ពលរដ្ឋខ្មែរអាមរិកាំង៣៦នាក់ទៀតត្រូវបានបញ្ជួនមកកម្ពុជាវិញ
ពលរដ្ឋខ្មែរអាេមរិកាំងចំនួន៣៦នាក់ទៀតត្រូវបានអាជ្ញាធរអាមេរិកបញ្ជួនមកកម្ពុជាវិញ កាលពីម្សិលមិញ បន្ទាប់ពីពួកគេប្រព្រឹត្តិបទឧក្រិដ្ឋ និងទទួលទោសរួចរាល់នៅសហរដ្ឋអាមេរិក។ យ៉ាងណាក៏ដោយ រដ្ឋាភិបាលកម្ពុជា អះអាងថា គ្មានជម្រើសអ្វីក្រៅតែពីព្រមទទួលយកពលរដ្ឋរបស់ខ្លួនមកវិញទេ បើទោះបីកន្លងមកកម្ពុជាធ្លាប់បានតវ៉ាកុំឲ្យអាមេរិកបញ្ជួនពលរដ្ឋអាមេរិកាំងដើមកំណើតខ្មែរមកវិញក៏ដោយ។
ចុះផ្សាយនៅថ្ងៃ៖
ស្តាប់ - ០១:២៩
ពលរដ្ឋខ្មែរទាំង៣៦នាក់ដែលមកដល់ប្រទេសកំណើតវិញ កាលពីថ្ងៃពុធ ត្រូវបានជួបមន្រ្តីប៉ូលីស និងអង្គការជួយជនរងគ្រោះ មុននឹងត្រូវបានផ្ទេរទៅឲ្យស្ថិតក្រោមការមើលថែរបស់អង្គការអាមេិកាំង។ ពលរដ្ឋខ្មែរអាមេរិកាំងចំនួន៣៦នាក់បន្ថែមទៀតនេះ គឺក្នុងចំណោម៤៦នាក់ ដែលត្រូវបានតុលាការអាមេរិកកាត់ទោសពីបទឧក្រិដ្ឋហើយអនុវត្តទោសរួចរាល់នៅទីនោះ។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា បានប្រាប់វិទ្យុបារាំងអន្តរជាតិRFIនៅថ្ងៃព្រហស្បតិ៍ថា រដ្ឋាភិបាលកម្ពុជា គ្មានជម្រើសអ្វីក្រៅតែពីព្រមទទួលយក ពលរដ្ឋរបស់ខ្លួនមកវិញទេ បើទោះបីកន្លងមកកម្ពុជាធ្លាប់បានតវ៉ាកុំឲ្យអាមេរិកបញ្ជួនពលរដ្ឋអាមេរិកាំងដើមកំណើតខ្មែរមកវិញក៏ដោយ។ ការតវ៉ារបស់រដ្ឋាភិបាលកម្ពុជា ដោយយល់ឃើញថា ការបញ្ជួនពួកគេមកវិញ គឺជាការរំលោភសិទ្ធិមនុស្សធ្ងន់ធ្ងរ ព្រោះពលរដ្ឋខ្មែរអាមេរិកាំងទាំងនោះ អ្នកខ្លះមិនចេះនិយាយភាសាខ្មែរទេ ហើយក៏ពិបាករស់នៅកម្ពុជាទៀតផង។
បើតាម លោក ផៃ ស៊ីផាន គឺមានករណីខ្លះត្រូវបានបញ្ជួនត្រឡប់ទៅសហរដ្ឋអាមេរិកវិញ ដោយសារតែពលរដ្ឋខ្មែរទាំងនោះ ឈ្នះក្តីនៅតុលាការកំពូលអាមេរិក ប្រឆាំងនឹងការចាប់បញ្ជួនមកកម្ពុជា។
ជាការកត់សម្គាល់ ឆ្នាំ២០១៨នេះ មានការបណ្ដេញចេញច្រើនជាងគេបង្អស់។ ពោលគឺមានពលរដ្ឋខ្មែររហូតដល់២០០នាក់ ដែលត្រូវបណ្តេញចេញពីសហរដ្ឋអាមេរិក។
យោងតាមរបាយការណ៍អង្គការគាំពារពលរដ្ឋខ្មែរគ្មានទីពឹង ពលរដ្ឋខ្មែរដែលបញ្ជូនមកចំនួន២៩នាក់បានស្លាប់ ក្នុងនោះ២នាក់ស្លាប់ដោយធ្វើអត្តឃាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ