ការដកដំណែងលោកកឹម សុខា គឺជាតេស្តមួយ
ចុះផ្សាយនៅថ្ងៃ៖
ស្តាប់ - ០៦:២៧
តំណាងរាស្ដ្រគណបក្សប្រជាជនកម្ពុជាបានដកតួនាទីដឹកនាំរដ្ឋសភារបស់លោកកឹម សុខា ប្រកបដោយជោគជ័យកាលពីចុងសប្តាហ៍មុនគឺជាជ័យជំនះផ្លូវចិត្តរបស់គណបក្សកាន់អំណាច ប៉ុន្តែគឺជារូបភាពវិជ្ជមានផ្នែកនយោបាយសម្រាប់គណបក្សប្រឆាំង។ ប៉ុន្តែវិបត្តិនយោបាយនឹងអូសបន្លាយតទៅទៀតប្រសិនបើមិនមានការចរចាសម្រុះសម្រួលគ្នារវាងគណបក្សកាន់អំណាចនិងគណបក្សប្រឆាំងនោះ។
កាលពីថ្ងៃសុក្រទី៣០ ខែតុលា តំណាងរាស្ត្រមកពីគណបក្សប្រជាជនកម្ពុជាចំនួន៦៨រូប បានបោះឆ្នោតជាឯកឆន្ទទម្លាក់លោក កឹម សុខា ពីដំណែងអនុប្រធានទី១នៃរដ្ឋសភាមកពីគណបក្សសង្គ្រោះជាតិ។
ពិតមែនហើយការដកដំណែងមេដឹកនាំគណបក្សប្រឆាំងរូបនេះមិនមែនកើតឡើងដោយចៃដន្យទេហើយក៏មិនមែនជាព្រឹត្តិការណ៍ដែលមានភ្លើងមិនមានផ្សែងនោះដែរ។ផ្ទុយទៅវិញការដកដំណែងនេះផ្សារភ្ជាប់ទៅនឹងព្រឹត្តិការណ៍ចំនួនពីរដែលកើតឡើងបន្តបន្ទាប់បណ្តាក់គ្នា។
ព្រឹត្តិការណ៍ទី១គឺបាតុកម្មប្រឆាំងលោកនាយករដ្ឋមន្ត្រីហ៊ុន សែន នៅទីក្រុងប៉ារីស ប្រទេសបារាំងក្នុងឱកាសលោកចាប់ផ្តើមបំពេញទស្សនៈកិច្ចជាផ្លូវការនៅទីនោះ ហើយបន្ទាប់មកលោកហ៊ុន សែន បានប្រកាសពីប្រទេសបារាំងថ្ងៃទី២៥ តុលា ឆ្នាំ២០១៥ថាលោកកឹម សុខា អាចនឹងបាត់បង់ដំណែងជាអនុប្រធានទី១នៃរដ្ឋសភា។
និងព្រឹត្តិការណ៍ទី២ គឺជាការធ្វើបាតុកម្មទ្រង់ទ្រាយធំមួយនៅមុខមន្ទីររដ្ឋសភាជាតិ។ ក្រុមបាតុករបានស្រែកទាមទារឲ្យដកដំណែងលោកកឹម សុខា ជាបន្ទាន់ដោយផ្អែកលើមូលហេតុនៃការព្រួយបារម្ភពីការបង្កអស្ថេរភាពនិងសន្តិសុខជាតិ។ ព្រឹត្តិការណ៍ទី២នេះក៏មានទំនាក់ទំនងជាមួយសេចក្តីប្រកាសរបស់លោកនាយករដ្ឋមន្ត្រីហ៊ុន សែន នៅប្រទេសបារាំងផងដែរ។
បើគេពិនិត្យលើសវតារឿងទាំងនេះ គេអាចទាញទឡ្ហីករបានមួយចំនួន។
ទី១ នេះគឺជាលទ្ធផលដែលកើតចេញពីភាពប្រេះស្រាំនៃចំណងនយោបាយរវាងគណបក្សប្រជាជនកម្ពុជានិងគណបក្សសង្គ្រោះជាតិ។ នោះគឺចំណងនៃកិច្ចព្រមព្រៀងនយោបាយនៅឆ្នាំ២០១៤ក្រោយពីគណបក្សទាំងពីរតវ៉ាគ្នាមិនចាញ់មិនឈ្នះលើលទ្ធផលបោះឆ្នោត។និយាយឲ្យចំគឺវាជាលទ្ធផលនៃការដួលរលំដល់កម្រិតសូន្យនៃអ្វីមួយដែលគេបានប្រសិទ្ធនាមឲ្យថាជា «វប្បធម៌សន្ទនា» នៃគណបក្សគូប្រជែងស្លាប់រស់ទាំងពីរ។
ទី២ ការដកដំណែងលោកកឹម សុខា នេះបានបង្ហាញពីកម្លាំងសម្ពាធផ្នែកនយោបាយរបស់គណបក្សកាន់អំណាចលើគូប្រជែងរបស់ខ្លួន ទាំងនៅក្នុងទីលានទូទៅ ទាំងនៅក្នុងស្ថាប័ននិតិបញ្ញត្ដិ។
ទី៣ ការទម្លាក់លោកកឹម សុខា ពីកៅអីដឹកនាំលំដាប់ទី២នៅក្នុងស្ថាប័នកំពូលនេះ ចង់ឬមិនចង់ក៏ជាផ្នែកមួយដែលចាំងផ្លាតពីឥទ្ធិពលនៃមេដឹកនាំស្ថាប័ននិតិប្រតិបត្តិលើស្ថាប័ននីតិបញ្ញត្តិ។
ទី៤ វាបានបង្ហាញពីអំណាចនិងប្រសិទ្ធិភាពរបស់គណបក្សប្រជាជនកម្ពុជានៅក្នុងការដោះស្រាយបញ្ហាស្តីពីកិច្ចព្រមព្រាងជាមួយគណបក្សប្រឆាំង។នៅក្នុងកិច្ចព្រមព្រៀងនយោបាយរវាងគណបក្សកាន់អំណាចនិងគណបក្សប្រឆាំងដើម្បីពុះបំបែកវិបត្តិនយោបាយក្រោយពីការបោះឆ្នោតខែកក្កដាឆ្នាំ២០១៣ គណបក្សទាំងពីរបានព្រមព្រៀងគ្នាផ្តល់ដំណែងអនុប្រធានទី១នៃរដ្ឋសភាដល់គណបក្សសង្រ្គោះជាតិ ប៉ុន្តែនៅក្នុងបរិបទនៃការទម្លាក់ដំណែងលោកកឹម សុខា គណបក្សប្រជាជនកម្ពុជាចង់បង្ហាញសារមួយថាខ្លួនមានលទ្ធភាពដកដំណែងនេះពីលោកកឹម សុខា វិញថ្វីបើខ្លួនបានឯកភាពជាគោលការណ៍លើចំណុចនេះទៅហើយក្តី។ ពោលគឺគណបក្សប្រជាជនចង់ប្រគល់ដំណែងនោះក៏បាន ហើយដកហូតមកវិញក៏បាន។
ទី៥ ការទម្លាក់លោកកឹម សុខា អាចជាការកាត់ជើងគណបក្សប្រឆាំងនៅក្នុងស្ថាប័ននីតិបញ្ញត្តិដ្បិតលោកកឹម សុខា មានតួនាទីសំខាន់មួយជាពិសេសពេលដែលលោកត្រូវដឹកនាំកិច្ចប្រជុំក្នុងអវត្តមានរបស់ប្រធានសភា លោកហេង សំរិន។ ម្យ៉ាងវិញទៀតតួនាទីរបស់លោកកឹម សុខា ក៏ជាបង្អែកមួយរបស់តំណាងរាស្ដ្របក្សប្រឆាំងនៅក្នុងស្ថាប័នកំពូលនេះដែរ។
ទី៦ ការឈានដល់ដំណាក់កាលចុងក្រោយនេះក៏ជាការបញ្ជាក់ពីការខ្វះភាពបត់បែនរបស់គណបក្សប្រឆាំងផងដែរ។ភាពបត់បែនដែលអាចនឹងទប់ស្កាត់ហេតុការណ៍នេះកើតឡើងបាន។ ប៉ុន្តែវាក៏អាចជាយុទ្ធសាស្ដ្ររបស់គណបក្សប្រឆាំងផងដែរក្នុងការរុញទូកបណ្តោយទឹក នៅពេលដែលគណបក្សកាន់អំណាចពុះពាររុញស្ថានការណ៍នេះឲ្យកើតឡើង។ ពីព្រោះថានៅក្នុងការអនុវត្តវិធានការដកដំណែងលោកកឹម សុខា នេះគណបក្សប្រជាជនកម្ពុជាបានឈ្នះផ្លូវចិត្តលើគណបក្សសង្គ្រោះជាតិ ប៉ុន្តែជារូបភាពនយោបាយគណបក្សប្រឆាំងបានស្រូបយកប្រតិកម្មដែលមានលក្ខណៈវិជ្ជមានដល់ខ្លួន។ គឺប្រតិកម្មកម្រិតជាតិនិងកម្រិតអន្តរជាតិ។
ទី៧ ការដកតួនាទីអនុប្រធានទី១នៃរដ្ឋសភាពីលោកកឹម សុខា បានបញ្ជាក់យ៉ាងច្បាស់ពីប្រសិទ្ធភាពរបស់អង្គការនីតិបញ្ញត្តិដែលបានយកចិត្តទុកដាក់លើការទាមទាររបស់ក្រុមបាតុករ។ ហើយបានយកសំណើរនិងការទាមទាររបស់ក្រុមបាតុករទៅពិចារណានិងសម្រេចយ៉ាងឆាប់រហ័ស។
ដូច្នេះផលវិបាកនេះតម្រូវឲ្យមានការពិភាក្សានយោបាយឡើងវិញរវាងគណបក្សកាន់អំណាចនិងគណបក្សប្រឆាំង។ គណបក្សទាំងពីរអាចនឹងសាកល្បងចងភ្ជាប់ស្ពានវប្បធម៌សន្ទនាឡើងវិញដើម្បីភាពសុខដុមនិងលំនឹងនយោបាយ។
គណបក្សកាន់អំណាចគួរតែផ្តល់ឱកាសដល់ការដាក់បេក្ខភាពលោកកឹម សុខា ឬបេក្ខភាពរបស់លោកសម រង្ស៊ីជាជំនួសសម្រាប់ដំណែងដែលបាត់បង់នេះ។ប៉ុន្តែរូបភាពនឹងកាន់តែអាក្រក់ប្រសិនបើគណបក្សសង្គ្រោះជាតិមិនស្នើបេក្ខភាពបេក្ខជនសម្រាប់ដំណែងនេះ ហើយដំណែងនេះនឹងត្រូវច្បាមយកដោយគណបក្សកាន់អំណាចនោះ។
ការឆ្លើយតបទៅនឹងការទាមទាររបស់ក្រុមបាតុករយ៉ាងមានប្រសិទ្ធភាពរបស់ក្រុមតំណាងរាស្ដ្រពីខាងគណបក្សប្រជាជនកម្ពុជាគឺជាតេស្តមួយសម្រាប់យកទៅអនុវត្តន៍សម្រាប់ការទាមទារឲ្យមានការយកចិត្តទុកដាក់សម្រាប់ក្នុងករណីដទៃទៀតរបស់ក្រុមប្រជាពលរដ្ឋ។ហើយទំនងជាប្រជាពលរដ្ឋអាចរង់ចាំមើលបំណាំនេះនៅថ្ងៃខាងមុខ៕
អត្តបទដោយ៖គង់ សុឋានរិទ្ធ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ