្រជាជនកម្ពុជា ៤ រូប និងគណបក្សសង្គ្រោះជាតិ ៤ រូប នៅថ្ងៃទី២០ធ្នូនេះ បានបំពេញបេសកកម្មចុះទៅកាន់ឃុំរការ ស្រុកសង្កែ ខេត្តបាត់ដំបង ជាទីដែលអ្នកភូមិ ឆ្លងរាលដាលមេរោគអេដស៍។ រហូតដល់រសៀលថ្ងៃទី២០ធ្នូនេះ វិទ្យាស្ថានប៉ាស្ទ័រ បានបញ្ជាក់ថា មានអ្នកភូមិ ក្នុងឃុំរការ ១៤០ នាក់ហើយ ដែលបានធ្វើតេស្តឈាម រកឃើញថា មានផ្ទុកមេរោគអេដស៍។ ការឆ្លងមេរោគអេដស៍របស់អ្នកភូមិ ដែលលោកស្រីតំណាងរាស្ត្រ អះអាងថា ប៉ះពាល់ដល់ចិត្តសាស្ត្រ ស្មារតី និងស្ថានភាពជីវភាព។ លោកស្រី កែ សុវណ្ណរតន៍ បានជំរុញឲ្យរដ្ឋាភិបាល រៀបចំថវិកាពិសេស ជួយដល់គ្រួសារអ្នកភូមិរការ ដែលឆ្លងរាលដាលមេរោគអេដស៍។ រីឯការស្រាវជ្រាវរកមូលហេតុពិតនៃការឆ្លងរាលដាលមេរោគអេដស៍នោះ រដ្ឋាភិបាល ក៏ត្រូវតែសម្តែងការពិត កុំបិទបាំងព័ត៌មាន។