គណៈកម្មការនៅតែយកវត្តចាស់ជាទីតាំងប្រារព្ធខួប១០០ថ្ងៃលោក កែម ឡី
ជំហរមិនប្រែប្រួលទោះមិនមានការអនុញ្ញាតពីអាជ្ញាធរក្រុងក៏ដោយ ក៏គណៈកម្មការបុណ្យខួបគំរប់១០០ថ្ងៃលោកកែម ឡី នៅតែយកវត្តចាស់ជាទីតាំងប្រារព្ធខួប១០០ថ្ងៃលោកបណ្ឌិតកែម ឡី ដដែល។ ហើយអាជ្ញាធរក្រុងភ្នំពេញឯណេះវិញក៏នៅតែរក្សាជំហរដាច់ណាត់មិនឲ្យមានរៀបចំពិធីបុណ្យនៅវត្តចាស់នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ព្រះតេជគុណ ប៊ុត ប៊ុនទិញ សមាជិកគណៈកម្មការបុណ្យខួបគម្រប់១០០ថ្ងៃលោក កែម ឡី មិនមានក្ដីព្រួយបារម្ភខ្លាចមានបញ្ហាអ្វីមួយកើតឡើងនោះទេ ខណៈដែលគណៈកម្មការបុណ្យលោក កែម ឡី នៅតែយកវត្តពោធិយារាមហៅវត្តចាស់ខណ្ឌជ្រោយចង្វារជាទីតាំងប្រារព្ធកម្មវិធីបុណ្យ។ ព្រះតេជគុណ ប៊ុត ប៊ុនទិញ បានហៅការហាមឃាត់របស់អាជ្ញាធរជាទង្វើរើសអើងប្រកាន់បក្សពួក។
ប៉ុន្តែយ៉ាងណាក៏ដោយព្រះតេជគុណ ប៊ុត ប៊ុនទិញ នៅតែមានជំនឿថា នឹងមានការប្រែប្រួលជាវិជ្ជមានណាមួយសម្រាប់ការរៀបចំពិធីបុណ្យខួបគំរប់១០០ថ្ងៃលោក កែម ឡី។ ព្រោះព្រះអង្គជឿទៅលើបទពិសោធន៍ពីអតីតកាលដោយកាលពីមុនពិធីរៀបចំបុណ្យសពលោក កែម ឡី ប្រារព្ធបាននៅវត្តចាស់លើកនេះក៏ប្រារព្ធបានដូចគ្នា។
ដោយឡែកបន្ថែមពីលើលិខិតរបស់សាលារាជធានីភ្នំពេញ លោក មាន ចាន់យ៉ាដា អ្នកនាំពាក្យសាលារាជធានីភ្នំពេញបានគូសបញ្ជាក់ថា ជំហររបស់អាជ្ញាធរគឺនៅដដែលពោលគឺមិនអនុញ្ញាតឲ្យយកទីតាំងវត្តចាស់ប្រារព្ធកម្មវិធីបុណ្យខួប១០០ថ្ងៃលោក កែម ឡី នោះទេ។
លោកថា មូលហេតុដោយសារតែអាជ្ញាធរមិនទាន់យល់ច្បាស់ពីសមាសភាពនៃគណកម្មការរៀបចំបុណ្យសពរបស់លោក កែម ឡី ដោយគ្មានការចូលរួមពីក្រុមគ្រួសារនៃសពជាពិសេសគឺម្ដាយនិងបងប្អូនបង្កើតលោក កែម ឡី។ ម្យ៉ាងទៀតអាជ្ញាធរយល់ថា ពិធីបុណ្យគួរតែរៀបចំនៅស្រុកកំណើត។ ប្រឈមនឹងជំហរដាច់ណាត់របស់គណៈកម្មការបុណ្យសពនេះ លោក មាន ចាន់យ៉ាដា ថា អាជ្ញាធរនៅមិនទាន់គិតគូរពីវិធានការនោះទេ។
សូមបញ្ជាក់ថា ពិធីបុណ្យខួបគម្រប់១០០ថ្ងៃលោកបណ្ឌិត កែម ឡី នឹងប្រារព្ធឡើងរយៈពេលបួនថ្ងៃចាប់ថ្ងៃទី១៤ដល់១៧តុលា។ ក្រៅពីរៀបចំពិធីបែបសាសនាដែលមានកំណត់ក្នុងកម្មវិធីបុណ្យក៏មានដង្ហែរូបសំណាកលោក កែម ឡី ចេញពីវត្តចាស់ទៅតំកល់នៅស្រុកកំណើត។ ក្ដីរំពឹងរបស់ព្រះតេជគុណ ប៊ុត ប៊ុនទិញ នឹងមានពលរដ្ឋខ្មែរចូលរួមកម្មវិធីបុណ្យចំនួន១០ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ