លោក ហ៊ុន សែន បញ្ជាឲ្យបិទមជ្ឈមណ្ឌលសិទ្ធិមនុស្សកម្ពុជា
លោកនាយករដ្ឋមន្ត្រីហ៊ុន សែន នៅព្រឹកថ្ងៃអាទិត្យនេះ បានបញ្ជាផ្ទាល់មាត់ឲ្យក្រសួងមហាផ្ទៃបិទមជ្ឈមណ្ឌលសិទ្ធិមនុស្សកម្ពុជា។ បើតាម លោក ហ៊ុន សែន អង្គការក្រៅរដ្ឋាភិបាលមួយនេះបង្កើតឡើងដោយលោក កឹម សុខា ក្រោមការបង្គាប់បញ្ជារបស់សហរដ្ឋអាមេរិក។ប៉ុន្តែនាយិកាអង្គការនេះអះអាងថា មជ្ឈមណ្ឌលសិទ្ធិមនុស្សកម្ពុជា មិនជាប់ពាក់ព័ន្ធនឹងសកម្មភាពនយោបាយនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ដោយ អ៊ឹង ប៊ុនថន
នៅពេលជួបសំណេះសំណាលជាមួយកម្មកររាប់ពាន់នៅព្រឹកអាទិត្យ លោកប្រមុខរដ្ឋាភិបាលកម្ពុជា បានចាត់ទុកមជ្ឈមណ្ឌលសិទ្ធិមនុស្សកម្ពុជាថាបង្កើតឡើងទៅតាមការបញ្ជារបស់បរទេស។ បរទេសដែលលោក ហ៊ុន សែន ទំនងសំដៅទៅលើសហរដ្ឋអាមេរិកដែលឲ្យលោក កឹម សុខា ផ្អាកពីឆាកនយោបាយមួយរយៈហើយបង្កើតអង្គការនេះឡើងកាលពីឆ្នាំ២០០២។
លោក ហ៊ុន សែន អះអាងថា ការបង្កើតអង្គការក្រៅរដ្ឋាភិបាលមួយទៅតាមបរទេសបង្គាប់នេះគឺជារឿងខុសច្បាប់។ប៉ុន្តែបើអង្គការក្រៅប្រទេសមកបង្កើតដោយសុំច្បាប់លោក ហ៊ុន សែនថាមិនជាបញ្ហានោះទេ។
ក្រោយការប្រកាសរបស់ប្រមុខរដ្ឋាភិបាលដូចន្នេះ មជ្ឈមណ្ឌលសិទ្ធិមនុស្សកម្ពុជា បានចេញសេចក្តីថ្លែងការណ៏ថា អង្គការនេះត្រូវបានបង្កើតឡើងដើម្បីលើកកម្ពស់ការគោរពសិទ្ធិមនុស្សនៅកម្ពុជាដោយឈរលើមូលដ្ឋានគ្រឹះនៃភាពឯករាជ្យតម្លាភាពសមភាពនិងមិនរើសអើង។ លោកស្រី ចក់ សុភាព នាយិកាប្រតិបត្តិបាននិយាយថា រយៈពេល១០ឆ្នាំនៃការគ្រប់គ្រងមជ្ឈមណ្ឌលសិទ្ធិមនុស្សកម្ពុជា បានប្រឈមមុខនឹងការប្រតាយប្រតប់ពីគណបក្សកាន់អំណាចនិងគណបក្សប្រឆាំងដែលជាលទ្ធផលនៃការរិះគន់លើគោលការណ៍របស់ខ្លួន។ ក៏ប៉ុន្តែលោកស្រី អះអាងថា មជ្ឈមណ្ឌលនេះ មិនពាក់ព័ន្ធនឹងសកម្មភាពនយោបាយ ឬបម្រើផលប្រយោជន៍គណបក្សនយោយបាយណាមួយនោះឡើយ។
ឆ្លើយតបមកកាន់អ្នកយកព័ត៌មានវិទ្យុបារាំងRFI លោក អ៊ូ វីរៈ ប្រធានក្រុមប្រឹក្សាភិបាល នៃមជ្ឈមណ្ឌលសិទ្ធិមនុស្សកម្ពុជា សំដែងការព្រួយបារម្ភយ៉ាងខ្លាំងណាស់ចំពោះបញ្ហានេះ ដោយថា(ម.ស.ម.ក) ជាអង្គការចំបងមួយក្នុងចំណោមអង្គការដែលលេចធ្លោបំផុតនៅកម្ពុជា។ លោកថាការបិទទ្វារនៃអង្គការនេះវានឹងមានផលវិបាកធំធេងសម្រាប់សង្គមស៊ីវិលនៅកម្ពុជាទាំងមូល។
តាមប្រវត្តិ សកម្មជនការពារសិទ្ធិមនុស្ស លោក កឹម សុខា គឺជាអ្នកបង្កើត ម.ស.ម.ក នៅក្នុងខែ វិច្ឆិកា ឆ្នាំ២០០២។ ប៉ុន្តែនៅខែធ្នូ ឆ្នាំ២០១៥ លោកត្រូវបានអាជ្ញាធរចាប់ខ្លួន និងឃុំខ្លួនជាមួយនឹងសកម្មជនដទៃទៀត ក្រោមការចោទប្រកាន់ពីបទបរិហារកេរ្មិ៍ ដោយសារមតិយោបល់ដែលត្រូវបានសរសេរដោយជនមិនស្គាល់ អត្តសញ្ញាណលើបដាដែលបានដាក់បង្ហាញនៅថ្ងៃប្រារព្ធទិវា សិទ្ធិមនុស្ស។ទោះជាយ៉ាងណា សកម្មជនទាំងអស់ ត្រូវបានដោះលែងវិញ បន្ទាប់ពីមានសម្ពាធជាអន្តរជាតិ ។ នៅដើមឆ្នាំ២០០៧ លោក កឹម សុខា បានលាឈប់ពី ម.ស.ម.ក ដោយបានបន្តអាជីពជាអ្នកនយោបាយ។ លោក អ៊ូ វីរៈ ត្រូវបានតែងតាំងជាប្រធាន ជំនួសលោកកឹម សុខា ។ នៅខែមីនា ឆ្នាំ២០១៤ លោក អ៊ូ វីរៈ បានលាលែងពីដំណែងជាប្រធាន ម.ស.ម.ក ហើយបានជំនួសដំណែង ដោយលោកស្រី ចក់ សុភាព ដែលបច្ចុប្បន្ននេះ ជានាយិកាប្រតិបត្តិ។
សូមជម្រាបថា កាលពីដើមសីហាឆ្នាំនេះ លោក ហ៊ុន សែន ក៏បានបញ្ជាឲ្យបិទអង្គការមួយឈ្មោះអង្គការមេត្រីអន្តរជាតិ ដោយលោកថា អង្គការរបស់អាមេរិកនៅកម្ពុជានេះ បានប្រមាថដល់ស្ត្រីខ្មែរស្តីពីពេស្យាចារ្យកុមារនៅភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ