ជប៉ុន សង្ឃឹមថាកម្ពុជានឹងសហការជាមួយ UN ដើម្បីលើកកម្ពស់សិទ្ធិមនុស្ស
ជប៉ុន សង្ឃឹមយ៉ាងមុតមាំថា កម្ពុជានឹងបន្តពង្រឹងការលើកតម្កើងសិទ្ធិមនុស្ស តាមរយៈកិច្ចសហប្រតិបត្តិការជាមួយអ្នករាយការណ៍ពិសេសទទួលបន្ទុកផ្នែកសិទ្ធិមនុស្សនៃអង្គការសហប្រជាជាតិប្រចាំកម្ពុជា លោកស្រី រ៉ូណា ស្មីត (Rohna Smith) និងការិយាល័យឧត្តមស្នងការសិទ្ធិមនុស្សអង្គការសហប្រជាជាតិនៅកម្ពុជា (OHCHR) រួមទាំងជាមួយសហគមន៍អន្តរជាតិទាំងមូល។ នេះគឺជាការលើកឡើងរបស់ឯកអគ្គរាជទូតជប៉ុនប្រចាំអង្គការសហប្រជាជាតិ ក្នុងសម័យប្រជុំលើកទី ៣៧នៃក្រុមប្រឹក្សាសិទ្ធិមនុស្ស កាលពីពេលកន្លងទៅ។
ចុះផ្សាយនៅថ្ងៃ៖
ស្តាប់ - ០២:២០
បើយោងតាមសេចក្តីថ្លែងការណ៍ក្រោយសម័យប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិ ដែលស្ថានបេសកកម្មជប៉ុនប្រចាំទីក្រុងហ្សឺណែវ បានចុះផ្សាយនៅថ្ងៃទី ២៨មីនាកន្លងទៅ បានឲ្យដឹងថា ឯកអគ្គរាជទូតជប៉ុនប្រចាំអង្គការសហប្រជាជាតិ លោក Mitsuko Shino បានលើកឡើងថា ជប៉ុន បាននិងកំពុងបន្តយកចិត្តទុកដាក់យ៉ាងខ្លាំង ជុំវិញស្ថានភាពលទ្ធិប្រជាធិបតេយ្យ និងសិទ្ធិមនុស្សក្នុងប្រទេសកម្ពុជា។
តាមរយៈសេចក្តីថ្លែងការណ៍ដដែល លោក Shino បានបញ្ជាក់ថា ការបោះឆ្នោតនៅខែកក្កដាខាងមុខ មានសារៈសំខាន់ណាស់ ព្រោះវានឹងឆ្លុះបញ្ចាំងពីឆន្ទៈរបស់ពលរដ្ឋកម្ពុជា។ តាមលោក Shino ជប៉ុន បានធ្វើការយ៉ាងជិតស្និទ្ធិជាមួយរដ្ឋាភិបាលកម្ពុជា ដើម្បីធានាឲ្យមាននូវការសន្ទនាជាមួយគ្រប់ភាគីនយោបាយ ការគោរព និងឲ្យតំលៃចំពោះសិទ្ធិមនុស្ស ដល់គ្រប់អង្គការសង្គមស៊ីវិល ដើម្បីអាចឲ្យពួកគេបន្តបរិយាកាសការងារ ដោយគ្មានភាពភ័យខ្លាច។
យ៉ាងណាក៏ដោយ ជប៉ុន ប្តេជ្ញាបន្តគាំទ្រ និងផ្តល់ជំនួយ ដើម្បីឲ្យកម្ពុជា អាចកសាងប្រទេសជាតិឡើងវិញ បន្ទាប់ពីបញ្ចប់សង្គ្រាមស៊ីវិល។ ហើយជប៉ុន ក៏នឹងបន្តដើរតួ ធ្វើឲ្យមានស្ថេរភាពក្នុងបរិយាកាសប្រជាធិបតេយ្យដដែល។ ប៉ុន្តែជប៉ុន បានស្នើឲ្យកម្ពុជា ត្រូវតែចូលរួមលើកស្ទួយស្ថានភាពសិទ្ធិមនុស្ស ដោយសហការជាមួយអង្គការសហប្រជាជាតិជានិច្ច។
យ៉ាងណាមិញ ក្នុងពេលជួបសំណេះសំណាលជាមួយតំណាងថ្មីនៃកម្មវិធីអភិវឌ្ឍន៍អង្គការសហប្រជាជាតិប្រចាំកម្ពុជា កាលពីសប្តាហ៍មុន រដ្ឋមន្ត្រីក្រសួងការបរទេសកម្ពុជា បានអះអាងថា ការចុះហត្ថលេខារបស់រដ្ឋាភិបាល លើអនុស្សរណៈនៃការយោគយល់គ្នា ដើម្បីបន្តវត្តមានការិយាល័យឧត្តមស្នងការសិទ្ធិមនុស្សអង្គការសហប្រជាជាតិនៅកម្ពុជា បានបង្ហាញយ៉ាងច្បាស់ពីឆន្ទៈរបស់រដ្ឋាភិបាល ក្នុងការលើកស្ទួយ និងការពារសិទ្ធិមនុស្សក្នុងប្រទេស។ កាលពីពេលកន្លងទៅ រដ្ឋាភិបាលកម្ពុជា បានចុះហត្ថលេខាលើអនុស្សរណៈ បន្តសុពលភាពសម្រាប់ការអនុវត្តកម្មវិធីនៃកិច្ចសហប្រតិបត្តិការបច្ចេកទេសលើវិស័យសិទ្ធិមនុស្សនៅកម្ពុជា សម្រាប់រយៈពេល ២ឆ្នាំ ពីថ្ងៃទី ១មករា ឆ្នាំ ២០១៧ ដល់ថ្ងៃទី ៣១ធ្នូ ឆ្នាំ ២០១៨។
គួរជម្រាបជូនថា ជប៉ុន គឺជាប្រទេសផ្តល់ជំនួយដល់ដំណើរការអនុវត្តសិទ្ធិមនុស្ស និងលទ្ធិប្រជាធិបតេយ្យ រួមទាំងការបោះឆ្នោតនៅកម្ពុជាធំជាងគេ។ ហើយទំហំនៃការវិនិយោគរបស់ជប៉ុន នៅកម្ពុជា ក៏មានដល់ទៅប្រមាណ១.៦ពាន់លានដុល្លារ កាលពីឆ្នាំមុន។ ប៉ុន្តែស្របពេលដែលប្រទេសអ្នកផ្តល់ជំនួយដល់កម្ពុជាផ្សេងទៀត ដូចជាសហភាពអឺរ៉ុប និងសហរដ្ឋអាមេរិក បានថ្កោលទោសកម្ពុជាថាបានរំលោភសិទ្ធិមនុស្ស និងសិទ្ធិនយោបាយ ជប៉ុននៅតែរក្សាភាពស្ងៀមស្ងាត់ ហើយបន្តផ្តល់ជំនួយដល់រដ្ឋាភិបាលកម្ពុជាជាធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ